Ձեր վստահելի աղբյուրը

«Կորոնավիրուսի համաճարակի սոցիալ-տնտեսական հետևանքները մեղմելու համար ԵՄ-ն 80 մլն եվրո կտեղաբաշխի Արևելյան գործընկերության 6 երկրի մեջ: Եվրոպական հանձնաժողովը կվերանպատակաուղղի մոտ 880 մլն եվրո արժողությամբ գումարը՝ ամբողջ տարածաշրջանի համար՝  կարճաժամկետ և միջնաժամկետ ֆինանսական գործիքների միջոցով »,- այսօր կառավարության մամուլի սրահում հայտարարեց էկոնոմիկայի նախարարի տեղակալ Վարոս Սիմոնյանը:

Բանախոսը տեղեկացրեց, որ ԵՄ-ի կողմից Հայաստանին կհատկացվի նաև 92 մլն եվրո աջակցություն, որը կուղղվի առողջապահության համակարգին, ճգնաժամից տուժած քաղաքացիներին և ՓՄՁ-ներին:

Տեղեկացնելով, որ աջակցության չափը դինամիկ կարող է ավելանալ՝ փոխնախարարը հայտնեց.  «ԵՄ-ի կողմից ընդունվել և հաստատվել է նոր գործիք, որն ուղղված է տնտեսական ճգնաժամից դուրս գալուն, այդ աջակցությունը կտրամադրվի կարիք ունեցող երկրներին և կոչվում է «Եվրոպայի թիմ»:  Գործիքի շրջանակներում նախատեսված է 20 մլրդ եվրոյի աջակցություն»:

Էկոնոմիկայի մյուս փախնախարար Ավագ Ավանեսյանն էլ հայտնեց, որ Արժույթի միջազգային հիմնադրամի տարածած հայտարարության համաձայն Հայաստանին հասանելիք աջակցության ծավալը հասել է 206 մլն հատուկ փոխատվությունների:

«Դոլարային արտահայտությամբ այն կազմում է մոտ 280 մլն ԱՄՆ դոլար: Սա համապատասխան գումարների ձևափոխում է բյուջետային վարկի, որը հատկացվում է կառավարությանը, որը շարունակաբար բարելավել է գործարար միջավայրը, բարենպաստ պայմաններ ստեղծել ներդրումների համար: Կառավարությունն է ընտերլու, թե ինչի վրա ծախսի վարկը»,- տեղեկացրեց փոխնախարարը:

Ավանեսյանը նաև հայտնեց, որ  կառավարության ընդունած առաջին միջոցառման շրջանակներում հայտերի թիվն անցել է 200-ից, երկրորդում՝ գյուղատնտեսության շրջանակներում արդեն բավարարվել է 536  հայտ: Ըստ փոխնախարարի, 3-րդ միջոցառմամբ 115 հայտ է բավարարվել, այն դեպքում, երբ  այստեղ հայտերի թիվը եղել է 700-ի: 5-րդ միջոցառման շրջանակներում 7500 ՓՄՁ ստացել է աջակցության միանվագ միջոցները՝ յուրաքանչյուր 5-րդ աշխատողի  աշխատավարձի չափով:

Վարոս Սիմոնյանը տեղեկացրեց, որ  ԵԱՏՄ կառավարությունների կողմից՝ բժշկական ապրանքներ տարածք ներմուծելու համար զրոյական մաքսատուրք է սահմանվել:  Նաև  նման որոշում կա գյուղատնտեսական և պարենային նշանակության ապրանքների համար: Առաջինի դեպքում արտոնությունը կգործի 6 ամսով, իսկ պարենային և գյուղատնտեսական ապրանքատեսակների մասով՝ 3 ամիս ժամանակով:

«Այս պահի դրությամբ ԵԱՏՄ բոլոր երկրներն առաջարկ են ներկայացրել  որոշ ապրանքատեսակներ, որոնք տնտեսական-սոցիալական նշնակություն ունեն և կխթանեն երկրների տնտեսությունները, դրանց ներմուծման մաքսատուրքը նույնպես ժամանակավորապես կզրոյացվի» ,- հայտնեց Սիմոնանը

Էկոնոմիկայի նախարարի մամուլի քարտուղար Աննա Օհանյանն էլ հայտնեց, որ  երրորդ ծրագրում մեղմացումներ են կատարվել և աջակցություն կարող են ստանալ նաև այն ձեռնարկատերերը, ում նկատմամբ վարչական վարութ է հարուցվել, բայց 2019 թվականի դեկտեմբերի 31-ի դրությամբ չեն ունեցել ժամկետանց հարկային  պարտավորություններ:

Աջակցություն կարող են ստանալ նաև այն ընկերությունները, որոնց 2019 թվականի յուրաքանչյուր եռամսյակի շրջանառությունը ավել չէ ընդհանուր տարեկան շրջանառության 70 տոկոսից: