Ձեր վստահելի աղբյուրը

Հայկական արժեքների պաշտպանության  «Կամք» հասարակական նախաձեռնության հիմնադիր Վահագն Չախալյանը ֆեյսբուքյան էջում գրել է. «Հարգարժան Նիկոլ Փաշինյան, Ալեն Սիմոնյան և Ստյոպա Սաֆարյան, վստա՛հ եմ, չարժեր այս աստիճան անամոթաբար հարձակվել Վեհափառի և Սուրբ Էջմիածնի վրա…

Վեհափառը շատերի ազատ արձակման համար է միջնորդել, այդ թվում և իմ...
մի՛ անհանգստացեք, մի՛ խառնվեք իրար, վստահաբար կգա ժամանակ և նա ձեր բոլորի ազատության համար էլ կմիջնորդի:

հ.գ. և մենք այն ժամանակ էլ կպաշտպանենք իրեն, ձեր քաղաքական հակառակորդների հարձակումներից:
Առողջ եղեք, բացի ձեզանից և ձեր թիմակիցներից, ձեր թիկունքից ոչ ոք չի հարվածում Ձեզ, սա էլ ի նկատի ունեցեք»:

Հիշեցնենք, որ երեկ Ամենայն Հայոց Կաթողիկոս Գարեգին Բ-ն News.am-ին հայտնել էր.

«Հաղորդ լինելով ՀՀ երկրորդ նախագահ Ռոբերտ Քոչարյանի առողջության առնչությամբ բժիշկների մասնագիտական կարծիքներին, կարևոր ենք համարում, որ արդարադատության իրագործման հետ մեկտեղ ձեռնարկվեն բոլոր կանխարգելիչ միջոցներն ու միջոցառումները, այդ թվում՝ խափանման միջոցի փոփոխություն՝ համավարակի այս շրջանում ապահովագրելու նրան առողջական վիճակի հետագա բարդացումներից»։

Այս հրապարակումից հետո ԱԺ փոխնախագահ, իշխող քաղաքական ուժի ներկայացուցիչ Ալեն Սիմոնյանը ֆեյսբուքյան իր էջում մասնավորապես  գրել էր. «Ասեմ, որ հազարավոր ՀՀ քաղաքացիներ արդեն շատ երկար ժամանակ է կարևոր են համարում Ամենայն Հայոց Կաթողիկոսի փոփոխության հարցը:

Կարծում եմ` քաղաքացի Կտրիճ Ներսիսյանը, ով տասնամյակներ շարունակ լռել է, լռել է, լռել է, այսօր` նոր իրավիճակում, ազատ կարող է դատարանում երաշխավոր հանդիսանալ քաղաքացի Ռ.Քոչարյանի խափանման միջոցի փոփոխության համար, և դրա համար բավարար դրամական միջոցներ կգտնվեն»։

Սա հարուցել է բազմաթիվ հոգևորականների զայրույթը, նրանք քննադատում են Սիմոնյանի նման պահվածքը։