Համոզված եմ, որ մենք հաջողելու ենք. ԿԲ նախագահի թեկնածու Մարտին Գալստյան
ԱԺ-ն այսօր աշխատանքները սկսեց ԱԺ կանոնակարգ-օրենքի 135-րդ հոդվածով սահմանված կարգով Կենտրոնական բանկի նախագահի ընտրության հարցի քննարկմամբ:
ԱԺ նախագահ Արարատ Միրզոյանը հայտարարեց, որ Ֆինանսաբյուջատային հարցերի մշտական հանձնաժողովը Ազգային Ժողովին է առաջարկում «Իմ քայլը» խմբակցության կողմից ներկայացված Մարտին Գալստյանի թեկնածությունը:
Հանձնաժողովի նախագահի տեղակալ Արտակ Մանուկյանը ամբիոնի մոտ համակարգչից ընթերցեց թեկնածուի ինքնակենսագրականը:
Մարտին Գալստյանը ունի Հարվարդի համալսարանի մագիստրոսի կոչում և ՀՀ ԿԲ խորհրդի անդամ է: Տեղեկացնելով, որ 2015 թվականին Գալստյանը եղել է Հայաստանի Ամերիկյան համալսարանի լավագույն դասախոսը՝ Մանուկյանը հայտարարեց, որ թեկնածուին ընտրելիս առաջնորդվել են մասնագիտական համապատասխանությամբ և աշխատանքային փորձով:
Մարտին Գալստյանը իր ելույթում շնորհակալություն հայտնեց «Բարգավաճ Հայաստան» և «Լուսավոր Հայաստան» խմբակցություններին հանդիպման և արդյունավետ քննարկման համար և ներկայացրեց ԿԲ-ի գործունեության իր տեսլականը:
Նկատելով, որ երկիրը ապրում է մարդկության պատմության արդի ժամանակաշրջանի համար նախադեպը չունեցող իրողությունում՝ Մարտին Գալստյանը տեղեկացրեց, թե ինչ քայլեր է արել ԿԲ-ն համաճարակի ճգնաժամը մեղմելու համար:
«Կենտրոնական բանկը դեռևս մարտի սկզբին առևտրային բանկերի ղեկավարների հետ կայացած հանդիպումների ընթացքում քննարկել էր հնարավոր զարգացումները՝ պայմանավորված վարկառուների ֆինանսական դիրքի հնարավոր վատթարացմամբ և հորդորել էր ցուցաբերել անհատական մոտեցում վարկառուներին և հետաձգել վարկերի վճարումները:
Պայմանավորվածության համաձայն Կենտրոնական բանկը որոշակիորեն թուլացրել է ֆինանսական հաստատությունների կարգավորման ռեժիմը: Ինչպես նաև 6 ամիս ժամկետով երկարաձգվել է ընթացիկ մարումների ժամկետները՝ միջազգային ծրագրերով տրամադրված և ծրագրային հիպոթեքային վարկերի համար»,- հայտարարեց ԿԲ նախագահի թեկնածուն և հավելեց, որ բանկերին և վարկային կազմակերպություններին հնարավորություն է տրվել ֆիզիկական և իրավաբանական անձանց վարկերի պայմանները վերանայել այնպես, որ վարկերի մարումների ուշացումները բացասաբար չանդրադառնան վարկառուների վարկային պատմության վրա, ինչպես նաև հնարավորինս չավելանա վարկային բեռը:
Գալստյանը գտնում է, որ բանկային համակարգը առանց պետության կողմից որևէ աջակցություն ակնկալելու առաջիններից էր, որը իր դերակատարումն ունեցավ ճգնաժամի հետևանքները մեղմելու գործում:
Բանախոսը տեղեկացրեց, որ մարտի 17-ին Կենտրոնական բանկի խորհուրդը որոշում կայացրեց նվազեցնել վերաֆինանսավորման տոկոսադրույքը և նկատեց, որ տարածաշրջանի շատ գործընկերներ, բախվելով ազգային արժույթների արժեզրկման ճնշումներին, չգնացին այս ճանապարհով՝ Ռուսաստանի և Վրաստանի կենտրոնական բանկերը չիջեցրեցին տոկոսադրույքը, իսկ Ղազախստանի կենտրոնական բանկը նույնիսկ ստիպված եղավ բարձրացնել այն:
«Կենտրոնական բանկը հայտարարեց և համակարգին տրամադրեց իրացվելիության անհրաժեշտ քանակ՝ թե՛ ազգային արժույթով, և թե՛ արտարժույթով: Համակարգն այս պահին չունի իրացվելիության որևէ խնդիր, իսկ շուկաները գործում են բնականոն ռիթմով»,- հայտնեց Մարտին Գալստյանը:
Թեկնածուն ընթերցեց ԿԲ-ի գործունեության վերաբերյալ ԱՄՀ-ի դրական արձագանքը.
«Կենտրոնական բանկն իր երկակի՝ գների և ֆինանսական կայունության ապահովման իրավասությունների շրջանակում, ձեռնարկեց կորոնավիրուսային վարակով (COVID-19) պայմանավորված ճգնաժամին արձագանքելու արագ քայլեր: Այն անհապաղ իջեցրեց վերաֆինանսավորման տոկոսադրույքը՝ գնաճը խթանելու և տնտեսական աշխուժությանն աջակցելու, սակայն պատրաստ է քաղաքականության ճշգրտմանը՝ կապիտալ արտահոսքի ճնշումների և փոխարժեքի անկանոն տեղաշարժերի դեպքում ֆինանսական կայունությունը պահպանելու համար: Ներքին ֆինանսական շուկաներն համավարակի սկզբից էլ, ընդհանուր առմամբ, անխափան են գործել, ինչին օգնել է ՀՀ ԿԲ կողմից իրացվելիության տրամադրումը: ՀՀ Կենտրոնական բանկի կարգավորման և վերահսկողական արձագանքը եղել է ֆինանսական կայունության, առողջ բանկային համակարգի և տնտեսական ակտիվությանը միտված»։
Գալստյանը հայտարարեց, որ Կենտրոնական բանկին հաջողվել է ապահովել ցածր գնաճային միջավայր:
Թեկնածուի նշած երկրորդ կարևորագույն իրադարձությունը, ԿԲ-ի մանդատի փոփոխությունն էր, որի արդյունքում ֆինանսական կայունության ապահովումը դասվեց Կենտրոնական բանկի հիմնական խնդիրների շարքին:
Անդրադառնալով 2014 թվականի ճգնաժամին ԿԲ-ի արդյունավետ դիմակայմանը՝ նա հայտարարեց.
«Ճգնաժամերի ընթացքում չունեցանք գեթ մեկ անվճարունակության դեպք, պետությունը ոչ մի ֆինանսական կազմակերպության փրկօղակ չնետեց, հարկատուների փողերը չուղղվեցին ֆինանսական կազմակերպություններին փրկելու: Այս ամենը վկայությունն է նրա, որ անցել ենք բազում փորձությունների միջով, ունեցել բացթողումներ և սխալներ, արժանացել ենք քննադատության, բայց նաև ունեցել ենք արժեքավոր ձեռքբերումներ: Ինձ համար գոնե մի բան անառարկելի է, դժվարությունները թրծել են մեզ, թիմը դարձրել կուռ, բայց միևնույն ժամանակ ազատ ու բաց նոր, համարձակ գաղափարների համար: Իսկ Կենտրոնական բանկը որպես կառույց դարձել է կարևորագույն տարածաշրջանային գործընկեր միջազգային հեղինակավոր կառույցների համար»:
ԱՆդրադառնալոբ ԿԲ հետագա քայլերին՝ նա նաև նշեց. «Կարծում եմ, որ դրամավարկային քաղաքականության արդյունավետության ամենակարևոր չափանիշը հասարակության վստահությունն է դրա նկատմամբ: Միայն այդ պարագայում է հնարավոր արդյունավետորեն խարսխել հասարակության գնաճային սպասումները՝ ինչը հանդիսանում է արդյունավետ դրամավարկային քաղաքականության հիմքը: Վստահության բարձրացման հիմնական գրավականը իրականացվող քաղաքականության թափանցիկության հետևողական բարձրացումն է»։
Նրա խոսքով՝ վերջին մի քանի տարիների ընթացքում եղել է դինամիկ աճող ֆինանսական համակարգ և պետք է աշխատել հավասարակշիռ և տարբերակված աճի ուղղությամբ՝ խորացնելով ֆինանսական շուկաները և ընդլայնելով գործունեության տեսակները։
«Պետք է հասկանալ, սակայն, որ մարտահրավերները կարող են փոխել իրենց կերպարանքը, ուստի լուծման գաղտնիքը ոչ թե խնդիրների հետևից գնալն է, այլ ապագայի ցանկացած մարտահրավերի նորովի նայելու ու մարտահրավերը որպես հնարավորություն տեսնելու ունակությունը»,- հայտնեց Գալստյանը:
ԿԲ նախագահի թեկնածուն նկատեց, որ մարդիկ պետք է վստահ լինեն՝ ցանկացած իրավիճակում մակրոկայունությունը կպահպանվի՝ գները կմնան կայուն և ֆինանսական համակարգը կաշխատի անխափան. «Հայաստանում այդ հենման կետը Կենտրոնական բանկի կողմից ստեղծված մակրոկայունության միջավայրն է: Մեր անտեսանելի ներկայության շնորհիվ է, որ մարդիկ խնայողություններ են ձևավորում՝ հավատալով, որ դրանք չեն արժեզրկվի, գործարարները իրականացնում են երկարաժամկետ ներդրումներ՝ հավատալով, որ ռիսկերը կառավարելի են, և կառավարությունը կարող է կենտրոնանալ զարգացման ծրագրերի վրա՝ չմտածելով անկայունության սպառնալիքների մասին»:
«Համոզված եմ, որ մենք հաջողելու ենք»,- խոսքն ավարտեց Գալստյանը:
Թեկնածուին հարցեր տալու համար գրանցվեցին 39 պատգամավոր:
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
