Ձեր վստահելի աղբյուրը

«Ինտերնետ հանրություն» ՀԿ փոխնախագահ, կիբեռանվտանգության փորձագետ Գրիգորի Սաղյանը հարցազրույց է տվել 365news-ին, որտեղ մեկնաբանել է «Յուքոմ» ընկերության շուրջ իրադարձությունները։ 

Օրեր առաջ Եսայան եղբայրները, որոնք «Յուքոմ» ընկերության 5,94 բաժնետերերն են, վերջնական առաջարկ էին ներկայացրել՝ 94,06 տոկոս բաժնետոմսերի համար 34 միլիարդ 57 միլիոն դրամ:

Փորձագետի կարծիքով, այս առաջարկը ինքնին հակասական է։

«Եսայանների առաջարկն իր մեջ պարունակում է հակասություն՝ ինչի՞ պիտի համաձայնեն, եթե անգամ 100 միլիոն ԱՄՆ դոլար տան, 200 միլիոն, միևնույն է, կալանքի տակ է: Այսինքն, հնարավոր է, որ Խաչատրյան եղբայրների հաշվին նստի այդ գումարը, հետո դատական գործի հետևանքով այդ գումարներն առգրավվեն», - ասել է Սաղյանը։

Շարունակելով թեման, փորձագետը բարձրաձայնել է ևս մեկ կարևոր հարց։ Ըստ մամուլի հրապարակումների՝ Խաչատրյան եղբայրները երկար ժամանակ արդեն իսկ դժգոհ էին այն փաստից, որ «Յուքոմ»-ը շահութաբեր ընկերություն չէ:

Խոսելով «Յուքոմ»-ի գործունեության ընթացքում կատարված ներդրումների և դիվիդենտների մասին, Սաղյանը նշել է. «Բնական է՝ ցանկացած ընկերություն, եթե զրոյից սկսվում է, այդ ընկերությունը ներդրումների կարիք ունի՝ հաշվի առնելով բարձր տեխնոլոգիական ոլորտը, կապը, մրցակցության մակարդակը, ներդրումներ միշտ պետք է անել, որպեսզի չկորցնել շուկան: Ներդրումներն արվում են»: 

Սակայն հարց է առաջանում, թե ի՞նչ արդյունավետությամբ են արվում այդ ներդրումները, ո՞ւր են ուղղված: Ըստ որոշ տեղեկությունների՝ Խաչատրյանները դժգոհ էին, որ ներդրումներն ուղղվում էին ոչ նպատակային ուղղությամբ։

Հավելենք, որ ավելի վաղ մամուլում տեղեկություններ տարածվեցին, որ «Յուքոմ»-ի մեծամասնական բաժնետերերը նախատեսում են անցկացնել անկախ խորացված ֆինանսական աուդիտ, բացի պարտադիրից։ Այդ գործընթացի մեկնարկը նախատեսված էր այս տարվա փետրվար-մարտ ամիսներին, սակայն այն կորոնավիրուսի տարածման պատճատով հետաձգվել է։