Ձեր վստահելի աղբյուրը

Վարչապետ Նիկոլ Փաշինյանը կառավարության այսօրվա նիստում մանրամասներ ներկայացրեց, թե ինչու է Արարատի մարզի Նորաշեն համայնք մուտքի և ելքի հատուկ ռեժիմ սահմանվել։

«Մեկուսացման մեջ գտնվող քաղաքացիներից մեկի ընտանիքում դժբախտություն է տեղի ուենցել և դիմումի հիման վրա մեկուսացման մեջ գտնվող անձն ուղեկցվել է թաղման արարողության։ Իհարկե,  նախապես զգուշացնելով, որ պետք է հեռավորություն պահել և որոշակի կանոններ պահպանել։ Ոստիկանի և մասնագետի ուղեկցությամբ է գնացել հուղարկավորության արարողությանը, բայց հասկանալի է, որ իրավիճակը հուզումնալից է, և նրանք, ի հեճուկս խնդրանքների, հորդորների, չեն պահել պայմանները, գրկախառնվել են և երկու օր անց մեկուսացման մեջ գտնվող անձի մոտ թեստը դրական արդյունք է գրանցել, գրանցվել է կորոնավիրուս։ Եվ սրա պատճառով պարետատունը որոշում է կայացրել Նորաշեն համայնքն ուղղակի ամբողջությամբ մեկուսացնել», - ասաց Նիկոլ Փաշինյանը։

Նրա խոսքով, հասկանալի է, որ նման դեպքում պարատատունը ճիշտ որոշում է կայացրել  քաղաքացուն ուղեկցել հարազատի հուղարկավորությանը, հոգեհանգստին, բայց տվյալ դեպում պարզ է, որ ոստիկանությունը չի կարող ամեն ինչ հսկողության տակ պահել և քաղաքացիները պետք է հասկանան, որ այս իրավիճակը չափազանց լուրջ է:

«Այսօր դեպքեր ունենք, որ ընտանեկան, ազգակցական հարաբերություններ կան, որ համաճարակային մեր անհատական պահվածքի հետևանքով փլուզվում են։ Պետք է շատ լուրջ վերաբերվենք այս իրավիճակին։ Մեր ռազմավարությունն այն է, որ վիրուսին զուգահեռ պետք է ապրել, բայց, որպեսզի դրա արդյունքում աղետներ չբերենք մեր գլխին, անհրաժեշտ է մեզանից յուրաքանչյուրը առանձնահատուկ պատասխանատվությամբ վերաբերվի իր վարքին, պահվածքին»,- ասաց Փաշինյանը։

Նրա խոսքով, առաջիկայում ապրիլի 24-ն է և, չի կարծում, որ եթե այդ օրը էմոցիոնալ արդյունքի պատճառով հարյուրավոր մարդիկ մահանան, դրանով ցեղասպանության մեր նահատակների հոգիները ավելի հանգիստ կլինեն։

Վարչպետն ասաց, որ ամեն օրվա հետ պետք է ավելի լուրջ վերաբերվեն․ «Եթե մենք ուզում ենք սահմանափակումները ոչ թե գնալով խստանան, այլ թուլանան, չնայած մյուս կողմից տարբերակ էլ չունենք, որովհտեև չենք կարող տնտեսությունն ուղղակի փակել։ Մարդիկ մեկ ամսից ավելի տներում փակված են, հոգեբանական, տնտեսական ճնշման ներքո են, բոլորս սոցիալական ճնշման ներքո ենք, և մենք պետք է սովորենք ապրել կորոնավիրուսի պայմաններում: Դա մեզանից յուրաքանչյուրի վրա դնում է առանձնահատուկ պատասխանատվություն։

Հիմա մենք ամսի 20-ից պետք է հնարավորություն տանք տեքստիլ գործարաններին աշխատել, բայց եթե գործատուները և աշխատողները առանձնահատուկ պատասխանատվություն չցուցաբերեն, այս որոշումը աղետալի հետևանքների է բերելու։ Այո, մենք պատրաստ ենք պատասախանատվության մեր մասը կրել։ Այսօր քննարկում էինք, որ այդ ձեռնարկությունները կլինեն հատուկ հսկողության տակ, պետական ներկայացուցիչները ստուգայցեր կանեն ու կտեսնեն, թե ինչպես են հետևում կանոններին»։

Ն. Փաշինյանի խոսքով, այս պահին պարետատունը, առողջապահության նախարարությունը կարողացել են համաճարակը առնել հսկողության տակ:

«Այս փուլից սկսած` յուրաքանչյուր քաղաքացու աջակցությունն է պետք, որպեսզի իրավիճակը նեգատիվ առումով չփոխվի»,- նշեց վարչապետ Նիկոլ Փաշինյանը։

Առողջապահության նախարար Արսեն Թորոսյանն էլ ասաց, որ նույն գործատուի շահերից է բխում բոլոր կանոնների պահպանումը, քանի որ հենց իր գործունեությունն է վտանգվելու։

«Մենք երեկ էլի դեպք ենք ունեցել, երբ մի խոշոր գործատուի մոտ ունեցել ենք կորոնավիրուսի դեպքի հաստատում, որը հայտնաբերվել է մուտքի մոտ ջերմաչափման ժամանակ, տվյալ անձը ուղարկվել է տուն, գործատուն զերծ է մնացել մեծ վտանգից, որ հնարավոր էր հարյուրավոր այլ աշխատակիցներ վարակվեին։ Այդ պատասխանատվությունն ավելի շատ պետք է հենց տնտեսվարող սուբյեկտներին, քան մեզ բոլորիս, իրենց գործունեությունն անդադար ապահովելու համար»,- նշեց նախարարը: