Ձեր վստահելի աղբյուրը

Կրթության ոլորտի մասնագետ, քաղաքական ու հասարակական գործիչ ԱՆահիտ Բախշյանը պարետատան ուշադրությունը հրավիրում է ուսուցիչների անվտանգության հարցերին։

Նա գրել է.

«Պարետատո՜ւն, հե՜յ, ո՞վ կա այնտեղ, լսո՞ւմ եք

Դուք պարտավոր եք ապահովել մանկավարժների անվտանգությունը
Պարոն Ավինյան, հուսամ երեկվա ահազանգիս ծանոթ եք, որին երկու լրացում եմ ուզում անել։

1․ Դպրոցները, նաև մատյանները պետք է ախտահանվեին, որից հետո նոր թույլ տրվել մանկավարժների մուտքը դպրոց, որովհետև հավանաբար կորոնավիրուսով վարակված աշակերտներ ու մանկավարժներ էլ են եղել, գոնե մեկ դպրոցի մասին ունեմ հստակ տեղեկություն։ Ընդ որում այդ դպրոցի շենքում միաժամանակ 2 դպրոցի աշակերտներ և մանկավարժներ են մտնում-դուրս գալիս ու ախտահանում այնտեղ չի եղել։
Արդյո՞ք դպրոցի շենքերն ու մատյաններն ախտահանվել են, քանի որ ԿԳՄՍ նախարարի հրամանն առանց շենքեր մտնելու և մատյաններին ձեռք տալու հնարավոր չէ կատարել։

2․ Տրանսպորտի բացակայության պայմաններում ինչպե՞ս եք պատկերացնում մանկավարժներին պարտադրված այս տեղաշարժը, որը հակասում է Ձեր որոշումներին։ Այսօր իմ աղջիկը 9․30-ին գնաց դպրոց ու ետ եկավ տաքսիով, չգիտեմ ախտահանում իրականացվել էր դպրոցի շենքում, թե՝ ոչ, բայց ես անհանգիստ եմ։
Վերջապես, ինձ շատ հետաքրքիր է, թե ԿԳՄՍ նախարարի սույն հրամանը, որի վերաբերյալ շրջաբերական չի ստացել առնվազն մի դպրոց և որը հակասում է Ձեր հրամանին, քննարկվել է Ձեզ հետ և Ձեր կողմից նշածս վերոնշյալ ախտահանման և մանկավարժների տեղաշարժման հետ կապված խնդիրների վերաբերյալ, ինչպես դա արել եք գործատուներին, հանձնարարականներ տրվել են»։

Նա ավելի վաղ ֆեյսբուքյան գրառմամբ դիմել էր պարետատան ղեկավար նշանակված փոխվարչապետ Տիգրան Ավինյանին. «Գիտե՞ք, որ տնօրեններն այսօր մանկավարժներին ստիպում են այս պայմաններում գնալ դպրոց, մատյանները արտատպել ու կիսամյակի բոլոր գնահատականներն անցկացնել էլեկտրոնային մատյան, որն արդեն կա՛ dasaran.am-ում։ Կանխե՛ք, խնդրում եմ։

Միանգամայն խելամիտ առաջարկ է Սուրեն Ալոյանի առաջարկը, ԿԳՄՍ նախարարությունը պարտավոր է ընդառաջել այս նախաձեռնությանը՝ ելնելով 38000 ուսուցիչների շահերից ու պահանջներից։ Սակայն մի կարևոր հարց է ծագում, թե dasaran-նն այս գործը տարիներ շարունակ արդեն իրականացնում էր ու մանկավարժները դրան ընտելացել էին, ի՞նչ կարիք կար այս գործընթացը տալ ԿՏԱԿ ՊՈԱԿ-ին, ինչո՞ւ եք սևեռվել արդեն կայացած այս մասնավոր կառույցը քանդելու վրա, որը 10 տարում պետությունից ստացել է ընդամենը 210մլն դրամ, իսկ ԿՏԱԿ-ը տարեկան ստացել է 800մլն-ից ավել դրամ, բայց այս գործը չի արել ու հիմա մասնավոր կառույցն ուժեղացնելու փոխարեն, նույն նպատակի համար պետական միջոցները պարզապես վատնում եք, ինչո՞ւ։ Էլ չեմ ասում, թե ինչ անելանելի վիճակի մեջ եք դնում մանկավարժներին, ո՞նց եք պատկերացնում այդ աշխատանքը։

Սա ի՞նչ վերաբերմունք է մանկավարժների նկատմամբ։ Ինչո՞ւ եք վտանգում մանկավարժների առողջությունը»։