Ձեր վստահելի աղբյուրը

«Որքան շատ բան է կախված մարդու որոշումներից, այդքան բարձր է նրա աշխատավարձը»,- խորհրդարանում ասաց ԱԺ նախագահ Արարատ Միրզոյանը՝ անդրադառնալով պատգամավորների աշխատավարձերի չափին և ստացած պարգևավճարներին։

ԱԺ նախագահը նշեց, պետական համակարգում գրեթե վերոնշյալ սկզբունքն է գործում, բայց ողջախոհության սահմաններում։

«Երբ  մենք կարիք ունենք բարձր պրոֆեսիոնալների, օրինաչափ է, որ նրանց հիմնական մասը մասնավորում է աշխատում և բարձր աշխատավարձ ստանում։ Այս մարդկանց պետք է փորձենք պահել պետական համակարգում»,- ասաց Միրզոյանը։

Նա շեշտեց, որ պատգամավորների, նախարարների և փոխնախարարների պարգևավճարների վերաբերյալ քննադատությունները տեղին կլինեին, եթե հասարակության մյուս խավերի ներկայացուցիչների աշխատավարձերը և կենսաթոշակները բարձրացնելուն ուղղված ջանքեր չգործադրվեին։  Սակայն, ըստ Միրզոյանի, մարդկանց աշխատավարձերը բարձրացնելուն ուղղված քայլեր արվում են։

«Այս գումարման խորհրդարանի պատգամավորների ճնշող մեծամասնությունը չունի իր բիզնեսը, այլ եկամուտներ չունի։ Նրանք առավոտից երեկո այստեղ աշխատում են, անում են քայլեր, որպեսզի լավացնեն մարդկանց կյանքը, և դրա համար վճարվում են. կա սահմանված աշխատավարձ, և օրենքով նախատեսված 30%-ի չափով սահմանված պարգևավճար։ Հիմա այստեղ մի հարց էլ կա՝ պարգևավճարը խրախուսման նպատակ ունի»,- ներկայացրեց Միրզոյանը։

ԱԺ նախագահն ասաց, որ հանրության մոտ տպավորություն է ստեղծվել, թե պատգամավորները 2 մլն պարգևավճար են ստանում, բայց պատգամավորի պարգևավճարի չափը շուրջ 150 հազար դրամ է, մի փոքր բարձր են հանձնաժողովների նախագահների և ԱԺ նախագահի ու փոխնախագահների պարգևավճարները։

Միրզոյանը տեղեկացրեց նաև, որ ոչ բոլոր պատգամավորների մարտ ամսվա պարգևավճարն է ուղղվել կորոնավիրուի դեմ պայքարի ֆոնդին։

«Միայն պատգամավորների պարգևավճարներն են փոխանցվել, մի քիչ բարդ որոշում էր, բայց ես աշխատակազմին այդ առաջարկությամբ չդիմեցի։ Աշխատակազմը ստացավ մարդ ամսվանը»,- շեշտեց Միրզոյանը։