Ձեր վստահելի աղբյուրը

Իսպանիայի կառավարությունը ստիպված է եղել օգտագործումից հանել մի քանի հարյուր հազար դիմակներ, որոնք բերվել են Չինաստանից և բաժանվել տարբեր ինքնավար համայնքներում: Այս մասին գրում է «ՌԻԱ Նովոստի» գործակալությունը:

Խոսքը գնում է FPP2 արտադրողի` Գարի Գալաքսի դիմակների մասին, որին Չինաստանի կառավարությունն ընդգրկել է պաշտոնապես հաստատված սանիտարական նյութերի մատակարարների շարքում:

«Ընդհանուր առմամբ 350 հազար դիմակ է առգրավվել այն բանից հետո, երբ թեստերից հետո պարզ է դարձել, որ դրանք չեն բավարարում անվտանգության անհրաժեշտ չափանիշներին»,- հայտնում է Mundo թերթը:

Խոտանված դիմակները եղել են Կատալոնիայի, Արագոնի, Կաստիլե-Լա Մանչայի, Ռիոյայի, Կաստիլ-և-Լեոնի, Վալենսիայի, Գալիսիայի, Մուրսիայի շրջաններում:

FF2 դիմակի ներթափանցման աստիճանը պետք է լիներ 6%-ից ցածր, խոտանված խմբաքանակի մեջ այն 18%-ից 29% է եղել:

Անկախ արհմիությունից հայտնել են, որ խոտանված դիմակներն արդեն օգտագործվել են հիվանդանոցներում և ծերանոցներում:

«Ծերանոցների աշխատակիցները կրում են այս դիմակները և վարակի վտանգի տակ են: Դարձյալ հաստատվել է այն փաստը, որ դիմակները չեն փորձարկվել՝ սպառնալիք դառնալով աշխատակիցների առողջության համար»,- ասել է Արհմիության ներկայացուցիչ Ելենա Մորալը ՝ պահանջելով կարանտինացնել հիվանդանոցների և ծերանոցների աշխատակիցներին և բնակիչներին:

Ավելի վաղ Իսպանիայում առգրավվել էին մի քանի տասնյակ հազարավոր արագ թեստեր, որոնք առաքվել են Չինաստանից և որոնք չեն բավարարել պահանջները (դրանց արդյունավետությունը պահանջվող 80% -ի փոխարեն ընդամենը 30% էր):

Բացի այդ, Մադրիդի համայնքը ստացել է մոտ 60 հազար FPP2 դիմակ, և պարզվել է, որ դրանք սովորական վիրաբուժական դիմակներ են:

«Մինչ այդ, Չինաստանից Իսպանիա են առաքվել դիմակի արտադրության չորս սարք»,- հայտնել են Պաշտպանության նախարարությունից: Հաշվարկվում է, որ նրանք կկարողանան ամսական արտադրել 10 միլիոն դիմակ:

Իսպանիան այժմ երրորդ տեղում է կորոնավիրուսի հետևանքով զոհերի քանակով (ԱՄՆ-ից և Իտալիայից հետո) և երկրորդ տեղում (Միացյալ Նահանգներից հետո) հայտնաբերված դեպքերի թվով:

Միևնույն ժամանակ, Իսպանիան ունի մեկ միլիոն մարդու հաշվով աշխարհում ամենամեծ զոհերի թիվը: Համաճարակի սկզբից և մինչև ապրիլի 18-ը հայտնաբերվել է հիվանդության ավելի քան 191 հազար դեպք, մահացել է ավելի քան 20 հազար հիվանդ: