Ձեր վստահելի աղբյուրը

«Ucom» ընկերության շուրջ արտառոց ոչինչ չկա, հերթական կենդանի գործընթացն է ինչպես յուրաքանչյուր սուբյեկտի պարագայում։ Առցանց ասուլիսում ասաց իրավաբանական գիտությունների թեկնածու, դոցենտ, փաստաբան Գնել Մուղնեցյանը՝ պարզաբանելով «Ucom»-ի շուրջ ստեղծված իրավիճակի իրավական կողմերը: 

«Գործադիր մարմնի ղեկավար Հայկ Եսայանը դիմում է  ներկայացրել  իր լիազորությունների դադարեցման վերաբերյալ, որից հետո  օրենքով սահմանված կարգով ընթացակարգեր են իրականացվել՝ վերջինիս լիազորությունները դադարեցնելու  և համապատասխանբար այլ անձի  գլխավոր տնօրեն նշանակելու»,- նշեց նա։

Փաստաբանի խոսքով, իրավասու սուբյեկտը տնօրենի փոփոխություններ կատարելու, լիազորություններ դադարեցնելու և  նոր տնօրեն նշանակելու  այս պարագայում տնօրենների խորհուրդն է, որը կայացրել է համապատասխան որոշումը, որը ներկայացվել է ռեգիստրին, օրենքով սահմանված կարգով  պետք է  համապատասխան գրանցման գործընթացը կազմակերպի և իրականացնի։

«Այս պահին գրանցման գործընթացում ենք, կա որոշում, որից հետո համապատասխան փոփոխությունները, համոզված ենք, որ կգրանցվեն»,- ասաց նա։

Հարցին, թե մամուլում լուրեր են շրջանառվում այն մասին, որ նոր տնօրենի  մուտք գործելու պարագայում  հին տնօրենը նախատեսում է  տեխնիկական խափանումներ ապահովել, որպեսզի  բաժանորդները դժգոհեն և բողոքի նոր ալիք սկսվի, նման զարգացման դեպքում ո՞վ է պատասախանատվության կանչելու և ի՞նչ իրավունքներ  ունեն բաժանորդները նման  վիճակում, Գնել Մուղնեցյանն ասաց.

«Նման տեղեկություն չունեմ, որ պարոն  Եսայանը պատրաստվում է նման բան անել։ Ճիշտն ասած, տրամաբանական էլ չեմ համարում, որովհետև  իրավունքի տեսանկյունից անթույլատրելի է. պարոն Եսայանը նաև հանդիսանում է  ընկերության բաժնետեր և եթե, Աստված մի արասցե,  նման բան կատարվի ու հիմնավորվի,  կհանգեցնի  օրենքով սահմանված իրավական սանկցիաների, հետևանքների կիրառման,  որովհետև բաժնետիրական  ընկերությունների  մասին օրենքով հստակ նախատեսված է, որ ընկերության շահերին  հակառակ գործելու և  հակաիրավական արարք կատարելու դեպքում կգործեն համապատասխան  պատասխանատվության կառուցակարգեր։ Անկախ նրանից,  կլինի պարոն Եսայանը, թե մյուս բաժենտերերը կամ խորհրդի անդամները, նրանց համար նախատեսված են  պատասխանատվության հատուկ կանոններ, համապատասխան ընթացակարգերով։

Ինչ վերաբերում է  սպառողների իրավունքների պաշտպանությանը,  որպես այս գործընթացում ներգրաված իրավաբան, վստահեցնում, եմ որ ընկերության անունից հանդես եկող որևէ սուբյեկտ ի պաշտոնե իրականացնելու է  իր պարտականություններ և սպառողներին, իմ կարծիքով, որևէ վտանգ չի սպառնում։ Սպառողներն իրավունք ունեն անխափան ստանալու այն ծառայությունները, որոնք  մատուցում է «Ucom»-ը, շարունակականությունը միանշանակ ապահովվելու է»։

Հարցին, թե ի՞նչ է սպասվում այն աշխատողներին, որոնք ավելի վաղ ազատման դիմում էին գրել, նա պատասխանեց, որ այդ մասով օրենքով սահմանված կարգով համապատասխան որոշում կկայացվի։

«Հայաստանում եթե մարդը ցանկություն չունի աշխատելու, ապա հարկադիր աշխատանքն անթույլատրելի է։ Նրանք իրավունք ունեն օրենքով սահմանված կարգով դիմումները հետ վերցնել, դրանից հետո բազմաթիվ քննարկումներ լինեն գործատուի և աշխատակիցների միջև, կարող են դիմումները համապատասխան համաձայնությամբ մնան անհետևանք կամ աշխատակիցները հեռացվեն աշխատանքից իրենց դիմումի համաձայն։ Գործընթաց է, որն այս պահի դրությամբ իր տրամաբանական ավարտին դեռ չի հասել»,- պատասխանեց Գ. Մուղնեցյանը։

Ինչ վերաբերում է հարցին, որ կողմերը հղում են անում երկու փաստաթղթի՝ տնօրենների խորհրդի որոշման քաղվածքի ու պետռեգիստրի վկայականի վրա, իրավակիրառ պարկտիկայում ինչպե՞ս է, ի՞նչ փաստաթուղթ է պետռեգիստրի վկայականը, փաստաբանն ասաց.

«Գործ ունենք երկու տարաբնույթ փաստաթղթերի հետ. տնօրենների խորհրդի որոշումն այն միակ ու թույլատրելի ապացույցն է, որով հավաստվում է կոնկրետ սուբյեկտի՝ ընկերության գործադիր մարմնի ղեկավար լինելու կամ չլինելու հանգամանքը։ Դրա համար, ըստ կանոնադրության ու ՀՀ օրենքի, այլ փաստաթուղթ գոյություն չունի։ Պետական ռեգիստրի կողմից տրված փաստաթուղթն ընդամենն իրավասու սուբյեկտի որոշման հիման վրա կատարված գրառման վերաբերյալ տեղեկություն է։ Կրկնում եմ, որ գրանցման վարույթը մեկնարկած է, դիմում ենք ներկայացրել պարոն Արա Խաչատրյանի՝ որպես ընկերության նոր տնօրենի անունից։ Գործընթացն ընթացքում է, դրա վերաբերյալ դեռևս վարչական մարմնից ստացած վերջնական վարչական ակտ չունենք»։

Հարցին՝ հիմա հստակ ո՞վ է ընկերության տնօրենը, ինչո՞ւ է Հայկ Եսայանը հայտարարում, որ տնօրենների խորհրդի որոշումն իրավական ուժ չունի, Գ.Մուղնեցյանը պատասխանեց. «Ինչ հիմնավորումներ ունի պարոն Հայկ Եսայանը, ես նման հիմնավորում չեմ լսել ինձ հասանելի տեղեկատվական աղբյուրներից։ Եվ ո՞վ է իրականում տնօրենը, արդեն պատասխանեցի. մեր տեսակետն այն է, որ պարոն Խաչատրյանն այս պահին ընկերության գործադիր մարմնի ղեկավարն է՝ գլխավոր տնօրենը»։

Գ.Մուղենցյանի խոսքով, առկա խնդիրները որևէ կապ չունեն սպառողների հետ, խնդիրն իրավական առումով արդեն իսկ հանգուցալուծված է. «Կա իրավահարաբերություն, որի շրջանակում ամեն իրավասու սուբյետ իր գործառույթն իրականացրել է, այսինքն՝ կա իրավադադարեցնող փաստ Հայկ Եսայանի լիազորությունների մասին և կա իրավաստեղծ փաստ պարոն Արա Խաչատրյանի լիազորությունների ծագման մասին։ Իմ կարծիքով, հանգուցալուծված խնդիր է, տեխնիկական որոշակի խնդիրներ կան ռեգիստրում, դրանք կհանգուցալուծվեն արդեն հանրային իրավական ոլորտում, որն այլ իրավական գործընթաց է»։