Ձեր վստահելի աղբյուրը

Ավելի քան 2000 իսրայելցիներ նախօրեին դուրս էին եկել Թել Ավիվի փողոցներ՝ ցույցեր անցկացնելով ընդդեմ Վարչապետ Բենյամին Նեթանյահուի՝ իր գլխավոր հակառակորդի հետ «արտակարգ իրավիճակի» կառավարություն ձևավորելու փորձերի դեմ և մեղադրելով նրան, որ կորոնավիրուսային ճգնաժամը օգտագործում է կոռուպցիայի մեղադրանքով հետապնդումից խուսափելու համար: Այս մասին գրում է ABC News-ը։

Ցուցարարները դիմակներ էին կրում և հիմնականում հեռավորություն էին պահում միմյանցից՝ կորոնավիրուսային սահմանափակումների կանոններին համապատասխան։ Ցուցարարները քննադատում էին Նեթանյահուի հնարավոր գործընկերությունը մրցակից Բենի Գանցի հետ:

Անցած տարվա երեք ընտրությունների քարոզարշավի ժամանակ Գանցը խոստացել էր, որ երբեք չի նստի բանակցությունների Նեթանյահուի հետ կառավարություն կազմելու համար՝ վերջինիս իրավական խնդիրների պատճառով, անցյալ ամիս հայտարարեց, որ ընդունել է վարչապետի առաջարկությունը՝ ստեղծել «արտակարգ» կառավարություն՝ կորոնավիրուսով զբաղվելու համար: Այս հայտարարությունը զայրացրեց Գանցի կողմնակիցներից շատերին։

Նշվում է, որ Նեթանյահուին մեղադրանք է առաջադրվել խարդախության, արդարադատության խախտման և կաշառքի ընդունման համար: Նա հերքում է մեղադրանքները և ասում, որ ինքը թշնամական լրատվամիջոցների և ագրեսիվ ոստիկանության և դատախազների զոհն է:

Ցուցարարները Նեթանյահուին մեղադրում են ճգնաժամը շահագործելու մեջ` դատական քննությունից խուսափելու և իր երկարատև կառավարումն ամրապնդելու համար:

Ցուցարարները վանկարկում էին «ժողովրդավարություն» և վարչապետին մեղադրում էին երկրի ժողովրդավարական ինստիտուտները վտանգելու մեջ: