Ձեր վստահելի աղբյուրը

Ադրբեջանագետ Անժելա Էլիբեգովան չգիտի, թե ինչու է Ռուսաստանի արտաքին գործերի նախարարն այսօր այդպես ազնվացել Լեռնային Ղարաբաղի խնդրի կարգավորման վերաբերյալ իր հայտարարություններում։ Նա ենթադրում է այսօր նախատեսված ԵԱՀԿ Մինսկի խմբի համանախագահների միջնորդությամբ և մասնակցությամբ Հայաստանի և Ադրբեջանի ԱԳ նախարարների տեսակոնֆերանսին ընդառաջ  որոշ փակագծեր է բացել պրոցեսին մի քիչ թափ հաղորդելու ու ինտենսիվացնելու համար, որը կորոնավիրուսի պատճառով մի քիչ դանդաղել է։

Panorama.am-ի հետ զրույցում նա նշեց, որ Լավրովի հայտարարության համաձայն սեղանին դրված է Լեռնային Ղարաբաղի խնդրի կարգավորման փուլային տարբերակը, ինչն ի սկզբանե, ողջ բանակցային գործընթացում հայկական կողմի համար անընդունելի է, կողմնակից է փաթեթային տարբերակին։

«Կարևոր բան, ինչի մասին փակագծերը բացեց Լավրովն այն է, որ, փաստորեն, տարածքներ տնտեսական և լոգիստիկ հնարավորությունների դիմաց առաջարկն է քննարկվում։ Սա Ադրբեջանի գլխավոր թեզերից մեկն է, որ վերջին երկու տարում շրջանառում ու տարբեր մակարդակներում իրենք բարձրաձայնում են։ Իսկ ինչ է այդ թեզի հիմքում դրված. Հայաստանը դուրս է բերում զորքերն ու Ադրբեջանին անցնում է  որոշ շրջաններ, ինչի դիմաց դեբլոկադայի է ենթարկվում ու հնարավորություն է ստանում  օգտվել տարածաշրջանում ադրբեջանական կոմունիկացիաներից։ Վստահաբար, Ադրեջանը որևէ երաշխիք չի տալիս, որ խոստումը պահելու է»,- ասաց Ա.Էլիբեգովան։

Ադրբեջանագետի խոսքով, փաստացի այդ թեզը, առաջարկն ինտենսիվորեն շրջանառվում է վերջին երկու տարիներին, մինչ այդ այդ առաջարկը նույնպես հնչել էր, բայց տարբերությունն այն է, որ հեռատեսական չէր համարվում փորձել հայկական կողմի վրա հոգեբանական ճնշում գործադրել, տնտեսական բարիքներ խոստանալ հողերի դիմաց, հետևաբար առաջ հռետորաբանությունն այլ էր, բացեինաց սպառնում էին պատերազմով։

«Փաստացի Լավրովն այսօր մեզ համար բացահայտեց նոր իրողություն, որ սեղանի շուրջ կոնկրետ ձևով քննարկվում է նման առաջարկ։ Հայաստանի արտաքին գործերի նախարար Զոհրապ Մնացականյանն իր պատասխանում փաստացի չհերքեց, որ նման բան քննարկվում է, փորձեց  ներկայացնել հայկական կողմից դիրքորոշումն այդ ամեն ինչի վերաբերյալ, թե ինչ է հայկական կողմը սպասում արդյունքում։

Փաստացի, հստակ հերքում չստացանք՝ արդյոք փուլային տարբերակ կա սեղանին դրված, թե ոչ, արդյոք ադրբեջանական կողմի առաջարկն ընդունվել է Մինսկի համանախագահների կողմից ու դրված է  սեղանին քննարկման։ Երրորդ,  չլսեցինք՝ իսկ հայկական կողմի առաջարկը, որը Մնացականյանը բնութագրում է  որպես անվտանգություն և ստատուս, բանակցային սեղանի շուրջ ինչպես է ներկայացվել և եթե ներկայացվել է, ինչու Լավրովն այդ մասին չի խոսում։ Մի քանի բաց հարցեր մնացին, որոնց Հայաստանի արտաքին գործերի նախարարը որևէ հստակ պատասախան չտվեց»,- ասաց Ա. Էլիբեգովան։

Նա ընդգծեց, որ այդպես էլ անհասկանալի է մնում, «եթե երկու տարի է մեզ ասում են բանկացություններ չեն ընթանում և սեղանին փաստաթուղթ չկա, ապա ինչի մասին  է խոսում Լավրովը»։

«Ամենակարևորը՝ ով է մեզ ստում․ եթե ստում է  Լավրովը, մեզ պետք է բացատրեն, թե ինչու է  Մինսկի խմբի համանախագահ պետության արտաքին գործերի նախարար Սերգեյ Լավրովը ստում, եթե չի ստում, մեզ պետք է բացատրեն, թե ինչու ենք շարունակում նման պայմաններում բանակցային գործընթացի մաս լինել։ 

Մեր արտաքին գործերի նախարարը պնդում է, որ հանրությունից որևէ բան չեն թաքցնում ու պրոցեսը թափանցիկ է, բայց եթե Ռուսաստանի արտգործնախարարն  ասում է, որ կա ինչ-որ քննարկվող փաստաթուղթ և բանակցում է առնվազն Հայաստանը, Զոհրապ Մնացականյանն էլ փաստացի իր խոսքում դրա մասին ասաց, որ հայկական կողմերից մեկը՝ Հայաստանը, իր մասով իր պարտավորությունները կատարում է բանակցային գործընթացում, դրանից ենթադրում եմ, որ հանրությանն  այս երկու տարում բանակցային գործընթացի մասին լիարժեք,  ամբողջական ինֆորմացիան չի հաղորդվել։

Պարբերաբար մանրամասներ ենք իմանում, որոնց լիարժեք հերքում ԱԳՆ-ից չենք ստանում, ստանում ենք մեր դիրքորոշման ևս մեկ անգամ հիշեցում, բայց հերքում, որպես այդպիսին, լիարժեք չի հնչում, նաև նոր տերմինաբանության բացատրություն չի հնչում, որը պարբերաբար արտաքին գործերի նախարարությունը ներդնում է  իր մեկնաբանություններում ու հաղորդագրություններում»,- ասաց ադրբեջանագետը։

Հետաքրքրվեցինք, թե ի՞նչ կարելի է ակնկալել Հայաստանի ու Ադրբեջանի ԱԳ նախարարների այսօրվա տեսակոնֆերանսից, Ա. Էլիբեգովան ասաց. «Կարծում եմ՝ բավականին բարդ զրույց է սպասվում։ Հաշվի առնելով Լավրովի «արտահոսքը»՝ բավականին նյարդային պրոցես է մեզ բոլորիս սպասվում ու բավականին հակասական»։