Ձեր վստահելի աղբյուրը

«Փաշինյանն ունի երկու տարբերակ, կամ պետք է գնա և փորձի տնտեսությունն աղետից հանել, կամ էլ՝ պետք է պոպուլիզմով զբաղվի»,- այսօր լրագրողների հետ զրույցում ասաց քաղաքական մեկնաբան Մենուա Հարությունյանը՝ անդրադառնալով ՀՀ-ում՝ կորոնավիրուսով պայմանավորված իրավիճակին։

Նրա խոսքով, քանի որ ՀՀ վարչապետը չունի պոտենցիալ՝ այս իրավիճակում տնտեսությունը ճգնաժամից հանելու, հետևաբար նրան մնում է իշխանության երեք ճյուղերը բռնազավթելուց հետո չորրորդ իշխանությունը ևս բռնազավթելու. «Հիմա առաջին մեսիջն արդեն եղավ, քանի որ նա ասաց, որ խմբագիրները 99%-ով կոռումպացված սրիկաներ են։ Այսինքն՝ բացի իրենից, լրատվական դաշտում բոլորը վատն են ու կաշառակեր։ Ինքը մի կողմից փորձում է լրատվական դաշտում վախի մթնոլորտ ստեղծել, և մյուս կողմից, ժողովրդի՝ իրեն հավատացող հատվածին ասում է՝ ես ձեզ հաց չեմ կարող տալ, հիվանդներին չեմ կարող բուժել, բայց տեսարան կապահովեմ՝ կգնամ նախկին թալանչի, գող ավազակներից թալանածը հետ կբերեմ»։

Հարությունյանը շեշտեց, որ անգամ համաճարակի ընթացքում Փաշինյանը չգնաց էլիտան և հասարակությունը միավորելու ճանապարհով, ինչը, ըստ նրա, լուրջ խնդիր է։

Փաստաբան Ալեքսանդր Կոչուբաևը, անդրադառնալով վարչապետ Փաշինյանի վերջին ուղերձին, նշեց, որ Փաշինյանը նման էր մի գործչի, ում մոտ ճամպրուկային տրամադրություն էր, ով հեռանում էր՝ այս երկու տարվա ընթացքում երկրի բոլոր խնդիրները կրկին գցելով այլ քաղաքական ուժերի վրա։

«Մեր հասարակության հատուկ ուշադրությունն ուզում եմ հրավիրել այն դրվագի վրա, որ Փաշինյանը նշեց, թե Հայաստանում սպանություններ ու ահաբեկչություններ չկան։ Բայց ուզում եմ հիշեցնել՝ ինչ ռեպրեսիաներ են իրականացվում փաստաբանների նկատմամբ, և չպետք է մոռանանք, որ թավշյա իրականության մեջ վեց ամսվա ընթացքում մենք ունեցանք երեք գեներալների սպանություն, թեև դեպքերը ինքնասպանություններով քողարկվեցին»,- ներկայացրեց  Կոչուբաևը։

Նրա բնորոշմամբ, վարչապետի՝ որպես երկրի մենեջեր, հայտարարությունը հեռացող մարդու հայտարարության էր նման.

«Ըստ մեր վարչապետի, երկրի մամուլի 99%-ը  և լրագրողների 70%-ը կոռումպացված են և նախկինում սնվում էին պետական ապարատից և պետական փողերից, իսկ այսօր այդ հնարավորությունը չունեն»։

Անդրադառնալով երկրի դատական համակարգի մասին Փաշինյանի հայտարարությանը՝ Կոչուբաևը շեշտեց, որ իրեն հատկապես ապշեցրել է երկրի ղեկավարի որակումը՝ կապված ՍԴ-ի հետ, թե այն կորոնավիուսային դատարան է։

«Շատ եմ ցավում, որ մեր երկրի ղեկավարն այդպես էլ չկարողացավ դուրս գալ լրագրողի կերպարից, և իր հանրային գործունեության մեջ, երկրի ղեկավարման մեջ էլ առաջնորդվում է լրագրողական սկզբունքներով, այսինքն՝ իր խոսքն առավել գեղեցկացնում է տարբեր տերմիններով, սակայն երկրի գործադիր իշխանության ղեկավարի կողմից այդպիսի որակումը մեկ այլ իշխանության նկատմամբ, կարծում եմ՝ լրջագույն խնդիր է իշխանությունների տարանջատման տեսանկյունից»,- ասաց Կոչուբաևը։

Իրավական տեսանկյունից մեկնաբանելով վարչապետի խոսքը՝ փաստաբանը նշեց, որ շարունակվում են աննախադեպ ճնշումները ՍԴ-ի նկատմամբ, «վնգստացող» դատավորների թեզի շրջանառմամբ կրկին փորձ է արվում մյուս դատավորներին ևս կաղապարելու և հիշեցնելու, որ նրանք ևս կհամարվեն «վնգստացող» դատավորներ և կմեկուսացվեն։

«Նաև պետք է պատկերացնել, որ այս թեզի շրջանառմամբ փորձ է արվելու նաև անցանկալի դատավորներին հեռացնելու։ Նաև շարունակվում է միջամտությունը դատական համակարգին։ Եվ վերջապես, շարունակվում են ճնշումները ԶԼՄ-ների նկատմամբ և առաջանում են կարծիքի ազատ արտահայտման խոչընդոտներ։ Կարծում եմ, որ միջազգային իրավապաշտպան կառույցները շուտով կանդրադառնան այդ հայտարարությանը և Հայաստանի միջազգային վարկը ևս մեկ աստիճանով նահանջ կապրի»,- եզրափակեց խոսքը փաստաբանը։