Ձեր վստահելի աղբյուրը

Ապրիլի 21-ին Հայաստանի և Ադրբեջանի ԱԳ նախարարներ Զոհրաբ Մնացականյանի և Էլմար Մամեդյարովի, է ԵԱՀԿ Մինսկի խմբի համանախագահների և ԵԱՀԿ գործող նախագահի անձնական ներկայացուցչի մասնակցությամբ տեսակոնֆերանսի արդյունքում ընդունվել է համատեղ հայտարարություն։ Այս մասին տեղեկանում ենք ԵԱՀԿ կայքից։

Հայտարարության մեջ ասվում է, որ մարտի կեսերից սկսած Հայաստանի և Ադրբեջանի արտգործնախարարները և ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա), Էնդրյու Շոֆերը (ԱՄՆ) հաճախակի խորհրդակցություններ են անցկացրել հեռակա կարգով՝ ներառյալ ապրիլի 21-ի համատեղ տեսակոնֆերանսը, որին մասնակցել է նաև ԵԱՀԿ գործող նախագահի անձնական ներկայացուցիչ Անջեյ Կասպրչիկը:

«Խորհրդակցությունների ընթացքում մասնակիցները քննարկեցին գլոբալ առողջապահական ճգնաժամի ազդեցությունը տարածաշրջանի վրա և վերջին զարգացումները տեղում: Նրանք նաև դիտարկել են ղարաբաղյան հիմնախնդրի կարգավորման գործընթացում իրականացվող հաջորդ քայլերը՝ համաձայն 2020 թվականի հունվարի 30-ին Ժնևում արված իրենց համատեղ հայտարարության:

Ընդունվեց, որ COVID-19 համաճարակի հետևանքով առաջացած արտառոց իրավիճակի պատճառով հետաձգվել է նախկինում համաձայնեցված մարդասիրական միջոցառումների իրականացումը: Հետաձգվել են նաև դեմ առ դեմ նախարարների հանդիպումներն ու համանախագահների այցերը տարածաշրջան՝ համաձայնեցված Ժնևում: Այնուամենայնիվ, այս գործունեությունը նախապատրաստելու համար անհրաժեշտ աշխատանքները շարունակվում են:

Համանախագահներն ընդգծել են հրադադարի ռեժիմը խստորեն պահպանելու և ներկայիս միջավայրում սադրիչ գործողություններից զերծ մնալու կարևորությունը և կողմերին կոչ են արել միջոցներ ձեռնարկել՝ լարվածության հետագա նվազեցման ուղղությամբ: Նրանք նաև շնորհակալություն են հայտնել ներկայիս պայմաններում ԵԱՀԿ գործող նախագահի անձնական ներկայացուցչի շարունակական աշխատանքի համար և շեշտել են մոնիտորինգի հնարավորինս արագ վերսկսման անհրաժեշտությունը:

Հաշվի առնելով այն մեծ մարտահրավերները, որոնց այժմ բախվում է ամբողջ բնակչությունը՝ անկախ քաղաքական սահմաններից, և որոնք ծառայում են որպես խիստ հիշեցումներ մարդկային յուրաքանչյուր կյանքի թանկ լինելու մասին, արտաքին գործերի նախարարներն ու համանախագահները հույս են հայտնել, որ գլոբալ համաճարակին ի պատասխան ցուցաբերված վճռականությունը կբերի նոր ստեղծագործ ու կառուցողական խթան խաղաղ գործընթացին։

Համանախագահները ուշադրություն են հրավիրել մարտի 23-ին ՄԱԿ-ի Գլխավոր քարտուղարի` առողջապահական ներկայիս ճգնաժամի ընթացքում գլոբալ հրադադարի պահպանման կոչին ու  համանախագահների մարտի 19-ի հայտարարությանը»,-ասվում է համատեղ հայտարարության մեջ: