Ձեր վստահելի աղբյուրը

«Առաջարկում ենք հարկային պարտավորությունների չկատարման համար նախատեսված տույժերը կրկնակի նվազեցնել»,- խորհրդարանում ասաց ԱԺ «Բարգավաճ Հայաստան» խմբակցության պատգամավոր Միքայել Մելքումյանը՝ ներկայացնելով «ՀՀ հարկային օրենսգրքում փոփոխություններ և լրացում անելու մասին» օրենքի նախագիծը։

Պատգամավորը նշեց, որ ներկայումս հարկային պարտավորությունների չկատարման դեպքում կիրառվում է այդ հարկային պատրավորության 0.0075% -ի չափով տույժ, իսկ հիմա առաջարկվում է կրկնակի նվազեցնել այդ տույժի չափը՝ հասցնելով այն 0.004%-ի։

«Եթե տարեկան կտրվածքով այդ տույժը 27%-ից ավելի է, ապա առաջարկվող սահմանագիծը 14.6% է»,- ասաց Մ. Մելքումյանը։

Բացի այդ, պատգամավորի խոսքով, առաջարկվում է նաև 1.5 մլն դրամից ավելի հարկային պարտավորության դեպքում տնտեսվարողի գույքի վրա արգելանք դնել։ 

Ներկայում գործող կարգավորմամբ, եթե 500 հազար դրամից ավելի հարկային պարտավորություն է կուտակում տնտեսվարողը, ապա հարկային մարմնի ղեկավարը կարող է արգելանք դնելու որոշում ընդունել. «9813 տնտեսվարող սուբյեկտ այս արգելադրման տակ է եղել վերջին 2.5 տարվա ընթացքում։ Այսինքն՝ տնտեսվարողների 10%-ը»։

ԱԺ «Լուսավոր Հայաստան» խմբակցության պատգամավոր Մանե Թանդիլյանը նշեց, որ տույժերը որոշ ժամանակահատվածի համար պետք է ընդհանրապես չհաշվարկել։

«Մենք, այդ թվում և կառավարությունը՝ առաջին դեմքի մակարդակով, բանկերին և վարկային կազմակերպություններին  հորդորում, կոչ ենք անում չհաշվարկել այդ տույժերը, կամ վճարումները հետաձգել, կամ սև ցուցակ չգցել։ Հիմա ինչպե՞ս է ստացվում, որ մենք առևտրային կազմակերպություններին հորդորում ենք անել նմանատիպ քայլեր, իսկ մեր կառավարությունը տույժերը նվազեցնում է, բայց շարունակում է հաշվարկել։ Ես կարծում եմ՝ մենք պետք է պնդենք, որ չվճարված հարկերի համար տույժերն ուղղակի չհաշվարկվեն»,- ասաց Մ. Թանդիլյանը։

Արձագանքելով՝ Մ. Մելքումյանը տեղեկացրեց, որ այդ տույժերը հաշվարկվում են հարկային պարտավորության գումարի չափով. «Այսինքն՝ Դուք առաջարկում եք, որ օրինակ, նախքան մարտի 13-ը կիրառված տույժերը մարտի 13-ից կանգնեցնե՞ն, և մի քանի ամիս հետո, երբ այս իրավիճակն անցնի, նորից սկսվեն հաշվարկվե՞լ»։

Մ. Թանդիլյանն էլ ասաց՝ այո։

«Մարտի 13-ից մենք արտակարգ դրություն ենք հայտարարել։ Այդ պահից սկսած շրջանառվող դրամական միջոցները նվազել են, և նույնիսկ հայտարարագրված հարկային պարտավորությունների համար վճարման միջոցներ չեն եղել։ Հետևաբար միջոց չունեցող տնտեսվարողի տույժերը արտակարգ դրության հայտարարման պահից մինչ դրա ավարտը պետք է զրոյացվեն, ապա դրանից հետո Ձեր առաջարկած տարբերակով հաշվարկվեն»,- նշեց Մ. Թանդիլյանը։