Ձեր վստահելի աղբյուրը

«Ջանք ու եռանդ չի խնայվել, որպեսզի ամբողջ հայությունը կարողանա իր սիմվոլիկ ներկայությունը ապահովել Ծիծեռնակաբերդում»,- այսօր լրագրողների հետ զրույցում ասաց ԿԳՄՍ նախարարի տեղակալ Արա Խզմալյանը՝ անդրադառնալով ապրիլի 24-ի միջոցառումներին։ 

Նրա խոսքով, ցեղասպանության նահատակների հանդեպ մեծագույն հարգանքն այս դեպքում յուրաքանչյուր քաղաքացու անվտանգության ապահովմամբ է դրսևորվելու.

«Մեր կարգախոսն է՝ հարգենք հիշատակը՝ հարգելով կյանքը»։

Ա. Խզմալյանը տեղեկացրեց, որ այսօր 21.00-ին մեկնարկում են միջոցառումները, այդ ժամին Հայաստանի բոլոր եկեղեցիների զանգերի ղողանջի ներքո կմարեն Երևանի և մյուս քաղաքների լույսերը։ Նա կոչ արեց քաղաքացիներին այդ ժամին մարել նաև բնակարանների լույսերը։

«Որպես միասնության խորհրդանիշ՝ բջջային հեռախոսների լույսերի ներքո, պատուհաններից և պատշգամբներից մարդիկ կարող են հաստատել իրենց խորհրդանշական ներկայությունը Ծիծեռնակաբերդում։ Հարգանքի այս տուրքը մենք անվանել ենք Լուսավառ ոգեկոչման պահ, և երբ մենք մեր հայացքը սևեռենք դեպի Ծիծեռնակաբերդի բարձունք, այնտեղից կտեսնենք արձագանքը։ Եվ այսօրվա միջոցառումները կփորձենք ամփոփել հենց այս տրամաբանության մեջ»,- ներկայացրեց Ա. Խզմալյանը։

Նրա խոսքով, վաղը Ծիծեռնակաբերդի հուշահամալիր այցելելու են միայն ՀՀ վարչապետը, ՀՀ նախագահը, ԱԺ նախագահը, Արցախի Հանրապետության նախագահը և Վեհափառ Հայրապետը։ Իսկ  22.00-ից մինչև 06.00-ն տեղի կունենա գեղարվեստական ծրագիր, որով, ըստ էության, մեր ստեղծագործական հանրությունն ամբողջ ժողովրդի անունից իր հարգանքի տուրքը կմատուցի ցեղասպանության զոհերի հիշատակին՝ երաժշտական կատարումների միջոցով։

Երևանի փոխքաղաքապետ Տիգրան Վիրաբյանն էլ տեղեկացրեց, որ ստեղծված իրավիճակում փորձ է արվել գտնելու լավագույն լուծումը։

«Առավոտյան 08.00-ից ՀՀ քաղաքացիները և Արցախի մեր հայրենակիցները կարող են 1915 կարճ համարին ուղարկել հաղորդագրություն և արդեն երեկոյան Ծիծեռնակաբերդի սյուներին լուսապատկերի միջոցով կտեսնեն իրենց անուն-ազգանունը, և այսպես կխորհրդանշեն իրենց մասնակցությունը։ Առավել քան վստահ եմ՝ մենք հարյուր հազարավոր անուններ կունենանք Ծիծեռնակաբերդի սյուներին։

Իսկ Սփյուռքի մեր հայրենակիցները կարող են հաղորդագրություն ուղարկել (00374) 33-19-15-00  համարին։ Յուրաքանչյուր հեռախոսահամարից հնարավորություն կա ուղարկելու ընդամենը հինգ անուն-ազգանուն։ Ցանկալի է, որ այդ անունները լինեն հայատառ։ Մենք բանակցել ենք օպերատորների հետ, և հաղորդագրությունների արժեքը կլինի սիմվոլիկ 1 դրամ»,- ներկայացրեց Տիգրան Վիրաբյանը։

Նա շեշտեց, որ Ծիծեռնակաբերդում առաջին անգամ մոտ 11 ժամ տևողությամբ համերգ է լինելու։ Նախատեսվում է շուրջ 68 ելույթ՝ 160 մասնակիցների կողմից։

Ա. Խզմալյանն էլ հավելեց՝ առավելագույնը հինգ հոգուց բաղկացած խմբեր են լինելու, որոնք տարբեր ժամերի են ելույթ ունենալու։

Բանախոսները պատասխանեցին նաև լրագրողների հարցերին։

Հարց. Ինչպե՞ս եք պատկերացնում արտակարգ իրավիճակի պայմաններում երեխաների առցանց մասնակցությունը Հայոց ցեղասպանության 105-րդ տարելիցի միջոցառումներին։

Ա. Խզմալյան. Ես կարծում եմ, որ Հայոց ցեղասպանության թեման այնքան բարդ և ողբերգական է, որ չի կարող ընդգրկել անչափահասներին այս ծրագրում։ Ես միշտ այն մտքին եմ եղել, որ սա նախ և առաջ գիտակից, չափահաս անձանց լուծելիք խնդիրն է։ Անչափահասների համար Հայոց ցեղասպանության վերաբերյալ գիտելիքների ապահովումը օրերի և ժամերի քննարկման խնդիր չէ։

Հարց. Կարո՞ղ են կազմակերպությունները ծաղկեպսակներ տանել Ծիծեռնակաբերդի հուշահամալիր, եթե այո, ապա ո՞ւմ պետք է փոխանցել։

Ա. Խզմալյան. Արտոնություններ ու բացառություններ եթե լինեն, ապա հետագա իրավիճակը կդառնա անվերահսկելի։ Հետևաբար, հորդորում ենք ուղղակի հասկանալ ստեղծված բարդ իրավիճակը և մնալ տանը, հետևել հեռարձակվող հաղորդումներին ու հարցազրույցներին, իրականացնել այն ակցիաները, որոնք համատեղ մտածել ենք։ Հնարավորինս պետք է կասեցնել տնից դուրս գալու հանգամանքը և շփումը։