Ձեր վստահելի աղբյուրը

«2020 թվականին իրական ՀՆԱ-ն կնվազի շուրջ 2 տոկոսով»,- այսօր կառավարությունում հայտարարել է ֆինանսների նախարար Ատոմ Ջանջուղազյանը, ներկայացնելով «Հայաստանի Հանրապետության 2020 թվականի պետական բյուջեի մասին»  օրենքում փոփոխություններ կատարելու կառավարության օրենքի նախգիծը:

Ըստ կառավարության հիմնավորման, այն հետևանքն է Հայաստանի տնտեսությունում ներկայում կիրառվող սահմանափակումների և արտաքին աշխարհից ներթափանցող ռիսկերի, ինչպես նաև ՀՀ կառավարության կողմից այդ զարգացումներին հակազդելու համար կիրառվող 150 մլրդ աջակցության փաթեթների տրամադրման:

Հիմնավորումն ընթերցող ֆինանսների նախարարը նկատեց, որ տնտեսական անկման պայմաններում, գնահատվել է, որ 2020թ.-ին հարկային եկամուտները պետական բյուջեի սցենարի համեմատ կնվազեն մոտ 169.1 մլրդ դրամով:

Արդյունքում, անփոփոխ պահելով ծախսերի մակարդակը և ներառելով 150 մլրդ դրամ տնտեսության օժանդակության փաթեթները, պետական բյուջեի պակասուրդը կաճի՝ հասնելով ՀՆԱ-ում 5.0%-ի, իսկ պետական բյուջեի լրացուցիչ ֆինանսավորման կարիքը կկազմի շուրջ 260 մլրդ դրամ։

Նախագծով ԱԺ-ին առաջարկվում է թույլատրել ՀՀ կառավարությանը Չինաստանում բռնկված Կորոնավիրուսային վարակի դեմ պայքարի, հիվանդության հետևանքների չեզոքացման և վերացման նպատակով փոփոխություններ կատարել Հայաստանի Հանրապետության 2020 թվականի պետական բյուջեում՝ ապահովելով հիվանդության դեմ պայքարի համար անհրաժեշտ գործիքակազմով:

Կառավարության ներկայացրած հիմնավորման մեջ ասվում է.

«Հայաստանի վրա Արտաքին զարգացումների ազդեցությունը գնահատվել է հետևյալ հնարավոր ուղղություններով.

- Արտահանման հավանական կորուստներ (համաշխարհային մետաղակական և ոչ մետաղական գների և արտաքին պահանջարկի նվազման հետևանքով),
- Դրամական փոխանցումների ներհոսքի հավանական կորուստներ (ՌԴ-ում տնտեսական աճի նվազմամբ պայմանավորված աշխատողների դրամական եկամուտների կրճատման, ռուսական ռուբլու արժեզրկման, ինչպես նաև ՌԴ սահմանների փակման հետևանքով),
- Զբոսաշրջության հավանական կարուստներ (կորոնովիրուսի տարածման բացասական հետևանքներից խուսափելու նպատակով միջազգալին զբոսաշրջիկների թվի կրճատման և տարատեսակ միջոցառումների հետաձգման հետևանքով),
- Ռուսական ռուբլու արժեզրկմամբ պայմանավորված հայկական շուկայում ռուսական ապրանքների էժանացման հետևանքով ՀՀ ներմուծման ծավալների աճի հաշվին հնարավոր կորուստներ (ՌԴ գնաճի վերաբերյալ գնահատականների բացակայությամբ պայմանավորված այդ գործոնը հաշվի չի առնվել):
- Ներմուծման կրճատման ՀՆԱ-ի վրա դրական ազդեցությունը (նավթի համաշխարհային գների նվազման ազդեցությունըՀՀ տնտեսության վրա սկսել է առարկայանալ՝ նավթի մանրածախ գների անկման տեսքով):»

Մարտահրավերներին դիմակայելու համար կառավարության ընդունած ծրագրով նախատեսել է 150 մլրդ դրամ սոցիալ տնտեսական աջակցության փաթեթ հետևյալ հիմնական ուղղություններով՝

• 25 մլրդ դրամ՝ ձեռնարկություններին աջակցության ծրագրեր, որոնք ուղղված են ընթացիկ իրացվելիության խնդիրների լուծմանը,
• 25 մլրդ դրամ՝ սոցիալական աջակցության ծրագրեր,
• 80մլրդ դրամ՝ տնտեսական երկարաժամկետ զարգացմանն ուղղված ծրագրեր,
• 20 մլրդ դրամ՝ պահուստային միջոցներ անհրաժեշտ վերաբաշխումներ իրականացնելու համար:

Ըստ փաստաթղթի, կորոնավիրուսի տնտեսական հետևանքների հակազդման միջոցառումների համապարփակ ծրագրի իրականացումն ապահովելու համար անհրաժեշտ է ՀՀ կառավարությանն օժտել Հայաստանի Հանրապետության 2020 թվականի պետական բյուջեում փոփոխություններ կատարելու իրավասությամբ: