Ձեր վստահելի աղբյուրը

«Հարկային պարտավորությունները չկատարելու համար տույժերը ապրիլի 21-ից սկսած հաշվարկվելու են 0.004%-ով՝ նախկին 0.075%-ի փոխարեն»,- այսօր լրագրողների հետ զրույցում ասաց ՊԵԿ նախագահ Դավիթ Անանյանը։

Վերջինիս խոսքով, այս փոփոխությունը բավականին լուրջ դրական ազդեցություն կունենա տնտեսվարողների համար։ Նա տեղեկացրեց, որ եթե հարկ վճարողն ունի չկատարված հարկային պարտավորություն, որը չի գերազանցում 200 հազար դրամը, ապա տվյալ հարկային պարտավորության նկատմամբ չի հարուցվում վարչական վարույթ, իսկ եթե այդ պարտավորությունը չի գերազանցում 1.5 մլն դրամը, ապա գույքի արգելանքի կիրառման գործառույթներ չեն իրականացվում։

«Եթե հաշենք, կտեսնենք, որ 0.075% դրույքաչափի պարագայում տարեկան հաշվարկով 27.7% տույժ էր նախատեսվում, իսկ այս կարգավորմամբ մենք ստանում ենք 14.6%»,- ներկայացրեց Դ. Անանյանը։

ՊԵԿ նախագահը տեղեկացրեց, որ ավտոմատացված համակարգերում համապատասխան ծրագրային փոփոխություններ դեռևս չեն իրականացվել, սակայն դա մոտակա 1.5  ամսվա ընթացքում կարվի.

«Այս պահին անձնական հաշվի քարտերում տույժերը կհաշվարկվեն 0.075 դրույքաչափով, բայց ծրագրային փոփոխություններից հետո վերահաշվարկ կարվի»։

ՊԵԿ նախագահը պատասխանեց նաև լրագրողների հարցերին։

Հարց. Տնտեսվարողներից շատերը հաշվետվություններ ներկայացնելիս սխալ են նշել տնտեսական գործունեության դասակարգիչը, ինչի պատճառով դուրս են մնացել տնտեսական աջակցության ծրագրերից։ Արդյո՞ք կարող են փոփոխել տնտեսական գործունեության դասիչը։

Դ. Անանյան. Դա կառավարության 8-րդ միջոցառմանն առնչվող խնդիր է, որի վերաբերյալ մենք էլի ունենք ահազանգեր։ Բայց կառավարության այսօրվա որոշմամբ նախատեսվում է, որ 2020 թվականի ապրիլի 1-ի դրությամբ հայտարարված գործունեության տեսակների դասակարգչով է որակվելու այս կամ այն տնտեսվարողը։ Բազմաթիվ են այն դեպքերը, երբ մենք ահազանգ ենք ստանում, և մեր տնտեսվարողները, ըստ երևույթին, այդքան էլ լուրջ չեն վերաբերվել իրենց գործունեության տեսակը ճիշտ ներկայացնելու օրենսդրական պահանջին, և այսօր ունեն այդպիսի խնդիրներ։ Այժմ հարցը քննարկում ենք, և այն դիտարկվում է բոլոր տեսանկյուններից։

Հարց. Արդյո՞ք հարկային արտոնություններ կտրվեն մանրածախ առևտրով  զբաղվող տնտեսվարողներին, այսինքն՝ նրանց, ովքեր այս ընթացքում չեն աշխատել, եթե այո, ապա ի՞նչ ընթացակարգ կսահմանվի։

Դ. Անանյան. Այն կազմակերպությունները, որոնք չեն աշխատել, չեն ունենալու հարկային պարտավորություններ։ Իսկ կառավարությունում հարկերի չեղարկման, կասեցման կամ ներման հարց այսօր չենք քննարկում։ Կարող են քննարկվել հարկային արձակուրդներ տրամադրելու միջոցառումներ։ Ոչինչ բացառել պետք չէ, և հարկային արձակուրդների թեմա կարող է քննարկվել՝ ելնելով դեպքերի զարգացումից։ 

Հարց. Ներգնա զբոսաշրջային ընկերությունները, որոնք այս պահին ունեն 0 եկամուտ,  տարվա առաջին եռամսյակի համար պարտավոր են հարկային կանխավճար անել՝ նախորդ տարի վճարած հարկերի 20%-ի չափով։ Արդյո՞ք քննարկվում է այս հարցը, ինչո՞ւ կառավարությունը չի վերանայում այս պահանջը։

Դ. Անանյան. Հավանաբար խոսքը շահութահարկի կանխավճարի մասին է։ Օրենսդրությամբ կա հնարավորություն, որ հարկ վճարողները մինչև այս տարվա մարտի 20-ը կարող էին ներկայացնել հայտարարություն և օգտվել շահութահարկի կանխավճարների այլընտրանքային եղանակից, որը ենթադրում է նախորդ եռամսյակի շրջանառության 2%-ի չափով կանխավճար։ Կարծում եմ, որ նրանք պետք է օգտվեին այդպիսի հնարավորությունից, որովհետև մարտի 1-ից մենք արդեն ունեինք կորոնավիրուսով առաջին վարակվածը, և արդեն մարտի 14-ին ունեինք արտակագ դրության հայտարարում, հետևաբար մարտի 1-ից մինչև ամսվա կեսերը տնտեսվարողները կարող էին որոշակի գնահատականներ ունենալ։ Այսօր կանխավճարների տարկետման կամ երկարաձգման հարցեր օրակարգում չկան։

Հարց. Այս տարվա բյուջեի կատարողականը նախորդ տարվա համեմատ ի՞նչ արդյունք է գրանցել։

Դ. Անանյան. Այս տարվա առաջին եռամսյակում պետական բյուջեի փաստացի կատարողականը կազմել է 349  մլրդ՝ նախորդ տարվա 299.5 միլիարդի համեմատ։ Այիսնքն՝ 49.5 մլրդով ավելի է եղել այս տարի։ Նշեմ նաև, որ նախատեսված էր 340 միլիարդ, իսկ մենք 9 մլրդով ավելի ենք կատարել առաջին եռամսյակի համար հաստատված ցուցանիշից։

Հարց. Արտակարգ դրության օրերին որքանո՞վ է պակասել գրանցված աշխատողների թիվը։

Դ. Անանյան. Մարտ ամսվա տվյալներով, փետրվար ամսվա համեմատ արձանագրվել է աշխատատեղերի աճ, այլ ոչ թե նվազում։ Շուրջ 3800 նոր աշխատող է գրանցվել։ 619, 900 աշխատատեղ հայտարարագրվել է մարտ ամսվա համար, իսկ 616, 200  աշխատատեղ հայտարարագրվել էր փետրվար ամսին։