Ձեր վստահելի աղբյուրը

«380 մլրդ դրամի են հասել գանձապետական համակարգում հավաքված գումարները»,- այսօր ԱԺ-ում հայտարարեց «Լուսավոր Հայաստան» խմբակցության անդամ Մանե Թանդիլյանը և հայտնեց, որ  այդ գումարները, նրանցից հավաքվող տոկոսադրուքները կառավարությանն են պատկանում և կարելի է այդ միջոցներից օժանդակություն տրամադրել կարիքավոր բնակչությանը:

Պատգամավորը վստահեցրեց, որ ԱԺ-ում կարելի է քննարկել, թե ինչ չափի գումարներ է հնարավոր հատկացնել գանձապետարանից, բայց սխալ են իշխանական պատգամավորների պնդումները, թե այդ գումարներն ընդհանրապես չի կարելի ծախսել և ընդդիմությունը մանիպուլյացիայով է զբաղվում:

Անդրադառնալով «Հայաստանի Հանրապետության 2020 թվականի պետական բյուջեի մասին» օրենքում փոփոխություն և լրացումներ կատարելու մասին օրինագծին՝ Մանե Թանդիլյանը հայտարարեց, որ անգամ արտակարգ դրության պայմաններում կառավարությանը չպետք է տրվի առանց ԱԺ-ի իմացության բյուջեի գումարները տեղաբաշխելու և ծրագրեր իրականացնելու անսահման հնարավորություն: 

Ըստ պատգամավորի, նախագծով նախատեսված 160 մլրդ դրամին ավելցվել է պակասորդը և միջոցները հասցվել են մինչև 324 մլիարդի: Այդ սահմաններում կառարավությունը կարող է կատարել միջծրագրային փոփոխություններ առանց սահմանափակման:
Համաձայնելով Ատոմ Ջանջուղազյանի պնդման հետ, որ դրանք պետք է իրականացվեն համաճարակի շրջանակներում՝ պատգամավորը համուզմունք հայտնեց, որ գործնականում յուրաքանչյուր միջոցառում կարող է կորոնավիրուսի հետ կապվել:

«Արտակարգ դրությունը կավարտվի, բայց կարգավորումը կմնա և կառավարությունը մինչև տարվա վերջ ինչ կուզի կանի, և բարեկամաբար կբացատրի ձեզ՝ իշխանական պատգամավորներիդ: Մենք՝ որպես ընդդիմություն պետք է համոզվենք, որ  չեն լինի միջոցառումներ, որոնք կապ չունենան կորոնավիրուսի հետ»,- հայտարարեց Մանե Թանդիլայնը՝ չբացառելով, որ  կլինեն նաև հարկաբյուջետային կանոների խախտումներ: Ըստ պատգամավորի, նման խախտումներ կառավարությունը նախկինում արել է և անելու է, իսկ ընդդիմությունն այդտեղ չի  ունենալու հնարավորություն դրանք բացահայտելու և թույլ չտալու:

«Դուք դա կանեք, մենք կբարձրաձայնենք, ստատուսներ կգրենք, դուք էլ կասեք՝ էս ինչ են ասում ընդդիմադիրները: Քանի որ ձեր ձայնն ավելի բարձր է, քանի որ շատ պատգամավորներ ունեք, անցնելու է ձեր ձայնը»,-նկատեց Մանե Թանդիլյանը:

Վերջում պատգամավորը իր հիացմունքը հայտնեց ֆինանսների նախարարի պատասխանների վերաբերյալ. «Ես ուզում եմ իմ հիացմունքն արտահայտել, թե ինչպես եք կարողանում պատգամավորների՝ պարզաբանում ակնկալող հարցերին տալ պատասխաններ, որոնք իրականում սխալ չեն, բայց ամբողջական չեն և պատգամավորների մոտ թողնել տպավորություն, որ այն ինչ ուզում էին լսել՝ իրենք լսեցին»: Այդքանից հետո էլ, ըստ Թանդիլյանի, մնում են այն համոզման, որ նախագծով անսահմանափակ հնարավորություններ են տրվում կառավարությանը և իրենք դեմ են քվեարկելու նախագծին: