Ձեր վստահելի աղբյուրը

«Ինչո՞ւ կառավարությունը ՀՀ քաղաքացիների վերջին 2 տարիների խնայողություններից, որտեղ վստահաբար կա 100 մլրդ դրամ որևէ պարտավարությունով չծանրաբեռնված փող, չի ուզում աջակցել ՀՀ քաղաքացիներին, որ նրանք վճարեն գազի, լույսի, ջրի վարձերը, կամ սնունդ գնեն»,- խորհրդարանում նման հարց հնչեցրեց ԱԺ «Լուսվոր Հայաստան» խմբակցության ղեկավար Էդմոն Մարուքյանը՝ դիմելով ՀՀ ֆինանսների նախարար Ատոմ Ջանջուղազյանին։

Պատգամավորը վստահեցրեց, որ այս պահին ՀՀ-ում 5000 ընտանիք  կանգնած է կոմունալները վճարելու և սնունդ գնելու խնդրի առաջ. «Մենք այս խնդիրը բարձրաձայնել ենք, փողի տեղը ցույց ենք տվել, նաև ներկայացրել ենք միջազգային փորձը։ Երեկ բացահայտել ենք նաև, որ ՀՀ-ն իր ՀՆԱ-ի 0.84 տոկոսից էլ պակաս ծախս է արել աջակցության համար։ Հիմա կառավարությունը ե՞րբ է մեր առաջարկը քննարկելու, ե՞րբ է պատասխանելու՝ կողմ է, թե դեմ»։

Պատասխանելով հարցին, Ա. Ջանջուղազյանը նշեց, որ վստահ չէ, թե է. Մարուքյանը հարց հնչեցնելով ակնկալում է պատասխան ստանալ. «Դուք իրավունք ունեք այս հարցը տալու, բայց դրա պատասխանն արդեն  ստացել եք, այն Ձեզ հայտնի է, և կարծում եմ, դուք դրա հետ համաձայն եք։ 100 մլրդ դրամ կառավարությունն իր տրամադրության տակ չունի։ Դուք ասում եք, որ փողի տեղը ցույց տվեցիք, ես Ձեզ ասում եմ, որ մենք տարեկան հաշվետվությունը հրապարակել ենք, որտեղ առանձին տեղեկանքով ներկայացված է գանձապետական միասնական հաշվի մնացորդը, դրա բաղադրատարրերը և ասված է, թե դա ինչ չափով է կառավարության տրամադրության տակ»։

Ըստ ֆինանսների նախարարի, հանրության սոցիալապես անապահով խումբը թիրախավորված, հասցեական աջակցություն է ստանում տարբեր միջոցառումներով։

«Իսկ անհասցե և չհիմնավորված վճարումները շատ ավելի բացասական ազդեցություն կունենան, ընդ որում, դա միայն  փողին չի վերաբերում»,- ասաց Ա. Ջանջուղազյանը։

Արձագանքելով Է. Մարուքյանը նշեց, որ պատգամավորները կոնկրետ հարցեր են տալիս, իսկ նախարարը սրամտում է. «Ես իմ իրավունքները գիտեմ, իսկ Ձեր պատասխանի առաջին մի րոպեն այն մասին էր, որ ես իրավունք ունեմ հարց տալու։ Ես չեմ հասկանում՝ ի՞նչը հասցեական չի, եթե ես խոսում եմ 470 հազար թոշակառուի մասին, թոշակառուի տան տեղն էլ գիտեք։ Ես չգիտեմ՝ ոնց եք ասում, թե աջակցությունը թիրախային է, երբ վարչապետն իր ուղիղ եթերում ասում է՝ չենք կարողանում կարիքավորին տեղորոշել։ Իրար հետ գոնե քննարկեք, որ ձեր խոսքերը համընկնեն»։

Ա. Ջանջուղազյանն էլ նշեց, որ ինքն արձագանքում է հարցերին այնպես, ինչպես ճիշտ է գտնում։

«Ես էլի եմ ասում, դուք ուզում եք պատասխան իմանալ, իսկ այդ պատասխանն արդեն հնչել է՝ ոչ մեկ անգամ։ Հետևաբար ես ինձ կարող եմ թույլ տալ եզրակացնելու, որ դուք ուղղակի պատասխանի Ձեր վարկածն ունեք, և Ձեզ դուր չի գալիս այն պատասխանը, որ հնչում է։ Իսկ ինչ վերաբերում է նրան, որ մենք իրար հետ համաձայնեցնենք մեր գործողությունները, ես էլ եմ այն ասում, ինչ վարչապետը, որ տեղորոշման խնդիր ունենք։ Ասում եմ, որ հասցեական ենք ուզում իրականացնել մեր գործողությունները»,- եզրափակեց Ա. Ջանջուղազյանը։