Ձեր վստահելի աղբյուրը

«Հայաստանում, իրապես, արտակարգ դրություն որպես այդպիսին չկա, ոչ մի նորմալ սահմանափակում չկա, նորմալ բուժզննություններ չեն կատարվում, նորմալ թեստավորում չի արվում, չվարակված մարդկանց մեկուսացնում են վարակված մարդկանց հետ ու վարակն ավելի տարածվում է»,- Panorama.am-ի հետ զրույցում ասաց «Պարացելսուս» ՀԿ-ի հիմնադիր-նախագահ Նունե Ներսիսյանը։

Նրա խոսքով, սոցիալական հեռավորություն որևէ տեղ  չի պահվում, վառ օրինակ՝ բանկերի դիմաց հերթերը, սուպերմարկետներում մարդկանց քանակը։

«Սուպերմարկետների դրամարկղերի մոտ մարդիկ լցված են իրար վրա։ Երբևէ տեսե՞լ եք, որ, օրինակ, հինգ հոգով մարդկանց թողնեն մտնեն խանութ, նրանց դուրս գալուց ախտահանեն մինչև մյուս խմբին ներս թողնելը։ Կամ՝ երբևէ տեսե՞լ եք ախտահանեն բարձրահարկ շենքերի մուտքերը, վերելակները։ Ես որևէ տեղ չեմ տեսել։ Միգուցե այն շենքերում, որոնք սեփականատեր ունեն։ Պետության կողմից նման կանխարգելիչ միջոցառումներ ես չեմ տեսնում»,- ասաց նա։

Ըստ նրա, այս ամենն էլ հանգեցրել է նրան, որ այսօր արդեն վարակակիրներն ավելացել են 134-ով։ 

Ն. Ներսիսյանի խոսքով, տեղաշարժի թերթիկներ են լրացնում քաղաքացիները, ինտերնետով ինչ որ հսկողություն է, բայց դրանք ընդամենը քաղաքացիների տեղաշարժի տոտալ վերահսկողություն է։

«Այս ամեն ինչը վկայում է առողջապահության  նախարարի տապալած առողջապահության մասին։ Երբ որ հունվարից ես ու իմ գործընկերներն աղմուկ էինք բարձրացնում, որ ամբողջ աշխարհում կորոնավիրուս է տարածվում, պետք է կանխել, մեր առողջապահության նախարարն ասուլիսի ժամանակ լրագրողներին ձեռք առնելով ասում էր, որ ինքը նոր է եկել ինչ-որ երկրից,  վարակված է, կարող է իրենց վարակել,  ասում էր՝ կորոնավիրուսն այդքան էլ վտանգավոր վիրուս չէ։ Չգիտեմ՝ ինչու այսօր իր համար դարձավ վտանգավոր։ Երբ ես ու իմ նմանները պահանջում էինք, որ այդպես չի կարելի վարվել ազգաբնակչության հետ, ձեռք էր առնում, ասում էր խուճապաշիջման  կոմիտեի անդամներ են։ Դինոզավրի գրիպ էր ասում, թռչնի գրիպ էր ասում։ Սա տապալված առողջապահություն է ոչ նորմալ կազմակերպչի կողմից»,- ասաց Ն. Ներսիսյանը։

Նրա գնահատմամբ, բոլոր օղակներում բաց կա, ինչն էլ հագնեցնում է վարակի տարածմանը։ Որպես օրինակ նշեց Գավառի դեպքերը, որին, ըստ նշված տվյալների, մասնակցել է 500 մարդ. «Նորատուսից մարդիկ հասել են Գավառ։ Ոստիկանության, պարետատան աշխատակիցները  չե՞ն նկատել այդ մարդկանց տեղաշարժը»։ 

«Այս ամենից կարելի է ենթադրել, որ վարակակիրները կավելանան։  Պետք է հետևություն անել՝  պետք է ամեն մարդ ինքը գիտակցի, թե ինչի առաջ կարող է կանգնել ու ինքը կանխի այս ամեն ինչը, եթե ոչ, օրեցօր դեպքերը կշատանան։ Առողջապահության նախարարությունը՝ հանձինս նախարար Արսեն Թորոսյանի, չգիտեմ ինչով են զբաղվում»,- ասաց «Պարացելսուս» ՀԿ-ի հիմնադիր-նախագահը։

Նրա խոսքով, աշխարհում հայտարարված է համավարակ, երկրում գործում են սահմանափակումներ և  հաղորդագրություն են տարածում, որ այն երեխաներին, որոնց պատվաստման ժամանակն է, տանեն պոլիկլինիկաներ պատվաստման։

«Եվ ասում են՝ դուրս մի արի, և ասում են՝ երեխաներին տարեք պոլիկլինիկաներ, որտեղ հերթեր են, սոցիալական հեռավորությունն ապահովված չէ։ Ի՞նչ պատվաստման մասին է խոսքը, եթե չգիտենք, թե այս վարակի վերջն ինչ է լինելու, ինչ բարդություն ունի։ Այսինքն՝ այս ամենը նշանակում է, որ մարդ չի գիտակցում, թե ինչ կառույց է ղեկավարում։ Առողջապահությունն ազգային անվտանգության կարևորագույն մասնիկներից մեկն է, մարդու առողջության հետ գործ ունենք», - նշեց նա։

Նունե Ներսիսյանի համոզմամբ, այսօր ամեն մարդ պետք է  հույսը դնի իր վրա։