«Ստորաբաժանումները պատրաստ են». մարտավարամասնագիտական զորավարժությունների ամփոփում

Հասարակություն 09:06 01/05/2020 Արցախ

Բանակի հատուկ նշանակության ստորաբաժանումների մարտավարամասնագիտական պատրաստության աստիճանը ևս մեկ անգամ գնահատելու և նոր գիտելիքներով ու հմտություններով վերջիններիս զինելու համար ապրիլի 28-30-ը անց են կացվել մարտավարամասնագիտական զորավարժություններ, որոնց ընթացքին հետևել է ՊԲ հրամանատարի 1-ին տեղակալ-շտաբի պետ, գեներալ-մայոր Կամո Վարդանյանը: Այս մասին հայտնում է ԱՀ ՊՆ-ը:

Պայմանական ազդանշանը ստանալուց հետո բանակի հատուկ նշանակության զորամասերից մեկը բերվել է մարտական պատրաստականության բարձր աստիճանի, անձնակազմը զբաղեցրել է նստեցման շրջանները: Տեղերում արդեն կազմակերպվել են ծավալման աշխատանքներ, որոշ ուղղություններում անցել են մարտական հերթապահության ուժեղացված ռեժիմի, ճշգրտվել են մարտական խնդիրներն ու հետագա անելիքները, խաղարկվել հավանական պատերազմական իրավիճակներում առավել արդյունավետ գործելու մեխանիզմներն ու այլ անհրաժեշտ գործողություններ:

Զորավարժությունների ընթացքում անձնակազմը իրականացրել է բարդ հանձնարարություններ ու պայմանական մարտական առաջադրանքներ՝ ևս մեկ անգամ ցուցադրելով պատրաստության գերազանց մակարդակ: Կրակային փուլին անձնակազմը ցուցադրել է խոցման բարձր արդյունավետություն ինչպես պաշտպանողական, այնպես էլ պայմանական հարձակվողական մարտերի ընթացքում՝ կիրառելով հատուկ նշանակության կրակային միջոցներ ու սարքավորումներ:

Զորախաղերի ընթացքն ու հատուկ նշանակության ջոկատայինների անցած ճանապարհը վկայում է, որ ստորաբաժանումները պատրաստ են ինչպես խաղաղ, այնպես էլ պատերազմական իրավիճակներում փայլուն կատարել առաջադրված մարտական խնդիրները:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: