Ձեր վստահելի աղբյուրը

Չինաստանը Միացյալ Նահանգներին կոչ է անում լրջորեն հաշվի առնել միջազգային հանրության մտահոգությունները նախկին Սովետական Միության երկրներում գտնվող իր բիոլաբորատորիաների վերաբերյալ և պաշտպանել տեղի ժողովուրդների առողջությունն ու անվտանգությունը։ Այս մասին, ինչպես գրում է չինական պետական xinhuanet-ը, ապրիլի 29-ին ասել է Չինաստանի ԱԳՆ խոսնակ Գենգ Շուանգը։

Շուանգն այս հայտարարությունն արել է ճեպազրույցի ժամանակ այն բանից հետո, երբ նման մտահոգություն էր հայտնել նաև Ռուսաստանի արտգործնախարարության խոսնակը։

Կայքը գրում է, թե արտասահմանյան լրատվամիջոցները նաև հայտնում են, որ այդ լաբորատորիաներն ամբողջությամբ ղեկավարվում են ԱՄՆ-ի կողմից, և ԱՄՆ պաշտպանության նախարարության կարգադրությամբ ուսումնասիրվում են վտանգավոր հիվանդություններ, կամ նույնիսկ իրականացվում են որոշակի հետազոտական ծրագրեր, որոնք արգելված են Միացյալ Նահանգներում:

«Միացյալ Նահանգները հիմնել է մի շարք կենսաբանական լաբորատորիաներ նախկին Խորհրդային Միության երկրներում, բայց լռել է դրանց գործառույթների, օգտագործման և անվտանգության գործոնների մասին», - ասել է Գենգը, նշելով, որ այդ քայլը խորը մտահոգություն է առաջացրել տեղացիների և հարևան երկրների մոտ, և որոշ մարդիկ խստորեն պահանջում են փակել համապատասխան լաբորատորիաները:

«Հուսով ենք, որ ամերիկյան կողմը լուրջ կընդունի միջազգային հանրության մտահոգությունը, պատասխանատու կերպով հաշվի կառնի տեղի բնակչության առողջությունն ու անվտանգությունը և կձեռնարկի կոնկրետ միջոցներ՝ կասկածները նվազեցնելու համար», - ասել է ԱԳՆ խոսնակը:

Նշենք նաև, որ նման լաբորատորիա գործում է նաև Հայաստանում։ Նախօրեին ևս ՀՀ ԱԳ նախարարության մամուլի խոսնակ Աննա Նաղդալյանն անդրադարձել էր ՀՀ-ում գործող բիոլաբորատորիաների հարցին՝ ասելով, որ ՀՀ-ում գործող կենսաբանական լաբորատորիաները պատկանում են Հայաստանին և ամբողջովին վերահսկվում են ՀՀ պետական մարմինների կողմից: Հայկական կողմը բազմիցս հայտնել է, որ լաբորատորիաների անձնակազմը բաղկացած է միայն ՀՀ քաղաքացիներից, օտարերկրյա մասնագետների ներկայությունը լաբորատորիաների տարածքում բացառված է:

Հավելենք նաև, որ կորոնավիրուսի տարածումից ի վեր ԱՄՆ-ն Չինաստանի նկատմամբ մեղադրանքներ է հնչեցնում, որ նոր տիպի կորոնավիրուսի արտահոսքը, որը հանգեցրեց համաշխարհային պանդեմիայի, կարող էր տարածված լինել համաճարակի էպիկենտրոն հանդիսացած Ուհան քաղաքի լաբորատորիայից:

Նախօրեին ԱՄՆ նախագահ Դոնալդ Թրամփը հայտարարել է, որ իրենց հետախուզության ներկայացրած ապացույցներն իրեն «վստահության բարձր մակարդակ» են տալիս, որ կորոնավիրուսը ծագել է Չինաստանի Ուհան քաղաքի լաբորատորիաներից մեկում։

Այսօր, ինչպես գրել է The Guardian-ը, Չինաստանում Առողջապահության համաշխարհային կազմակերպության ներկայացուցիչ Գուդեն Գալեան ասել է, որ կազմակերպությունը դիմել է Չինաստանի իշխանություններին՝ միանալու վիրուսի ծագման վերաբերյալ հետազոտություններին, սակայն այս փուլում իրենց չեն հրավիրել։