Ձեր վստահելի աղբյուրը

Այսօր Դվին Մյուզիք Հոլում տեղի ունեցած «ԹՈՎՄԱՍՅԱՆ» Բարեգործական Հիմնադրամի կողմից կազմակերպված «Միասին Մենք Կարող ենք» համերգի մամուլի ասուլիսին մասնակցում էին  «ԹՈՎՄԱՍՅԱՆ» Բարեգործական Հիմնադրամի հոգաբարձուների խորհրդի նախագահ Արտակ Թովմասյանը, ռեժիսոր Հրաչ Քեշիշյանը, ՀՀ կենտրոնական բանկի խորհրդի անդամ Հասմիկ Ղահրամանյանը, բժշկական գիտությունների դոկտոր-պրոֆեսոր Հենրիկ Բակունցը, Հայաստանի ամերիկյան համալսարանի փոխնախագահ Աշոտ Ղազարյանը, երգիչներ Ալլա Լևոնյանն ու Սարո Թովմասյանը։

Ալլա Լևոնյանն իր խոսքում նշեց, որ նախաձեռնությանը միացել են սիրահոժար ու շնորհակալություն հայտնեց Արտակ Թովմասյանին, «ԹՈՎՄԱՍՅԱՆ» Բարեգործական Հիմնադրամին, քանի որ այն, իսկապես, շատ մեծ գործ է անում։

«Էկրանից այն կողմ թվում է, թե ուղղակի երգեցինք, ավարտվեց, գնաց, բայց այն նախապատրաստական աշխատանքը, որ խումբը կատարում է, շատ կարևոր է և մենք էլ, բնականաբար, մեր փոքրիկ լուման պետք է ունենանք մեր երկրում կատարվողին»,-ասաց Ալլա Լևոնյանը, նաև շնորհակալություն հայտնելով բուժաշխատողներին, որոնք պայքարում են հիվանդության դեմ։

Սարո Թովմասյանը ևս իր խոսքը շնորհակալությամբ սկսեց՝ ուղղված «ԹՈՎՄԱՍՅԱՆ» Բարեգործական Հիմնադրամին՝ «այսքան ահռելի մեծ աշխատանք սկսելու ու նաև նման ցանկություն ունենալու համար»։

«Ես իմ և իմ կոլեգաների անունից կարող եմ ասել, որ մեծ ուժով ու եռանդով պատրաստ ենք ոչ միայն ելույթ ունենալ, այլ նաև մեր սոցկայքերով, մեր աշխատանքով նպաստել այս մեծ նախաձեռնությանը։ Իմ կարծիքով սա աննախադեպ միջոցառում է, ու այն աշխարհով մեկ կտարածվի»,-ասաց Սարո Թովմասյանը։

Հրաչ Քեշիշյանը ևս նշեց, որ  միջոցառումն իր տեսակով ու մասշտաբով աննախադեպ է, քանի որ այս անգամ ողջ հեռարձակումը տեղի է ունենում առցանց, և ոչ թե հեռուստատեսությամբ։

«Սա ունի իր հետաքրքիր զարգացումը և նշանակում է, որ մենք կարող ենք ոչ միայն հայկական համայնքից, այլ նաև համաշխարհային շատ մեծ լսարան հավաքել։ Թիմը մեծ աշխատանք է տարել, և մենք միացել ենք, որ ստեղծենք կոնտենտը՝ համերգային ծրագիրը, հեռարձակումը»,-ասաց Հրաչ Քեշիշյանը։

Հրաչ Քեշիշյանը նշեց, որ ողջ մարաթոնը լինելու է եռալեզու՝ հայերեն, ռուսերեն ու անգլերեն։

«Այս ամենն ուղղված է COVID-19-ի դեմ պայքարին։ Սա մեծագույն ձեռնարկ է․ մեկ քայլ առաջ գնալու, որ մեր առողջապահական համակարգում ունենանք մի փոքր ավելի բարվոք վիճակ։

Արտակ Թովմասյանին ուղղված հարցին, թե նրա միջոցներից արդեն 1մլն դոլար է ծախսվել, վերջինս պատասանեց, որ ոչ մի միլիոն էլ չի ծախսվել, ֆինանսական տեսակետից մանր ծախսեր են, այլ ծախսվել է ամենակարևորը՝ «մեր բոլորի ժամանակը, որի նպատակն է օգնել մեր ազգին, երբ դրա կարիքը կա՝ ցույց տալով մեր միասնությունը, համախմբվածությունը, հզորությունը և ուժը՝ ամբողջ աշխարհով մեկ»։

Հիշեցնենք, որ «ԹՈՎՄԱՍՅԱՆ» Բարեգործական Հիմնադրամն աշխարհում առաջին անգամ կազմակերպել է համահայկական աննախադեպ ինտերակտիվ առցանց բարեգործական համերգային ծրագիր՝ «Միասին Մենք Կարող ենք», VR տեխնոլոգիաների միջոցով և ճանաչված հայ արտիստների մասնակցությամբ։ Համերգն  ուղիղ կհեռարձակվի միաժամանակ Երևանից և Լոս Անջելեսից՝ մայիսի 2-ին Երևանի ժամանակով ժամը 20:20-ին, և Լոս-Անջելեսի ժամանակով՝ առավոտյան 9:20։