Ձեր վստահելի աղբյուրը

Սուրբ Աթոռում նախկին դեսպան Միքայել Մինասյանն այսօր ֆեյսբուքյան իր էջում հրապարակած տեսանյութում, որը վերնագրված է «Տեսաշար. Ստի վերջը», պատրաստակամություն հայտնեց պատասխանել քաղաքացիների՝ իրեն ուղղված բազմաթիվ հարցերին, պատմել բաներ, որոնք շատերին կհետաքրքրեն, ինչպես նաև ներկայացնել իր տեսլականներն ու գաղափարները։

Մ. Մինասյանը խոստացավ լինել շատ ազնիվ ու պարզ։

Նա իր առաջին զրույցը սկսկեց ԱԱԾ նախկին տնօրեն Արթուր Վանեցյանի հետ հանդիպումից, որը կայացել է վերջինի նախաձեռնությամբ 2019 թ. փետրվարին, Հռոմում։

Նախկին դեսպանը հիշեցրեց, որ Վանեցյանն ավելի վաղ հայտարարել է այդ հանդիպման մասին՝ նշելով, որ այն եղել է Նիկոլ Փաշինյանի հանձնարարությամբ։ ԱԱԾ նախկին տնօրենը մինչ հանդիպումը տեղեկացրել է՝ Նիկոլ Փաշինյանը մեսիջ ունի Մինասյանին, որն արդեն մի քանի ամիս դեսպան չէր։

«Ես ասացի շատ լավ։ Հանդիպումը տեղի ունեցած Հռոմի կենտրոնում գտնվող սրճարանում։ Վանեցյանն ասաց, ես այստեղ եմ որպես ԱԱԾ տնօրեն, իրավասու եմ խոսել Նիկոլ Փաշինյանի անունից։ Ասացի՝ խնդրեմ։ Ասաց՝ ունենք առաջարկ, դու մուծում ես սիմվոլիկ գումար, կքննարկենք ոնց, ինչ-որ հիմնադրամի, հստակ ձևակերպում չի եղել, դրանից հետո դու երբեք Հայաստան չես գալիս, գոնե առաջիկա տարիների ընթացքում։

Բոլոր այն մարդիկ, ովքեր լսում ենք քեզ, դու նրանց համար շատ կարևոր ես, դադարում են պայքարել Նիկոլ Փաշինյանի դեմ, դու ապրում ես երջանիկ, Հայաստանից դուրս, և հենց այդ րոպեին որ մենք պայմանավորվում ենք, բոլոր քրեական գործերը, հետապնդումները դադարեցվում են, խոսքը վերաբերում է հորս, ընկերներիս մասին, մենք միանգամից դառնում ենք իրար չճանաչող լավ բարեկամներ»,- տեսանյութում պատմեց նախկին դեսպանը, ով նաև ՀՀ երրորդ նախագահ Սերժ Սարգսյանի դստեր ամուսինն է։

Մինասյանն ասաց՝ մերժել է այս առաջարկը։

«Ես մերժել եմ Նիկոլ Փաշինյանին, որովհետև ես ինձ չէի կարող ներել և չէի կարող ապրել լավ, երբ իմ ժողովուրդը, իմ հայրենիքն այս վիճակում է։ Ես ի տարբերություն շատերի, ոչ թե կանխատեսել եմ, այլ ես գրել եմ, ասել եմ, որ մեզ սպասվում է մեծ աղետ։ Ես չեմ կարող պայմանավորվել մարդկանց հետ, ում համարել եմ, համարում եմ, և հիմա վստահ եմ, որ նաև դուք ունեք դրա պատճառները և հասկանում եք, պարզապես ստախոս, պարզապես անպատասխանատու, ժողովրդի դավաճան, և ցավոք սրտի, պետք է արդեն ավելացնեմ, պետության թշնամի։ Այն, ինչ կատարվում է Հայաստանի Հանրապետության շուրջ, պարզապես պետական դավաճանություն է»,- խոսքը շարունակեց նա։

Նախկին դեսպանն ասաց, որ ինքը կարող էր ու հիմա էլ կարող է ապրել երջանիկ ու լավ։

Մանրամասնեց, որ 2018 թ. նոյեմբերին ՀՀ արտակարգ ու լիազոր դեսպանի պաշտոնը լքելուց հետո ունեցել է աշխատանքի բազմաթիվ առաջարկներ միջազգային կազմակերպությունների, կորպորացիաների, մասնավոր ընկերությունների ու տարբեր պետությունների կողմից։

«Ես դրանք մերժել եմ, որովհետև չէի կարող և չեմ կարող նստել, նայել, թե ոնց է կործանվում իմ պետությունը, իմ ժողովուրդը։ Ես մերժել եմ Նիկոլ Փաշինյանին՝ իմանալով այն ուղին, որ ինձ սպասվում էր, ես սկսել եմ իմ պայքարը հյուրանոցում՝ մերժելով Նիկոլ Փաշինյանին, իմանալով, որ քրեական գործերը շատանալու են, խորանալու են։ Բայց ժողովուրդ, իմանալով և վստահ լինելով, որ ոչինչ չեն գտնելու, որովհետև ոչինչ չկա։ Ուզում եմ՝ հստակ արձանագրենք, որ հեղափոխությունից երկու տարի անց, չնայած ուժային բոլոր կառույցները, ԱԱԾ-ն, ՊԵԿ-ը, դատախազությունը, ոստիկանությունը, Հատուկ քննչական ծառայությունը, բոլոր քննչական ծառայությունները ուղնուծուծով ուսումնասիրել են իմ ողջ գործունեությունը՝ բացահայտելով այնպիսի փաստեր, որոնց մասին, անկեղծ, ես մոռացել էի, այնպիսի մարդկանց են հարցաքննել, որոնց վերջին անգամ տեսել եմ կամ լսել եմ երևի 15 տարի առաջ։

Այսօր կա մի իրավիճակ, որ չնայած պետության ղեկավարի՝ վարչապետի բազմաթիվ հայտարարությունների, որ ես սեփականացրել եմ ռազմավարական օբյեկտներ, թալանը... միլիարդները... Կրկնում եմ, չկա մի փաստ որևէ թալանի, գործարքի, որը ուղիղ ապացուցում է, որ ես թալանչի եմ։ Նայելով ձեր աչքերի մեջ ուզում եմ հստակ ասել՝ չեմ թալանել, չեմ գողացել, ձեռքերս չեմ մտցրել Հայաստանի Հանրապետության բյուջեի մեջ, ես ոչինչ չեմ արել, որի համար ես պետք է ամաչեմ»,- նշեց նա՝ ավելացնելով, որ իր միակ նպատակն է, օգտագործելով իր գիտելիքը, կապերը, շրջապատը, ապագան ու կյանքը, ծառայել Հայաստանին։

Նա ընդգծեց, մի ողջ պետական համակարգ, փոխարեն զբաղվի մարդկանց փրկելով,  օգնության հասնելով, զբաղված են «կապիկություններով ու չստացված ռեպրեսիաներով»։

«Վերջում ես կոչով դիմում եմ բոլորին, ովքեր աշխատում են իրավապահ մարմիններում ու դատական համակարգում, ամեն ինչ ֆիքսվում է, և խնդրում եմ Ձեզ, հավատացեք, որ հետո, երբ սկսեն Ձեզ դատել, Դուք չեք կարող ասել, որ Դուք կատարում էիք հրահանգներ, իսկ այդ օրը, վստահեցնում եմ,  շատ մոտ է։ Աստված պահապան մեզ և մեր ժողովրդին»,- խոսքն ամփոփեց Միքայել Մինասյանը։