Ձեր վստահելի աղբյուրը

«Կարծում եմ բոլորը կզարմանային, եթե ասեի՝ դատարանը չի բավարարել կալանավորման միջնորդությունը»,- Երևանի Ավան և Նոր Նորք վարչական շրջանի ընդհանուր իրավասության դատարանի դիմաց լրագրողների հետ զրույցում ասաց «Գալաքսի» ընկերությունների խմբի համահիմնադիր Գուրգեն Խաչատրյանի փաստաբան Երեմ Սարգսյանը՝ ներկայացնելով վերջինիս խափանման միջոցի հարցով որոշումը։

Ըստ փաստաբանի, ի սկզբանե պարզ էր, որ այսպես պետք է լիներ։

«Այն պրոցեսները, որոնք տեղի ունեցան Գուրգեն Խաչատրյանի հայտարարությունից հետո, միանգամից վկայում էին նրա մասին, որ կալանավորումն անխուսափելի է։ Առավել ևս եթե հաշվի առնենք դատարանների հետ կապված այն մոտեցումներն ու զարգացումները, որոնք տեղի ունեցան։ Մենք շատ յուրահատուկ զուգադիպություններ ունենք՝ կապված դատարանների ընտրության հետ»,- շեշտեց Սարգսյանն, ապա հավելեց՝ թե՛ Գագիկ Խաչատրյանի, թե՛ Կարեն Խաչատրյանի և, թե՛ Գուրգեն Խաչատրյանի գործերը մակագրվել են նույն դատավորին։

Նրա խոսքով, Գագիկ Խաչատրյանի հետ կապված բոլոր միջնորդություններն, ըստ էության քննում էր մեկ դատավոր Շենգավիթի նստավայրում, ու հանկարծ այնպես ստացվեց, որ այդ դատավորի արձակուրդի ժամանակ Գագիկ Խաչատրյանի կալանքի երկարացումը տեղափոխվեց այս նստավայր և մակագրվեց այն դատավորին, ով քննում է Գուրգեն Խաչատրյանի միջնորդությունը։ Երբ Կարեն Խաչատրյանի նկատմամբ մեկ անգամ գրավ կիրառվեց, հաջորդ երկարացման դեպքում նորից այս դատարանի այս դատավորին մակագրվեց գործը, ով նորից կալանավորեց նրան։

«Այսինքն, Գուրգեն Խաչատրյանի գործը նույն զուգադիպությամբ այս դատավորին մակագրվեց, և այստեղ ես միտում եմ տեսնում՝ դատարանի նախագահի կողմից մակագրությունների հետ կապված, կոնկրետ դատավոր է ընտրվում»,- ասաց Երեմ Սարգսյաը։ 

Ըստ փաստաբանի, հունվարի 14-ից Գուրգեն Խաչատրյանի նկատմամբ կիրառված էր ստորագրությամբ չհեռանալու խափանման միջոցը, և մինչև մարտի վերջ դա բավարար էր համարում, որպեսզի նրա պատշաճ վարքագիծն ապահովվի, բայց հանկարծ՝ իր հայտարարությունից հետո, որոշվեց, որ Խաչատրյանն այլևս կխոչընդոտի գործի քննությանը և նրան պետք է կալանավորել։

«Ւնձ համար այս փաստը զարմանալի է, երբ նույն մեղադրանքին ավելացվեցին այնպիսի աբսուրդ մեղադրանքներ, որոնք ընդհանրապես չեն դիմանում քննադատության, օրինակ՝ նույն կաշառքի դրվագով, երբ ասում են՝ օժանդակություն է տեղի ունեցել»,- ներկայացրեց Երեմ Սարգսյանը։

Փաստաբանն ասաց, եթե անգամ դատարանն այսօր որոշեր, որ Գուրգեն Խաչատրյանը չպետք է կալանավորվի, կլիներ երկրորդ դատավոր, ով անմիջապես կկալանավորեր նրան.

«Օրինակ, երբ նախկինում Գագիկ Խաչատրյանին էին կալանավորում, գուցե կողմնակի աչքի համար դա ընդունելի լիներ, բայց Գուրգեն Խաչատրյանի մասով արդեն բոլոր սահմաններն անցել են։ Ոչ իրավաչափ գործողություններ են տեղի ունենում»։