«Մեկ ամսից ավելի է սուխարի ենք ուտում, կարանք բան էլ չուտենք». նամակ ՔԿՀ-ից

Քաղաքական 18:57 05/05/2020 Հայաստան

«Ինձ մոտ տպավորություն է, որ արդարադատության նախարարը խթանում է ՔԿՀ-ի հարևանությամբ գտնվող խանութների առևտուրը»,- այսօր ԱԺ-ում հայտարարել է պատգամավոր Անի Սամսոնյանը՝ տեղեկացնելով, որ մարտի 16-ին քրեակատարողական հիմնարկներում արգելվել է հանձնուքների ու ծանրոցների փոխանցումը, այն դեպքում 12 ՔԿՀ-ներից միայն երկուսում են սննդի խնդիրը լուծում մասնավոր կազմակերպությունների միջոցով, մնացած 10-ում կա սննդի հարց:

Պատգամավորը, որպես իր ասածի հիմնավորում ընթերցեց ՔԿՀ-ներից մեկից ստացած նամակը, որն ուղղված է Արդարադատության նախարարին. «Մեկ ամսից ավելի է սուխարի ենք ուտում, կարանք բան էլ չուտենք, բայց խի՞ էլի...որ հաշվեհամարով իրենց լարյոկից առևտուր անես, լավ էլ ամեն ինչ կբերեն: Հիմա ո՞նց հասկանանք, փաստորեն մեր մամաների սարքածից կամ պակետով մարկետից առածից կվարակվենք, իսկ տատիկների սարքացիծ ու լարյոկից առածից չենք վարակվի»:

Սամսոնյանը նկատեց, որ ՄԱԿ-ի խոշտանգումների կանխարգելման ենթակոմիտեն հայտարարել է, որ արտակարգ դրության պայմաններում պետք է հարազատներին հնարավորություն տրվի, ընտանիքի անդամ կալանավորներին տալ սնունդ, անհրաժեշտ պարագաներ՝ հաշվի առնելով հնարավոր պաշտպանական միջոցները:

Հասկանալի համարելով, որ արտակարգ դրության ժամանակ տեսակցությունների և հանձնուքների արգելքը կարող է լինել ընդունելի, ըստ Անի Սամսոնյանի, ընթացքը ցույց է տվել, որ այն այնքան էլ ողջամիտ չէ:

«Որովհետև, եթե օրինակ, արգելում են կալանավորի հարազատի բերած տուփով քաղցրավենիքը, բայց նույն տուփով քաղցրավենիքը կալանավորը կարող է գնել ՔԿՀ-ի հարևանությամբ գտնվող խանութից, սա արդեն ողջամիտ չէ»,- հայտարարեց պատգամավորը և Արդարադատության նախարարին կոչ արեց արձագանքել խնդրին:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: