Ձեր վստահելի աղբյուրը

Գյուղատնտեսություն

«Կոնկրետ գյուղատնտեսական ոլորտի զարգացման հետ կապված ի՞նչ քայլեր են արվելու համավարակից հետո»,- խրոհրդարանում նման հարց հնչեցրեց ԱԺ «Բարգավաճ Հայաստան» խմբակցության պատգամավոր Սերգեյ Բագրատյանը՝ դիմելով ՀՀ վարչապետ Նիկոլ Փաշինյանին։

Պատգամավորը նշեց, որ այս պահին գյուղացիական տնտեսություններից 30, 422 հայտ է ներկայացվել, որից բավարարվել է 5917-ը, և մերժվել է 5059 հայտ՝ մոտ 9 մլրդի չափով, և 19,000 հայտ դեռևս  ուսումնասիրման փուլում է։

«Հիմա բանկերի հնարավորություններն ու ռեսուրսները սահմանափակ են, և դա հասկանալի է, հատկապես ռիսկային պայմաններում ակնկալել, որ բանկերը ամբողջովին կսպասարկեն կառավարության կողմից հռչակած ծրագրերի սպասարկումը, խնդրահարույց է։ Արդյո՞ք կառավարությունը բավարար ռեսուրսներ կարող է տրամադրել բանկային համակարգին, որպեսզի մենք կարողանանք գյուղատնտեսությունը սպասարկել այն ծավալով, որքան անհրաժեշտ է»,- հարցրեց Ս. Բագրատյանը։

Պատասխանելով պատգամավորի հարցին՝ Ն. Փաշինյանն ասաց, որ կառավարությունն իրեն արգելել է խոսել՝ տնտեսությունը նախկին վիճակին բերելու մասին, եթե տնտեսությունը բերենք նախկին վիճակին, ապա կհամարենք, որ խոշոր պարտություն ենք կրել։

«Մենք պետք է տնտեսությունը բերենք նոր վիճակի, և մեր նպատակադրումներն այդպիսին են, ես ուզումմեմ ասել, որ տնտեսությունը նոր վիճակի բերելու գործիքակազմի մեջ կարող են լինել բազմաթիվ գործիքներ, բայց մի գործիք կա, որն աներկբա և միանշանակ է. այդ գործիքը կրթությունն է։ Եթե մենք կրթության ասպարեզում չունենանք լուրջ ներդրումներ, լուրջ զարգացումներ, և ընդհանրապես, կրթությունը չդարձնենք ազգային ապրելակերպ, ապա դա չի լինի։ Մեզնից յուրաքանչյուրը պետք է իր առջև խնդիր ունենա՝ ամեն հաջորդ օրն ավելի հմուտ լինելու», - ասաց Ն. Փաշինյանը։

Նրա խոսքով, այսօրվա դրությամբ, կառավարության 2-րդ միջոցառմամբ տրամադրվել է 6121 վարկ՝ 8.8 մլրդ դրամ ընդհանուր ծավալով։ Եվ այս վարկային պորտֆելների մեջ կառավարությունը 6 մլրդ դրամ է տրամադրել բանկերին, որպեսզի նրանք վերահասցեագրեն գյուղատնտեսությանը։

«Երեկ որոշել ենք ևս 2 մլրդ դրամ տրամադրել բանկերին, այս անգամ՝ արդեն 50/50 սկզբունքով։ Այսինքն՝ մենք այդ գումարը կտանք բանկերին, պայմանով, որ տրամադրվող վարկերի 50 տոկոսն իրենք են տալու։ Բայց այստեղ հարց է առաջանում՝ արդյո՞ք պետք է պահանջարկը մենք 100 տոկոսով բավարարենք։ Մենք այսօր գյուղատնտեսության ոլորտում 659 խոշոր վարկ ենք ֆինանսավորել, և դա ենթադրում է, որ այս վարկերի տրամադրման արդյունքում գյուղատնտեսության ոլորտում կստեղծվեն աշխատատեղեր։ Չեմ կարծում, որ մենք պետք է բոլոր վարկային հայտերը բավարարենք, այլ պետք է բավարարենք միայն այն հայտերը, որոնք հաջողության հասնելու հնարավորություն ունեն։ Իսկ նարնք, ովքեր այդ հնարավորությունը չունեն, վաղն ընկնելու են տոկոսի տակ»,- մեկնաբանեց Ն. Փաշինյանը։

Վարչապետն ասաց, որ կառավարությունում կա մտավախություն, որ աշխատուժի խնդիրն է առաջանալու, և շինարարության ոլորտում արված ներդրումները գուցե չկարողանան աշխատել, քանի որ ազատ աշխատուժ չկա.

«Մենք գյուղացուն տվել ենք վարկ,  ասել ենք գնա հողի վրա աշխատի, ու ասել ենք նաև էն գյուղացուն, ով հողից արդյունք չի ստանալու։ Բայց կարո՞ղ է ավելի լավ է, որ մենք իրեն վարկ չտանք, ասենք, հարգելի՛ գյուղացի, խնդրում ենք եկեք ավելի խոշոր գյուղատնտեսությունում աշխատեք, քանի որ դա ավելի ապահով է, կամ եկեք շինարարական ոլորտում աշխատեք։ Այնպես որ, այստեղ խնդիրը միջոցները չեն, այլ դրանց ճշգրիտ և արդյունավետ կառավարումը»։

Բնապահպանություն

«Ինչո՞ւ է հրաժարականի դիմում ներկայացրել ՀՀ շրջակա միջավայրի նախարար Էրիկ Գրիգորյանը, և արդյո՞ք դուք գոհ եք նրա կատարած աշխատանքից»,- խորհրդարանում նման հարց հնչեցրեց ԱԺ «Լուսավոր Հայաստան» խմբակցության պատգամավոր Հրանտ Այվազյանը՝ դիմելով ՀՀ վարչապետ Նիկոլ Փաշինյանին։

Պատասխանելով պատգամավորի հարցին՝ Ն. Փաշինյանը նախ նշեց, որ ուզում է Էրիկ Գրիգորյանին շնորհյակալություն հայտնել այս ընթացքում կատարած աշխատանքի համար։ Վաչապետը համոզմունք հայտնեց, որ Է. Գրիգորյանը պաշտոնավարման ընթացքում կատարել է առավելագունը՝ լավագույն արդյունքի հասնելու համար։

«Գալիս են փուլեր, հարցեր, ժամանակներ, երբ անհրաժեշտ է լինում կայացնել որոշումներ։ Ես կարող եմ արձանագրել, որ բնապահպանական ոլորտում, այդ թվում նախարար Գրիգորյանի մասնակցությամբ էական հաջողություններ մենք ունեցել ենք։ Մանավորապես, 2018-ից մինչ օրս, ըստ էության, փորք ՀԷԿ-երի ջրաչափման խնդիրը գրեթե ամբողջությամբ լուծվել է։ Մենք նախկինում ունեինք պրոբլեմ, երբ փոքր ՀԷԿ-երը առանց հաշվարկի և հաշվառման ջուր էին վերցնում, ինչը ստեղծում էր բնապահպանական և ոռոգման հետ կապված խնդիրներ։ Այս ընթացքում գրեթե ամբողջությամբ լուծվել է փոքր ՀԷԿ-երի ձկնուղիների վերակառուցման հարցը»,- ներկայացրեց Ն. Փաշինյանը։

Վարչապետն ասաց, որ նախորդ տարի 500 հազար ծառ է տնկվել, ընդ որում՝ այս ծառատունկի ծրագրով հոկտեմբեր-նոյեմբեր ամիսներին ՀՀ-ում ստեղծվել է ավելի քան 1000 աշխատատեղ։

«Ինչ վերաբերում է ես գոհ եմ Է. Գրիգորյանի աշխատանքից... եթե ինձ հարցնեք՝ ես գոհ եմ իմ աշխատանքից, կասեմ՝ ոչ, գոհ չեմ, բայց դա չի նշանակում, որ ես պարապ եմ, գործ չեմ անում։ Բայց ես ուզում եմ, որ ինքս և մյուսները միշտ ավելին անենք, քանի որ ես հավատում եմ, որ մենք ի վիճակի են անհնարն անելու։ 2019-ին մենք արել են անհնարը և 2020-ին պետք է էլ ավելի անհնարն անենք»,- շեշտեց Ն. Փաշինյանը։

Արձագանքելով Հ. Այվազյանը նշեց՝ կարո՞ղ ենք համարել, որ բնապահպանության ոլորտում իր առջև դրածն խնդիրները կառավարությունը կատարել է։

Ի պատասխան պատգամավորի հարցին՝ Ն. Փաշինյանն ասաց՝ ոչ բոլոր խնդիրներն են կատարվել։