Ձեր վստահելի աղբյուրը

«Լուսավոր Հայաստան» խմբակցության պատգամավոր Տարոն Սիմոնյանը ԱԺ հարց ու պատասխանի ընթացքում բարձրացրեց հանքարդյունաբերության ոլորտին վերաբերող հարցեր, որոնք կապված են  իրական սեփականատերերի հայտարարագրման հետ: 

«Նախորդ տարի ամենամեծ սեփականատերը օտարերկրյա ներդրումով ընկերություն էր, այս տարի   չենք տեսնում այդ սեփականատիրոջը: Սա ի՞նչ է նշանակում,  կորցրել ենք  օտարերկրյա կապիտալով ընկերությանը և նա դո՞ւրս է եկել Հայաստանից»,- հետաքրքրվեց պատգամավորը, միաժամանակ  հավելելով, որ 62 տոկոսից ավելի սեփականատերերի իրական պատկերը չի երևում:

Հարցին պատասխանեց  ՀՀ արդարադատության նախարար Ռուստամ Բադասյանը և նշեց.

«Հիմա հանքարդյունաբերողների իրական սեփականատերերի մասով արդարադատության նախարարությունն է պատասխանատու և մենք  մի շարք թերություններ ենք նկատել գործող հայտարարագրման համակարգում, որը պատրաստվում ենք ուղղել: Կարծում եմ շուտով կլինի օրենքի համապատասխան նախագիծը, որը ոչ միայն հանքարդյունաբերողներին է վերաբերում:

Ինչ վերաբերում է ձեր հարցին, ապա կոնկրետ ընկերության մասով չեմ կարծում, որ որևէ մեկը կարողանա պարզաբանում տալ: Բայց պետք  է հաշվի առնենք, որ բաժնետոմսերը ոչ ռեզիդենտից անցել է ռեզիդենտի, պետք է հաշվի առնենք, որ դրանք իրականում կարող է մեկ իրական  սեփականատեր ունենալ: Բացի այդ, ցանկացած ընկերություն հետգնման բաժնետոմսերի հնարավորություն ունի, դա կարող է վկայել ռիսկերի մասին, կարող է և չվկայել»:

Անդրադառնալով  հայտարարագրով սահմանված 10 տոկոս շեմին, Բադասյանը նշեց, որ եթե մի քանի միմյանց հետ փոխկապակցված անձինք իրար հետ գերազանցում են տասը տոկոսը, իրենք միևնույն է պետք է երևան և այլն:

Ըստ նախարարի, այս մասով ևս հարկավոր է փոփոխություններ կատարել:

«Կարծում եմ պետք է այնպես անենք, որ  իրական սեփականատերերի հայտարարագրում չերևան օրինակ տնօրենների խորհրդի անդամները, կամ տնօրենները, քանի որ այդպես իրական սեփականատերը կորում է»,- ասաց  Ռուստամ Բադասյանը: