«Հրապարակ». Պաշտոնապես մի անգամ են հանդիպել

ԱՅԼՄԱՄՈՒԼ 10:06 06/05/2020 Հայաստան

«Հրապարակ» թերթը գրում է. «Մարտի 17-ին, երբ կարանտինը նոր էր սահմանվել, տեղեկացրել էինք, որ իշխանությունները որոշել են ապավինել նախկինների աջակցությանը, և ԱԺ-ում փակ քննարկում է կազմակերպվել, որին հրավիրված են եղել ֆինանսների նախկին նախարար Վարդան Արամյանը, փոխվարչապետ Վաչե Գաբրիելյանը, հանրային ֆինանսների մասնագետ Հովհաննես Ավետիսյանը, տնտեսագետ Աշոտ Խուրշուդյանը, և մտադիր են ձևավորել մասնագիտական հանձնաժողով, որտեղ իրավիճակը մեղմելու ելքեր կառաջարկվեն։

Մենք փորձեցինք պարզել, թե այս ընթացքում ինչ քայլեր են ձեռնարկվել։ Պարզվեց՝ ոչ մի հանդիպում հետագայում չի եղել։ Վաչե Գաբրիելյանը մի փոքր մանրամասնեց. «Այն ժամանակ պաշտոնական քննարկում ունեցել ենք։ Ինչպես նաև որոշ մարդկանց հետ, անուններ չտամ, պարբերաբար քննարկումներ ունենում ենք՝ ոչ պաշտոնական կանալներով։ Բայց սա միշտ էլ կար, ինչ-որ նոր բան չի եղել»։

Հարցրինք՝ խորհուրդնե՞ր են հարցնում։ Ասաց՝ պարտադիր չէ, կարող է խորհուրդ հարցնեն, կարող է՝ տեղեկություն ճշտեն։ Տնտեսագետներին հարց ուղղեցինք՝ իսկ ինչպե՞ս են վերաբերվում կարանտինի վերացմանը։ Աշոտ Խուրշուդյանն ասաց, որ հիմա այն պահն է, որ ավելի լավ է խոսեն համաճարակաբանները, քան տնտեսագետները. «Քանի որ եթե տնտեսագետները որոշում կայացնեն, հնարավոր է սխալ որոշում կայացնեն»։ Վաչե Գաբրիելյանն ասաց. «Ես միանշանակ վստահ չեմ բացելու վրա, քանի որ առողջապահական դեպքերի քանակությունները կարող են աճ ունենալ»։ Իսկ գուցե կառավարությունն իր հաշվարկնե՞րն ունի, Գաբրիելյանն ասաց. «Չեմ կասկածում, որ կունենան, բայց քանի հրապարակված չեն, չեմ տիրապետում»»:

Մանրամասները թերթի այսօրվա համարում:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: