Ձեր վստահելի աղբյուրը

Մայիսի 4-ից՝ սահմանափակումների մեղմացումից հետո Երևանում շտապօգնության կանչերը չեն ավելացել։ Ասուլիսում հայտարարեց «Շտապօգնություն» ՓԲԸ-ի տնօրեն Թագուհի Ստեփանյանը։

Նա հիշեցրեց, որ հունվար, փետրվարին ունեցել են բավականին շատ կանչեր՝ 900-950-ի, այսօր շտապօգնության կանչերը կազմում են օրական 600-650 կանչ։

«Կոնկրետ կանչերի բարձրացման տենդենց մայիսի 4-ից հետո չենք ունեցել, օրական նույն կանչերի թիվն է կազմում»,- ասաց Թ.Ստեփանյանը։

Նա հայտնեց, որ շտապօգնության անձնակազմից 12 հոգու մոտ է այս ընթացքում հաստատվել կորոնավիրուս, ասիմպտոմ վարակվածներ են, ոչ մի կլինիկական պատկեր չունեն, մեկուսացած են համապատասխան կլինիկաներում։

Հարց-Արդյո՞ք շտապօգնության աշխատակիցները, որոնք այս օրերին վտանգում են իրենց կյանքը տեղափոխելով հիվանդներին, ստացել են պարգևավճարներ, եթե այո, քանի՞ հոգի։
Պատասխան-Անցյալ ամիս Երևանի քաղաքապետի կողմից հատկացվել է  գումար, պարգևատրվել են շտապօգնության այն աշխատակիցները, որոնք բուն օջախում են աշխատել. բժիշկներին տրվել է 95 հազարական դրամ, բուժքույրերին, վարորդներին՝ 70 հազարական դրամ։  Շտապօգնության ծառայության կողմից նույնպես պարգևատրումներ եղել են բժիշկ կարգավարներին։

Հարց-Արդյո՞ք կորոնավիրուսով հիվանդներին սպասարկելը չի բարդացնում առհասարակ այլ զանգերի սպասարկումը, ինչպե՞ս եք  լուծում  դժվարություները։
Պատասխան-Չի բարդացնում մնացած քաղաքացիների սպասարկումը։ Ինչպես նշեցի, կանչերն այսօր նվազել են։ Կանչի մեկնելիս՝ չգիտենք, թե ինչ կանչ ենք սպասարկելու. եթե կասկած է լինում, որ հիվանդը վարակված է կորոնավիրուսով, տեղափոխվում է համապատասխան հիվանդանոց ախտորոշելու համար, այնուհետև  հասնում ենք մեր մնացած կանչերին։

Հարց- Հաշվի առնելով կորոնավիրուսային վիճակը, ընկերությունն այս շրջանում ի՞նչ խնդիրների է բախվել, որքանո՞վ է կարողացել  հաղթահարել, ի՞նչ խնդիրներ կան, որոնց ուղղությամբ աշխատանքներ են տարվում։
Պատասխան-Ամենամեծ ու կարևոր խնդիրը, որ ի սկզբանե լուծվեց,  աշխատակիցների անվտանգության խնդիրն էր։  Ձեռք բերվեց մեծ քանակությամբ դիմակներ, համապատասխան պարագաներ։ Այլ խնդիր, կարելի է ասել, չունենք։

Հարց- Քանի որ   մարդիկ  մեկուսացված են, քիչ են շփվում, կանչերի պատճառների պատկերը փոխվե՞լ է։
Պատասխան-Կարծում եմ՝ կանչերի թիվը, որ այսքան պակասել է, հենց դրանով էլ պայմանավորված է։

Հարց- Կանչերի մեջ ի՞նչ թիվ են կազմում կորոնավիրուսային հիվանդության հետ կապված կանչերը, քանի՞ տոկոսի դեպքում է հաստատվում կորոնավիրուսը։
Պատասխան-Մարտ, ապրիլ, մինչև մայիսի 6-ը, մենք, քանի որ ի սկզբանե չենք դնում կորոնավիրուս դիագնոզը, հիվանդանոց ենք տեղափոխվել  կորոնավիրուսի կասկածով  2333 հիվանդ։ Այն հիվանդներն են, որոնք ունեն սուր շնչառական հիվանդություններին բորոշ խնդիրներ, թոքաբորբի կասկածով նման հիվանդներին տեղափոխել ենք։

Հարց- Եղե՞լ են շտապօգնության աշխատակիցներ, որոնք հրաժարվել են աշխատել կորոնավիրուսով վարակված պացիենտների հետ, եթե այո, արդյո՞ք նրանց ազատել եք աշխատանից, թե ըմբռնումով են մոտեցել նրանց որոշմանը։
Պատասխան-Ըմբռնում ենք մոտեցել։ Հիմնականում տարիքի հետ կապված է. ունենք 55 տարեկանից բարձր բժիշկներ, բուժքույրեր, վարորդներ, որոնք չեն ցանկացել նման իրավիճակում աշխատել։ Ըմբռնումով ենք մոտեցել, դեպքեր ունենք, որ համապատասխան աշխատակիցներն արձակուրդ են վերցրել։ Ունենք  բժիշկների մեծ բանակ, որոնք վախեցած չեն իրավիճակից, իրենց ցանկությունն են հայտնել աշխատել շտապօգնությունում, ամեն օր դիմում են մեզ նման մասնագետները։

Հարց-Ձմռան ամսիներին գրիպի, շնչառական հիվանդությունների աճ եղե՞լ է, ինչո՞վ եք բացատրում։
Պատասխան- Հունվար, փետրվար ամիսներին ունեցել ենք սուր շնչառական հիվանդությունների ավելացում պայմանավորած  ուրիշ գրիպերի առկայությամբ։ Պետք է նշեմ, որ շտապօգնության հիմնական կանչերը վերաբերում են սիրտ-անոթային հիվանդություններին, սուր շնչառական, այնուհետև վնասվածքներին։ Ձմռան ամսիներին միշտ էլ կանչերն ավելանում են, բայց եթե համեմատանք այս տարվա նույն ժամանակաշրջանը 2019-ի հետ, անցյալ տարի 800-850 կանչ ենք սպասարկել, այս տարի ունեցել ենք կանչերի բարձրացում։