Ձեր վստահելի աղբյուրը

««Լիդիան» ընկերության ֆինանսական վիճակը բավականին ծանր է, Կանադայում դատական պրոցեսը դեռ չի ավարտվել, պարտատերերն իրենց պարտքերն ուզում են։ Այնպես որ ի՞նչ պետք է պայմանավորվեն, պետք է մի կողմն ինչ-որ առաջարկ ունենա, դեռ ոչինչ չունի, որ  պայմանավորվեն»,- Panorama.am-ի հետ զրույցում ասաց բնապահպան-իրավաբան Նազելի Վարդանյանը՝ պատասխանելով հարցին, թե վերջին շրջանում պարբերաբար խոսակցություններ են հնչում «Լիդիան»-i ու կառավարության միջև ինչ-որ պայմանավորվածության մասին, արդյոք որևէ տեղեկություն ունի՞ այդ մասին։

Նրա խոսքով, դատարանում պետք է որոշվեն ընկերության ֆինանսական վիճակի ու իրենց լինել-չլինելու հարցերը, այսինքն՝ վերջը գնալո՞ւ է սնանկացման, թե՞ ոչ։

«Իսկ հանքի հարցն արդեն Ջերմուկի բնակիչները լուծել են։ Ինձ թվում է՝ անբեկանելի է, երկու տարի է ճանապարհները փակ պահում են, վերահսկողության տակ է, չեմ կարծում, որ իրենց կարծիքն այդ հարցում կփոխվի։ Ջերմուկի բնակիչներն այդ տարածքի տնօրինողներն են, տերերը, իրենք պետք է որոշեն իրենց կենսական պայմանները, թե ինչ պայմաններում պետք է ապրեն, իրենց փոխարեն որևէ մեկը չի կարող որոշում կայացել»,- ասաց բնապահպան-իրավաբանը։

Ինչ վերաբերում է Հայաստանում ընթացող դատական գործընթացներին՝ կապված Ամուլսարում ոսկու հանք շահագործելու հետ, Ն.Վարդանյանն ասաց, որ ինքը երկու գործում է ներգրավված, որոնցից մեկն արդեն հինգ տարի ընթանում է, մյուս գործով պահանջում են պարտավորեցնել շրջակա միջավայրի նախարար Էրիկ Գրիգորյանին (արդեն նախկին) ուժը կորցրած ճանաչել փորձաքննության եզրակացությունն ի հայտ եկած նոր գործոններով։ Այս գործով հաջորդ նիստը նշանակված է 2021 թվականին։

«Բավականին ուշ են նշանակում դատական նիստերը։ Շատ ժամանակ իմաստազրկվում է այդ հայցը, իրադարձություններն ավելի արագ են զարգանում, քան դատարանի վճիռներ են լինում»,- նշեց նա։

Ն. Վարդանյանը չի կարծում, որ նախարարի փոփոխությունը որևէ բան կարող է փոխել այս հարցում, քանի որ կառավարության ընդհանուր դիրքորոշում է պետք, մենակ նախարարի հարցը չէ։

Հարցին՝ ինչպես նշեցիք, ջերմուկցիներն արդեն իրենց որոշումը կայացրել են՝ Ամուլսարը սար է մնալու և վերջ, արդյոք նրանց ձայնը լսելի կլինի, թե նախապատվությունը կտրվի տնտեսական բաղադրիչին, բնապահպան-իրավաբանը պատասխանեց. ««Լիդիան»-ն այսօր տնտեսական ոչ մի կշիռ չունի, սնանկացման եզրին կանգնած է, գումար չունի, բոլոր պարտատերերն իրենց պարտքն են ուզում։ Դատարան են դիմել սնանկացման պրոցեսը ձգելու համար, որպեսզի այդ ընթացքում ինչ-որ գումար հայթայթեն, վաճառքի հարց դնեն։ Սակայն այսօր, հաշվի առնելով այն իրավիճակը, որ կա աշխարհում, չեմ կարծում, որ որևէ մեկը գումար կտա ընկերությանը»։

Բացի այդ, նա հիշեցրեց, որ Ջերմուկի բնակիչները բազմաթվ անգամ են նշել՝ իրենց պայքարը «Լիդիան»-ի դեմ չէ, այլ այնտեղ հանք լինելու, այսինքն՝ կապ չունի, թե ինչ ընկերություն կարող է լինել։

«Կոնցեպտուալ հարց է։ Խոսում ենք՝ ջրահավաք ավազանի, հատուկ պահպանվող տարածքի, կարմիրգրքային բույսերի, Ջերմուկի առողջարանի, Ջերմուկի բրենդի, գյուղատնտեսության, առողջապահության մասին։ Հիմա պետք է զարկ տրվի գյուղատնտեսությանը, իսկ այդ տարածքը շատ լավն է, արոտավայր է եղել։ Հայտնի է Գնդեվազի ծիրանը, որը հասնում է օգոստոսին, երբ արդեն ողջ Հայաստանում ծիրան չի լինում ու վաճառում են 2000 դրամից ոչ էժան։ «Լիդիանը»  դրեց այդ մասի ամբողջ ծաղկած ծիրանենիները կտրեց-թափեց»,- նշեց Ն. Վարդանյանը։

Նրա խոսքով, այսօր ողջ աշխարհում հասկացան առողջապահության ու առողջության արժեքը, իսկ Ջերմուկի ջրով շատ հիվանդություններ են բուժվում։

«Մանկական պարալիչով երեխաները գնում են, առողջարանում որոշ ժամանակ մնալուց հետո առանց սայլակի վերադառնում են։ Ինչպե՞ս կարող է այդ տարածքն, այդպիսի նշանակություն ունեցող տարածքը կորցնել, թե ինչ է մի քանի տարի ոսկի են հանելու կամ չեն հանելու։
Ժամանակին Ջերմուկում թանգարան կար, որտեղ ներկայացված էին ձեռնափայտեր, սայլակներ, պատգարակները, մարդիկ էին թողել, որոնք առողջացել ու գնացել էին։ Այնպես տպավորիչ էր, որ մտնում ու զգում էիր ջրի արժեքը։  Այսինքն, հավասար բաներ չեն՝ առողջություն ու տնտեսություն, որ դնես նժարին ու տեսնեն, թե որ կշեռքի որ կողմն ինչ կլինի»,- ասաց բնապահպան-իրավաբան Նազելի Վարդանյանը։