Ձեր վստահելի աղբյուրը

Ախալցիխեի «Իմեդի» կլինիկայում հայտնաբերվել է ևս մեկ դեպք։ Սա կորոնավիրուսով վարակման չորրորդ դեպքն է։ Այս մասին հայտնում է sknews-ը: Միջին տարիքի պացիենտը «Իմեդի» կլինիկա է տեղափոխվել Բակուրիանիի կարանտինային գոտուց:

Jnews-ի հաղորդմամբ, ըստ կլինիկայի տնօրեն Գիորգի Բարձիմաձեի, պացիենտը չի շփվել տեղի բնակիչների հետ, նա 14-օրյա կարանտին է անցել Բակուրիանիում: Կասկածելի ախտանիշների հայտնաբերումից հետո պացիենտը տեղափոխվել է Ախալցիխեի կլինիկա:

«Ուղարկված անալիզներից մենք ստացել ենք 11-ի պատասխանները, որոնցից մեկը դրական է, պացիենտը միջին տարիքի է: Վարակվածն արդեն դուրս է գրվել մեր կլինիկայից և տեղափոխվել է համապատասխան կլինիկա», – ասել է Գիորգի Բարձիմաձեն:

Ըստ Բարձիմաձեի, ևս 11 մարդու անալիզներ ուղարկվել են ստուգման:

Ինչ վերաբերում է Բորժոմիի ինֆեկցիոն կենտրոնին, ապա այստեղ սպասում են 3 պացիենտի թեստի արդյունքներին, բոլորն էլ տեղի բնակիչներ են:

Կորոնավիրուսային վարակի առաջին դեպքը Սամցխե-Ջավախքում գրանցվել է ապրիլի 16-ին, վարակը հաստատվել է Բորժոմիի մունիցիպալիտետի Ախալդաբա գյուղում բնակվող մի երիտասարդի մոտ: Ապրիլի 23-ին Բորժոմիի կենտրոնում մեկ այլ անձի մոտ նույնպես հայտնաբերվել էր կորոնավիրուս:

Ապրիլի 25-ին, 29-ին և 30-ին COVID-19-ը հաստատվել էր Ախալցիխեի «Իմեդի» կլինիկայի երեք պացիենտների մոտ, նրանք բոլորը տեղափոխվել էին կլինիկա կարանտինային գոտիներից:

Մայիսի 7-ի դրությամբ Սամցխե-Ջավախքում կորոնավիրուսային վարակի 6 դեպք է հայտնաբերվել, վարակակիրներից միայն մեկն է տեղացի, այսինքն՝  Բորժոմիի առաջին դեպքն է, որը հաստատվել էր ապրիլի 16-ին, 5 հոգին Վրաստանի տարբեր շրջաններից են։