Ձեր վստահելի աղբյուրը

«Երբ դու ամբիոնից իջնում ես ու մայիսի 8-ով վրա ես քշում Սասուն Միքայելյանին, մարդը կարող է և այդ սադրանքին չդիմանալ»,- ԱԺ միջանցքում այսօր տեղի ունեցած միջադեպը մեկնաբանեց Ալեն Սիմոնյանը՝ պատասխանելով Էդմոն Մարուքյանին հարվածելու փաստը:

Հարցին, թե քննարկվում է «Իմ քայլը» պատգամավորներին նկատողություն տալու հարցը, փոխխոսնակը նկատեց, որ ինքը դուրս եկավ կուսակցության վարչության անդամների ֆորմատով քննարկումից, հետո կլինի նաև խմբակցությունում քննարկում և որոշում կկայացվի:

«Ես պնդում եմ, որ սա նախապատրաստված սադրանք է, որը սկսվում է ԱԺ դահլիճում և դուրս է գալիս… Դա է վկայում նաև Անի Սամսոնյանի ելույթները, օգտագործվում են այնպիսի բառեր, ինչպիսիք են «հիստերիկը», հետագայում դուրս է գալիս, սադրում է խոսելով «Դու»-ով»,- կարծիք հայտնեց Ալեն Սիմոնյանը:

ԱԺ փոխխոսնակը միանշանակ բացասական գնահատեց Մարուքյանին հարվածելը. «Կա՞ մեկը, որ կարող է այն համարել դրական: Գրեթե բոլոր երկրների խորհրդարաններում այն տեղի է ունեցել»:

Լրագրողները նկատեցին, որ Սասուն Միքայելյանի՝ տեղից միջամտությունից հետո սկսվեց այդ ամենը: Ալեն Սիմոնյանը ասաց, որ բոլորն էլ տեղից արձագանքում են:

«Երբ որ ես ելույթ էի ունենում, ինքը տեղից խոսում էր, ես մոտենում էի՞, ռազբորկա անում էի՞, հասկանում եք՝ այդտեղ անհավասարակշռության խնդիր կա»,- հայտարարեց Սիմոնյանը:

Լրագրողները խնդրեցին մեկնաբանել իմքայլականներ Արտակ Մանուկյանի և Վահե Ղալումյանի կողմից Մարուքյանին մեջքից հարվածելու փաստը:

ԱԺ փոխխոսնակը ժխտեց, որ Արտակ Մանուկյանը հետևից հարվածել է, իսկ Վահե Ղալումյանի նկատմամբ էլ բռնություն է կատարվել, երբ նա ընկած է եղել, ինքը տեսել է դա կադրերում:

Լրագրողը փաստեց, որ Ղալումյանը մինչև ընկնելն էր հարվածում, որը բոլորը տեսել են կադրերում:

Հարցին, թե ի վերջո գնահատական տրվելու է բռնություն գոծադրած պատգամավորների արարքներին, Սիմոնյանը պատասխանեց, որ ինքը դա էլ անում է, երբ հայտարարում է, որ դա անընդունելի է, բայց մանդատից զրկելուն դեմ է:

Ալեն Սիմոնյանին հարց ուղղվեց, թե մտահոգված չէ, որ «Իմ քայլը» խմակցության վարկանիշը ընկնում է, դա են վկայում տեսանյութերի տակ արված գրառումները:

«Վարկանիշի առումով կմտահոգվենք ընտրությունների ժամանակ, եթե մեր քաղաքացիները չքվեարկեն: Եթե կորոշեն քվեարկել Մարուքյանի օգտին, թող քվեարկեն»,- հայտնեց Ալեն Սիմոնյան: