Ձեր վստահելի աղբյուրը

ՀՀ երկրորդ նախագահ Ռոբերտ Քոչարյանի փաստաբանական թիմի անդամ Հայկ Ալումյանը մեղադրողների ու տուժողների, նրանց ներկայացուցիչների ելույթները լսելուց հետո նշեց, որ դատախազ Պետրոս Պետրոսյանը փաստական սխալներ  է թույլ տվել իր խոսքում։

«Դատախազն ասաց, դատական երեք նիստ չի կայացել փաստաբանների պատճառով։ Մինչդեռ փետրվարի 4-ի նիստը կայացել է, նիստն էլ ավարտվել է աշխատանքային օրվա ավարտի կապակցությամբ։ Ինչպես տեսնում եք, պարոն Քոչարյանի պաշտպանների չներկայանալու հետևանքով 22 նիստերից միայն մեկն է, որ հետաձգվել է»,-ասաց փատաբանը։

Պաշտպանն ասաց, մի քանի այլ փաստերի մասով կամ դատախազն է  մոլորության մեջ, կամ դատարանին է փորձում գցել մոլորության մեջ։ Ի պատասխան դատախազի նա պնդեց, որ դատարանը իր նախաձեռնությամբ պարբերաբար պետք է քննարկման առարկա դարձնի խափանման միջոցի փոփոխության հետ կապված հարցը։

«Ես համոզված եմ, որ այդ ամեն ինչը դուք գիտեք, բայց կուզեի, որ սա հնչեր նիստին»,-ասաց Ալումյանը՝ դիմելով դատախազ Պետրոսյանին։

Ինչ վերաբերում է նույն դատախազի այն խոսքին, թե իր համոզմամբ, թաքնվելու ռիսկ կա, Ալումյանն ասաց, դատախազը կարող է նման համոզմունք ունենալ, բայց դատարանը արդեն այդ համոզմունքներին գնահատական է տվել։

«Դատարանը փարատել է այդ կասկածները, նշել, որ թաքնվելու հավանականություն չկա»,-ասաց փաստաբանը։

Ինչ վերաբերում է այն հայտարարությանը, թե  որևէ բան չի փոխվել, Ալումյանը նկատեց, որ կորոնավիրուսով պայմանավորված համավարակն է ի հայտ եկել, Ռոբերտ Քոչարյանի առողջության հետ կապված խնդիրներ են առաջացել, կալանքը անձնական երաշխավարությամբ միջնորդություն է ի հայտ եկել։