Ձեր վստահելի աղբյուրը

«Մանդատ դնելը կախված է մի բանից՝ հեղինակությունից, որը լինում է, ոչ միայն թաղային, այլև քաղաքական»,- իր ֆեյսբուքի էջում հրապարակած տեսաուղերձում հայտարարեց Երևանի ավագանու «ԼՈՒՅՍ» խմբակցության ղեկավար Դավիթ Խաժակյանը և նկատեց, որ մանդատ դնելու պատրաստակամություն ունեցողը նման բան չէր անի։

«Հիմա դուք պատկերացնում եք մի իրավիճակ խորհրդարանում, որտեղ նստած է վարչապետը և վարչապետի ուժից ինչ որ մեկը ֆիզիկական սպառնալիքներ  է ուղղում մեկ այլ պատգամավորի, հետո հարվածում: Հետո վարչապետի ուժին պատկանող խմբակցությունից մեկը գալիս է պատգամավորին մեջքից է հարվածում»,- նկատեց Խաժակյանը և եզրակացրեց, որ այդ  պատգամավորները չեն  հարգում վարչապետին և խոսնակին: 

Ավագանու անդամը  նկատեց, որ երկրում ոչ միայն սոցիալ-տնտեսական ճգնաժամ  կա, այլև բարոյականության և հեղինակության:

«ԱԺ նախագահն այն մարդը չէ, դա վարչապետին էլ է վերաբերում, նա այն մարդը չէ, որ պատգամավորներին կարգի հրավիրի, ասի՝ այդ ինչպես եք ձեզ պահում, ասի՝ Սասուն Միքայելյան, էս դու թազա Շմայս ես դարձել գլխներիս»,- շեշտեց Խաժակյանը և հավելեց, որ Հայաստանում կա քաղաքական հեղինակության ճգնաժամ, երկրում կա մի  այնպիսի իրավիճակ, երբ մի պատգամավորը մյուսին խառը իրավիճակում թիկունքից հարվածում է, որն առաջին հայացքից կիրթ, գրագետ մարդու տպավորություն է թողնում:

Նկատելով, որ ԱԺ-ի այս վիճակն ուղիղ համեմատական  է այն մարդկանց վարքագծին, ովքեր այնտեղ  են գտնվում՝ Դավիթ Խաժակյանը անդրադարձավ Բաբկեն Թունյանի ելույթին, որում ասել էր, թե նա, ով այդպես է աում՝ կամ սրիկա է, կամ տականք և որից էլ զարգացան իրադարձությունները:

«Ոչ մեկը Բաբկենին չի ասել, որ դու եկել դարձել ես պատգամավոր՝ երկրի համար գործ անելու համար, դու ուզել ես դառնալ իշխանական պատամավոր՝ և դու դարձել ես այն: Իրեն ներկայացնում է ժողովրդի ընտրյալ, այն  դեպքում, երբ նա ընտրվել է Փաշինյանի շնորհիվ, որևէ այլ իրավիճակում Թունյանն այդքան ձայն չէր հավաքի»,- նշեց նա:

«Ես գիտեմ,որ Էդմոն Մարուքյանն իր աշխատավաձփով է ապրում, բայց երբ հետաքրքրվում եմ, թե Սասուն Միքայելյանը ինչով է ապրում, ինձ կողքից ասում են սա Սերժն է տվել, այն մեկը՝ մյուսը»,- հայտարարեց Խաժակյանը և նկատեց, որ Սասուն Միքայելյանն չի տարբերվում  Առաքել Մովսիսյանից:

Ըստ նրա,   այն ամենաթողության մթնոլորտը,  որում իրեն ցուցաբերել է Առաքել Մովսիսյանը, նույն մթնոլորտում իրեն դրսևորում է Սասուն Միքայելյանը, որովհետև իր համար վերևում հեղինակություն չկա. «Ազգային Ժողովի նախագահի մասին չեմ խոսում, վարչապետի դեպքում՝ ինքներդ եք տեսնում»:

Դավիթ խաժակյանը հիշեց դեպք, երբ Տարոն Մարգարյանի հոր հասցեին շատ վատ արտահայտություն են արել և նա իր կողքիններին զսպել էր ու թույլ չեր տվել արձագանքել:

Նկատելով, որ  ներկա իշխանությունը փնովում է նախկին իշխանություններին ինտելեկտուալիզմի պակասի մեջ՝ Խաժակյանը շեշտեց. «Բայց դուք չեք հասկանում նույնիսկ այնքանը, ինչքան  հասկանում  էր այդ նույն իրավիճակում նախկին իշխանության ներկայացուցիչը»:

Ըստ բանախոսի, դառնալով իշխանության ներկայացուցիչներ, ներկաները մարդ էլ ծեծելու, հանցանք գործելու, Աժ-ում նման իրավիճակ ստեղծելու համար կմնան անպատիժ:

«Կդնեք դուք ձեր մանդատը, թե չեք դնի, դա ժողովրդի գնահատականը չէ, դա ԱԺ նախագահի և ձեր վարչապետի գնահատականն է: Ունեն նարանք այնքան հեղինակություն, որ տիրապետեն իրավիճակին և ձեզ զսպեն ու բերեն թավշյա ոչ բռնի ժողովրդական դրսևորումների մեջ: Մեջքից հարվածողը ցույց է տալիս, որ ինքը Սասուն Միքայելյանը, Միրզոյանը, Վարչապետը մեկ ուժ են և իրար համարժեք»,- հայտարարեց Խաժակյանը և հիշեց Վանո Սիրադեղյանի հայտնի խոսքը՝ «Սա գյադաների ժամանակն է և այն կանցնի»:

Ավագանու «ԼՈՒՅՍ» խմբակցության ղեկավարը նկատեց, որ ստեղծված իրավիճակը իշխանության քաղաքական հեղինակության ճգնաժամն է՝ Փաշինյանի և «Ելք» խմբի նոր Հայաստանը: