Ձեր վստահելի աղբյուրը

ՀՀ երկրորդ նախագահ, Արցախի առաջին նախագահ, Արցախի հերոս Ռոբերտ Քոչարյանն արձագանքեց դատական նիստում հնչած մի քանի հայտարարություններին։

«Ինձ փորձեցին մեղադրել, որ նույնիսկ կալանավորված վիճակում ես դուրս եմ հանում քրեակատարոկան հինարկի աշխատակիցներին։ Սա այն նույն դեպքն է, երբ մարդ ընդհանրապես չհասկանալով ինչի մասին է խոսքը, իրեն իրավունք է վերապահում մեղադրել»,-ասաց Քոչարյանն ու նկատեց, եղել է նման բան, երբեք դրա մասին չէր խոսի, եթե չհնչեր նման հայտարարություն։

Նա պատմեց, որ բժիշկների հետ քննարկելիս է եղել, թե ինչպես պետք է իրականացվի վիրահատությունը, իսկ ՔԿՀ մեկ այլ հիմնարկի սպա հայտարարել է, որ ինքն էլ պետք է մասնակցի այդ քննարկմանը։

«Հարցնում եմ՝ Դուք բժի՞շկ եք,  ասում է՝ ոչ։ Որպես ով եք դուք մասնակցում մի քննարկման, թե ինչպես են ինձ վիրահատելու։ Ինձ ասում է՝ նման հրաման ունեմ։ Ես ասացի՝ զանգեք Մարդու իրավունքների պաշտպանին։ Ասաց՝ իրեն զրկել են կապի միջոցից։ Վերջը ես ասացի, ես հրաժարվում եմ այս բուժումից, ինձ հետ տարեք քրեակատորաղակն հիմնարկ, որովհետև դուք իրավունք չունեք մասնակցեք այդ խոսակցությանը»,-մանրամասնեց Ռոբերտ Քոչարյանը, ապա ավելացրեց, մի քանի զանգերից հետո իրեն այդ սպան ասել է՝ հասկացանք, չենք մասնակցի։

Քոչարյանն ասաց, դրանից հետո բժիշկների հանդիպումներին ՔԿՀ որևէ աշխատակից չի մասնակցում։

«Իմ իրավունքներն էին ոտնահարվում կոպիտ ու գռեհիկ կերպով, ես հասել եմ այն բանին, որ իմ իրավունքները պաշտպանեմ, թեկուզ դա պետք է աներ դատախազությունը, ոչ թե ես»,-ընդգծեց նա։

Ինչ վերաբերում է երաշխավորողների մասին հնչած հայտարարություններին, Քոչարյանն ասաց, որ դեղին մամուլում տպված տեղեկությունները բերել են ու փորձում են արատավորել մի մարդու, ով տասը տարի եղել է Ղարաբաղի վարչապետը։

«Այդ աստիճանի ցինիզմի հասնել, ուղղակի չի կարելի։ Չի կարելի վարկաբեկել մարդկանց, ովքեր մեծ ավանդ ունեն Հայաստանի Հանրապետության կայացման գործում»,-նշեց նա։

Հիշեցնենք, որ երաշխավորություն են ներկայացրել Հայաստանի նախկին վարչապետներ Վազգեն Մանուկյանը, Խոսրով Հարությունյանը, Կարեն Կարապետյանը, Արցախի նախկին վարչապետ Անուշավան Դանիելյանը։

Ռոբերտ Քոչարյանն ընդգծեց, Հայաստանի, Արցախի նախագահ լինելն զսպող ամենամեծ հանգամանքն է, երբեք որևէ քայլ չի անի, որը կվնասի իր հեղինակությունը, իր համար երաշխավորածների հեղինակությունը։ Նա նկատեց, այդ դեպքում կորցնելու է իր բոլոր ընկերներին, խոսքը ոչ միայն Վազգեն Մանուկյանի ու այլոց մասին է։

«Խաչ ես քաշում քո կենսագրության վրա, այն հանգամանքի, որ առաջին դեմք ես եղել, խաչ ես քաշում քո ընկերների վրա։ Դա առաքին հերթին քո հարցն է։ Կոպիտ ասած, դու էդ մարդկանդ պոդստավկա անող մարդ ես, թե մարդ ես, որ խոսք ես տալիս ու խոսքիդ տերն ես»,-ասաց նա՝ ընդգծելով, որ հրապարակային տված խոսքը երբեք չի խախտի։

Դատավորը հայտարարեց՝ միջնորդությունների քննարկումն ավարտված է, դատարանը հեռանում է խորհրդակցական սենյակ, դատական ակտը կհրապարակվի մայիսի 13-ին ժամը 17։50-ին։