Ձեր վստահելի աղբյուրը

«Կրթության, գիտության, մշակույթի, սպորտի և երիտասարդության համակարգը կոլապսի եզրին է»,- խորհրդարանում այսօր ասաց ԱԺ «Լուսավոր Հայաստան» խմբակցության պատգամավոր Աննա Կոստանյանը՝ անդրադառնալով կառավարության 2019 թվականի կատարողականին։

Նրա խոսքով, այդ կոլապսը սկսվել է 1 տարի առաջ, երբ առանձին գերատեսչությունները միավորվեցին կրթության և գիտության  գերկարևոր ոլորտներին։

«Դրա մասին դեռ մեկ տարի առաջ անում էինք կանխատեսումներ, և անընդունելի համարում նման միավորումը, քանի որ այն չէր կարող դրական արդյունքների բերել։ Կրթական համակարգը կոլապսի եզրին է։ Այո, քանի որ 2 տարվա ընթացքում դեռևս կան չլուծված տարրական կարևոր խնդիրներ, որոնք ինքնին խնդիր են հենց առաջին հերթին ոլորտի պատասխանատուի համար»,- շեշտեց Ա. Կոստանյանը։

Անդրադառնալով կառավարության կատարողականի արդյունքներին՝ պատգամավորն ասաց, որ ԵՊՀ-ն, ՀՊՏՀ-ն ունեն ռեկտորի ժամանակավոր պաշտոնակատարներ, ովքեր մինչ օրս օրենքի խախտմամբ շարունակում են պաշտոնավարել.

«Ինչո՞ւ. դեռևս ինձ համար էլ պարզ չէ։ Ասում եք բարեփոխումներ, ռեֆորմներ, տնտեսական տարբեր ցուցանիշներ եք այստեղից հնչեցնում, սակայն ամենակարևոր ոլորտի բարեփոխումները հապաղում են՝ ոչ լիարժեք են։ Տնտեսագիտական համալսարանը ոլորտի այն կառույցներից է, որտեղ իրական ռեֆորմիստական բարեփոխումներ էին մեկնարկել, սակայն դրանք կասեցվեցին ընդամենը մի պատճառաբանությամբ, որը հետագայում պարզվեց, փաստորեն, կեղծ էր։ Ինձ մոտ տպավորություն է ստեղծվել, որ ոլորտի պատասխանատուն ինչ-որ առումով ճնշված և կաշկանդված է, կամ ուղղակի նրա կողքին ոչ ճիշտ կադրեր են հավաքվել։ Այլապես ինչպես կարող ենք բացատրել այս 2 տարիների ընթացքում նախարարի տեղակալների այսքան հաճախ փոփոխությունները»։

Ըստ Ա. Կոստանյանի, ոլորտում առկա չէ ռազմավարություն, թե ինչ քայլերով պետք է առաջ գնալ և ինչ արդյունք սպասել։

«Այս հարցերն անպատասխան են, և դա նշանակում է, որ բարձրագույն կրթության ռեֆորմը կաղում է, իսկ պատասխանատուները լիարժեքորեն չեն կարողանում իրականացնել իրենց առջև դրված ծրագրային առաջադրանքները։ Առանցքային խնդիր է նաև բնագիտական ֆակուլտետների նկատմամբ հետաքրքրության նվազումը, իսկ ի՞նչ է անում նախարարությունն այս ուղղությամբ, պարզ չէ»,- ասաց պատգամավորը։

Նրա խոսքով, հանրակրթության ոլորտում ևս խնդիրներ կան, քանի որ նոր չափանիշներով 12-ամյա կրթություն այս պահին չունենք, իսկ ավագ դպրոցի դերը չի արժևորվել.

«Այո, բարձրացվել է ուսուցիչների աշխատավարձը, սնունդ է տրամադրվում մի քանի դպրոցներում և նախակրթարաններում, սակայն առանցքային խնդիրները դեռևս լուծված չեն, քանի որ դեռ ունենք ուսուցիչների թափուր տեղեր, ինչը լրջագույն հիմնահարց է։ Այնուամենայնիվ ,դրական տեղաշարժ ևս կա, հատկապես նախադպրոցական կրթության ոլորտում. մի քանի համայնքներում ստեղծվել, կամ վերականգնվել են 18 նախակրթարաններ և այս ձևով երեխաների՝ նախակրթարաններ հաճախելու իրավունքը վերականգնվել է»։

Գիտության ոլորտում ևս կառավարությունը սահմանել էր նպատակ՝ բարձրացնել գիտության նպատակային ճյուղերի ֆինանսավորումն ու տրտմադրվող միջոցներն ուղղել երկրի պահանջներից բխող գիտական հետազոտությունների արդի պահանջներին համապատասխանող ուղղություններին։ Իսկ, ըստ Ա. Կոստանյանի, 2019 թվականի ընթացքում գիտական մտքի զարգացմանն ուղղված որևէ ծրագիր չի իրականացվել։

«Գիտության ֆինանսավորումը չի ավելացել, փոխարենը, գիտական աստիճանը պաշտպանողների թիվը  նախորդ տարիների համեմատ էականորեն կրճատվել է»,- տեղեկացրեց Ա. Կոստանյանը։