Ձեր վստահելի աղբյուրը

ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանը խափանման միջոց կալանքը  անձնական երաշխավորությամբ փոխելու միջնորդությունը ներկայացնելիս հիշեցրեց, որ այս քրեական գործով Ռոբերտ Քոչարյանին մեղադրանք է առաջադրվել 2018-ի հուլիսին 26-ին։ Հաջորդ օրը Ռոբերտ Քոչարյանի նկատմամբ խափանման միջոց է ընտրվել կալանավորումը, որը պահպանվում է մինչ օրս։

«Այս ընթացքում պարոն Քոչարյանը երկու անգամ ազատ է արձակվել և գտնվել է ազատության մեջ՝ 2018-ի օգոստոսի 13-ից մինչև դեկտեմբերի 7-ը, 2019 թ. մայիսի 18-ից հուլիսի 25-ը։ Այս ընթացքում պարոն Քոչարյանն ազատության մեջ է գտնվել հինգ ամիս և մեկ օր, կալանքի տակ է գտնվել 14 ամիս և 28 օր, բայց այս միջնորդությունը ներկայացված է եղել երկու ամիս առաջ՝ ներկա պահին 16 ամիս և շուրջ 20 օր»,- ասաց Ալումյանը։

Նա ընդգծեց, որ 2018-ի օգոստոսի 13-ից մինչև սեպտեմբերի 4-ը, Ռոբերտ Քոչարյանի նկատմամբ առհասարակ խափանման որևէ միջոց կիրառված չի եղել, իսկ սեպտեմբերի 4-ից մինչև դեկտեմբերի 7-ը խափանման միջոց է ընտրված եղել չհեռանալու մասին ստորագրությունը։

«Չնայած կիրառված չի եղել այնպիսի խափանման միջոց, որն ուղղված է նրա կողմից քննությանը խոչընդոտելու ռիսկը նվազեցնելուն, այնուհանդերձ, չկան այնպիսի տվյալներ, որոնք կվկայեն, որ պարոն Քոչարյանը, գտնվելով ազատության մեջ, փորձել է միջամտել քրեական գործի քննության ընթացքին, անօրինական ազդեցություն ունենալ գործի ընթացքի վրա»,- ասաց փաստաբանը։

Ալումյանը շարունակեց, որ 2019 թ. մայիսի 18-ից հուլիսի 25-ը Ռոբերտ Քոչարյանի խափանման միջոց է ընտրվել երկու անձանց երաշխավորությունը, այդ ընթացքում էլ Ռոբերտ Քոչարյանի կողմից չի եղել միջամտություն գործի քննության ընթացքին։

Պաշտպանն ասաց, ներկայացվող միջնորդության լուծման համար կարևոր փաստ է այն, որ քննվող քրեական գործը մեղադրական եզրակացությամբ դատարան է ուղարկվել 2019-ի ապրիլի 29-ին։

«Սա կարևոր փաստ է, խնդրում եմ ուշադրություն դարձնել։ Ձեր վարույթում այս գործը գտնվում է 2019 թ. օգոստոսի 20-ից։ Սույն միջնորդության քննության համար կարևոր փաստ է նաև այն, որ կալանքի տակ գտնվելու ընթացքում պարոն Քոչարյանի մոտ տեղի է  ունեցել առողջական վիճակի կտրուկ վաթարացում»,- ասաց փաստաբանը՝ նկատելով, որ ախտորոշումը միջնորդության մեջ նշված է, սակայն իրենք դրա հրապարակմանը դեմ են, և հարցին անդրադառնալու համար միջնորդեց դռնփակ նիստ հրավիրել։

Փաստաբանը հիշեցրեց, որ Ռոբերտ Քոչարյանի կալանքի հարցը այս դատարանը քննարկման առարկա է դարձել 2019-ի նոյեմբերին, անցել է վեց ամիս, որի ընթացքում դատարանը պարտավոր էր իր նախաձեռնությամբ անդրադառնալ Ռոբերտ Քոչարյանին կալանքի տակ պահելու նպատակահարմարությանը։

«Այս առումով իմ միջնորդության մեջ ես հղում եմ կատարել ՄԻԵԴ մեկ վճռի վրա՝ Լեհաստանի գործով վճռի 50-րդ կետը, բայց ես նույն հաջողությամբ կարող էի վկայակոչել շատ ու շատ վճիռներ, եթե իհարկե դրա կարիքը լիներ։ Այսինքն, դատարանը պետք է իր նախաձեռնությամբ քննարկման առարկա դարձնի խափանման միջոցի հարցը։ Այդպես չի եղել, ավելին, մենք երբ չորս ամիս անց միջնորդություն ենք ներկայացրել, դատարանը երկու ամիս ձգել է»,- ասաց Ալումյանը։

Նա նկատեց, որ մարտի 16-ին ներկայացրած միջնորդության մեջ խոսել է դատարանի կողմից ձգձգումների մասին, մինչդեռ դրանից հետո էլ ձգձգումներ են եղել։

Հիշեցնենք, որ Ռոբերտ Քոչարյանին կալանքից ազատելու համար անձնական երաշխավորություն են ներկայացրել Հայաստանի նախկին վարչապետներ Վազգեն Մանուկյանը, Խոսրով Հարությունյանը, Կարեն Կարապետյանը, Արցախի նախկին վարչապետ Անուշավան Դանիելյանը։