Ձեր վստահելի աղբյուրը

«Տեղի ունեցած միջադեպից անցել է 3 ժամ և ավելի, բայց մենք չտեսանք որևէ արձագանք, որը հարիր է ժողովրդավարական քաղաքական համակարգին»,- խորհրդարանում, ծեծկռտուքի պատճառով ընդհատված նիստի վերսկսումից հետո ասաց  ԱԺ «Լուսավոր Հայաստան» խմբակցության ղեկավար Էդմոն Մարուքյանը։

Նրա խոսքով, ոտնահարվել են ժողովրդավարության հիմքերը, հեղափոխության հռչակված արժեքները։

Ըստ պատգամավորի, Հայաստանի պատմության մեջ աննախադեպ բան է տեղի ունեցել.

«Հիմա կասեք 1996 թ-ին էլ են պատգամավորին խփել, 2002-ին էլ։ Որքան հիշում եմ՝ խմբակցության ղեկավարին այդ ժամանակներում հետևից ու կողքից չեն խփել։ Բայց ասելիքս հետևյալն է, ինչ եղել է, քաղաքական է, և պետք է ունենա քաղաքական գնահատական։ Քաղաքական ամեն մի բան ունի իր տրամաբանությունը և պիտի ունենա քաղաքական գնահատական։ Մենք թե՛ իշխող խմբակցությունից, թե՛ ՀՀ քաղաքական ուժերից և հասարակական սեկտորից սպասում ենք քաղաքական գնահատական, որը հարիր է ժողովրդավարական համակարգին»։

Է. Մարուքյանը նշեց, որ ուղղակի քաղաքական գնահատականը որևէ բան չի կարող փոխել, և միջադեպը պետք է ունենա քաղաքական հետևանքներ։

Նրա պնդմամբ, տեղի ունեցածը, մեծ հաշվով, իրենց խնդիրն էլ է, բայց ավելի շատ հեղափոխության առաջնորդի խնդիրն է։

«Մենք հիմա կլքենք նիստերի դահլիճը, և ապագայում, կախված քաղաքական գնահատականներից և հետևանքներից, կանենք եզրահանգումներ, կորոշակիացնենք մեր անելիքները և կհասկանանք՝ ապագայում ինչպես ենք աշխատելու այս խորհրդարանում»,- շեշտեց Էդմոն Մարուքյանը։