Ձեր վստահելի աղբյուրը

ՀՀ երկրորդ նախագահ Ռոբերտ Քոչարյանի ու մյուսների գործով մեղադրող դատախազ Պետրոս Պետրոսյանը, անդրադառնալով այսօրվա նիստի ընթացքում Ռ. Քոչարյանի խափանման միջոցը փոխելու, վերացնելու միջնորդություններին, ասաց, որ ներպետական ատյանները որևէ պարտավարություն չեն կրում խափանման միջոցին սեփական նախաձեռնմությամբ անդրադառնալու հետ կապված։

Նրա խոսքով, խափանման միջոցի վերաբերյալ միջնորդությունները դատարանի կողմից պարբերաբար քննության առարկա են դարձել, պատշաճ քննվել են, այս քրեական գործով հատուկ ջանասիրություն է ցուցաբերվել։

Ինչ վերաբերում է միջնորդության հիմքերին, ապա դատախազն ասաց,  պետք է քննարկման առարկա դարձնեն ոչ միայն քննությանը խոչընդոտը, այլև թաքնվելու հանգամանքը։

Պետրոս Պետրոսյանն ասաց, քանի որ դատական նիստեր չեն եղել, որևէ անձ չի հարցաքննվել, ապա քննությունը խոչընդոտելու որևէ ռիսկ չի նվազել, որևէ դատավարական գործողություն չի կատարվել, որի հիման վրա կարելի էր նման միջնորդություններ ներկայացնել։

Դատախազի խոսքով խոչընդոտելու ռիսկերը գնահատվում են նաև անձի նախկինում զբաղեցրած պաշտոնի, կապերի, հեղինակության հետ, որոնցով կարող է ազդեցություն ունենալ դատավարական մասնակիցների վրա։

«Կալանավորման հիմքերը որևէ կերպ չեն նվազել, դատարանին կարող եմ ներկայացնել մեկ հանգամանք, որով պայմանավորված կարելի է փաստել, որ այդ ռիսկերը գնալով ավելանում են։ Մարտի մեկի իրադարձությունների քրեական գործերով անցնող տուժողների, վկաների նկատմամբ  անօրինական ազդեցություն գործադրելու հանգամանքեր են ի հայտ եկել, որով հարուցվել  է քրեական գործ, իրականացվում է քննություն»,-ասաց նա։

Ինչ վերաբերում է  կալանքը գրավով կամ անձնական միջնորդությամբ փոխելու միջնորդությանը, ապա դատախազը սրանց էլ դեմ արտահայտվեց, ասաց առարկայազուրկ են։

«Հարգելի դատարան, գտնում եմ, որ ներկայացված միջնորդությունները խափանման միջոցը փոխելու վերաբերյալ անհիմն են, ենթակա են մերժման»,-ասաց Պետրոսյանը։

Ինչ վերաբերում է կորոնավիրուսի համավարակով պայմանավորված հիմքերին, ապա դատախազը նշեց, որևէ փաստաթղում չկա ուղիղ մատնանշում կամ արձանագրում, որ պետությունները պարտավոր են խոցելի խմբերում գտնվող մարդկանց առանց հիմքերին անդրադառնալու ազատ արձակել և կալանավորումը որպես խափանման միջոց չկիրառել։

Միջնորդություններն անհիմն որակեց նաև մյուս մեղադրող դատախազ Գևորգ Բաղդասարյանը։

«Քննարկումը կորոնովիրուսի վերաբերյալ այնքան երկար տեղի ունեցավ, որ ինձ մոտ տպավորություն էր, որ կորոնավիրուսը բացառապես ՔԿՀ-ներում է, ազատության մեջ դա չկա։ Ես կարծում եմ, որ ավելի մեծ ռիսկեր ազատության մեջ կան, քան ցանկացած մեկուսացման պայմաններում»,-ասաց դատախազը։

Հիշեցնենք, որ ՀՀ երկրորդ նախագահ Ռոբերտ Քոչարյանի փաստաբանական խմբի անդամ, պաշտպան Հայկ Ալումյանն այսօր դատական նիստի ընթացքում ներկայացրեց նախկին նախագահի խափանման միջոց կալանքը վերացնելու կամ փոփոխելու միջնորդությունը։

Ալումյանը նշեց, որ միջնորդությունը դատարան է ներկայացվել ապրիլի 24-ին, երբ երկրում արդեն կորոնավիրուսային վարակով պայմանավորված արտակարգ դրություն էր հայտարարված։ Պաշտպանը մեջբերեց մարդու իրավունքների հարցերով եվրոպական կառույցների հայտարարություններն ու կոչերը, ըստ որոնց՝ պետական մարմինները պետք է առավել շատ կիրառեն ազատությունից զրկման այլընտրանքային միջոցները, այդ թվում՝ պատժի ժամանակահատվածի կրճատում, պատժից վաղաժամկետ ազատում և փորձաշրջանի կիրառում: Ալումյանը դատարանի ուշադրությունը հրավիրեց այն փաստին, որ Ռոբերտ Քոչարյանը գտնվում է միաժամանակ մի քանի ռիսկային խմբում, իսկ ներկայումս, առողջական խնդիրներով պայմանավորված, բժշկական հսկողության տակ է։ Կից ներկայացվեց «Իզմիրլյան» ԲԿ-ից համապատասխան բժշկական տեղեկանք։

Պաշտպան Արամ Վարդևանյանը ներկայացրեց Ռ․ Քոչարյանի նկատմամբ գրավ կիրառելու մասին միջնորդությունը, որը մուտքագրվել էր դատարան ապրիլի 17-ին։ Գրավի չափը թողնվել է դատարանի հայեցողությանը։

Ա․ Վադևանյանը ներկայացրեց արդարադատության նախարարության տրամադրած տվյալները, համաձայն որոնց՝ ՔԿՀ-ներում 65 տարեկանից բարձր կա 8 մարդ, իսկ համակցված հիվանդություններով և այդ տարիքի անձանց թիվը 3-ն է։ Նա հիշեցրեց, որ մեկ-երկու տարի առաջ Փարիզում ահաբեկչական գործողություններ են եղել, և այժմ այդ անձանց խափանման միջոցը փոխվել է։

«Մենք վերջին շրջանում մոտեցել ենք իրավական նիհիլիզմի մի շարք դրսևորումների։ Բայց եկեք գոնե իրավական նիհիլիզմի ժխտողականությունից չանցնենք իրավական ցինիզմի»,- հայտարարեց Վարդևանյանը։