Ձեր վստահելի աղբյուրը

ՀՀ էկոնոմիկայի նախարարությունը, Գործարարության աջակցման գրասենյակի և Ներդրումների աջակցման կենտրոնի հետ համագործակցությամբ, հանդես են եկել #ԲիզնեսնԸննդեմCOVID19 Քոուչինգ համատեղ նախաձեռնությությամբ, որի նպատակն է Հայաստանի գործարարներին
տրամադրել անվճար անհատական խորհրդատվություն:

ՀՀ էկոնոմիկայի նախարարության տեղեկատվության և հասարակայնության հետ կապերի վարչության հաղորդմամբ, խորհրդատվությունների տրամադրման գործընթացը մեկնարկել է մայիսի մեկին և կշարունակվի մինչև հունիսի վերջ:

Այսպիսով, Հայաստանի գործարար համայնքի ներկայացուցիչները եզակի հնարավորություն ունեն անվճար խորհրդատվություն ստանալու Հայաստանի հեղինակավոր, լավագույն և փորձառու բիզնես խորհրդատուների կողմից:

Խորհրդատվական աջակցության ոլորտները բազմաթիվ են՝ Ֆինանսական պլանավորումից մինչև իրավաբանական խորհրդատվություն, ճգնաժամային կառավարում և մարքեթինգային գործիքների կիրառում և այլն: Բիզնեսին անհրաժեշտ անվճար խորհրդատվության թվով 113 թեմաները հասանելի են հետևյալ հղումով՝ https://bit.ly/3b3dB2g:

Գրանցվելով թեմաներից մեկին` գործարարը ձեռք է բերում մեկ տոմսակ՝ խորհրդատուի կոնտակտային տվյալներով, կապ հաստատում վերջինիս հետ և ստանում խորհրդատվությունը:
Տոմսակների ընդհանուր թիվը 1054 է, և, որպեսզի խորհրդատվություն ստանալու հնարավորությունը հասանելի լինի գործարարների լայն շրջանակին՝ յուրաքանչյուր գործարար կարող է ձեռք բերել միայն 2 տոմսակ:

ՀՀ էկոնոմիկայի նախարարությունը, իր գործընկերների հետ միասին, լիահույս է, որ այս նախաձեռնությունը կօգնի Հայաստանի գործարարներին հաղթահարել ներկայիս դժվարությունները, միաժամանակ բարձր է գնահատում նախաձեռնության շրջանակներում համագործակցող խորհրդատուների՝ գործարար համայնքին անվճար աջակցության պատրաստակամությունը: