Ձեր վստահելի աղբյուրը

«Տեղի ունեցած միջադեպը որևէ դեպքում չի տեղավորվում պառլամենտարիզմի, քաղաքական երկխոսության տրամաբանության մեջ»,- խորհրդարանական ճեպազրույցի ընթացքում ասաց ԱԺ «Բարգավաճ Հայաստան» խմբակցության պատգամավոր Իվետա Տոնոյանը՝ անդրադառնալով նախորդ շաբաթ ԱԺ նիստերի դահլիճում տեղի ունեցած ծեծկռտուքին։

Նրա խոսքով, պետք է վերադառնալ կառուցողական քննարկումների դաշտ, քանի որ կորոնավիրուսային համավարակի տարածման ֆոնին պետության դեմ ծառացած մի շարք խնդիրներ կան, որոնք հրատապ լուծում են պահանջում։ Ըստ պատգամավորի, պետք է տնտեսության  կոտրված ողնաշարը շտկելու քայլեր ձեռնարկել, փոխարենը՝ խորհրդարանը զբաղված է արհեստական օրակարգ քննարկելով։

Հարցին՝ արդյո՞ք «Բարգավաճ Հայաստան» խմբակցությունը ծեծկռտուքի մասնակից պատգամավորների մանդատները վայր դնելու անհրաժեշտություն տեսնում է, Ի. Տոնոյանը պատասխանեց՝ այստեղ որևէ մեկը չի կարող իրավապաշտպանի գործառույթ իրականացնել.

«Տեղի է ունեցել շատ տհաճ միջադեպ, մենք մեր գնահատականը հնչեցրել ենք։ Ինչ վերաբերում է խորհրդարանական երկու խմբակցությունների պատգամավորների մանդատները վայր դնելուն, ապա կարծում եմ՝ յուրաքանչյուր քաղաքական ուժ ինքը պիտի որոշի իր գործունեության տրամաբանությունը»։

Հարցին, թե ի՞նչ դիքորոշում ունի «Բարգավաճ Հայաստան» խմբակցությունը Սասուն Միքայելյանի հայտարարությունների վերաբերյալ, արդյո՞ք դրանք սպառնալիքներ էին, թե՞՝ ոչ, պատգամավոր Գևորգ Պետրոսյանը պատասխանեց՝ բավական է ժողովրդի ուշադրությունն այս խնդրով զբաղեցնել։

«Շատ լուրջ խնդիրներ կան այսօր մեր երկրի առաջ, մենք ընկել ենք խորհրդարանական ծեծ ու ջարդի վերլուծությամբ ենք զբաղված։ Կան իրավապահ մարմիններ, իրենք թող հետևողական լինեն օրենքով իրենց լիազորություններն իրականացնելու հարցում, ու մեզ ազատեն այս խնդրից։ Ի՞նչ է նշանակում՝ դատապարտել եք այդ միջադեպը, բայց գնահատական չեք տվել։ Հենց դա գնահատական է, որ ասում ենք՝ խորհրդարանում պետք է լինի քաղաքական մթնոլորտ, և բռունցքներ ցուցադրելու վայրը ուրիշ է։ Մենք հիմա հո չե՞նք ընկնելու մեղավորներ փնտրենք։ Մենք իրավունք չունենք վերազանցելու մեր լիազորությունները. ով ում հետևից խփեց, տակից խփեց, վերևից խփեց՝ խորհրդարանական քննարկման խնդիր չէ»,- շեշտեց Գ. Պետրոսյանը։

Նրա խոսքով, պետք է կորոնավիրուսային արհավիրքին դիմակայելուն զուգահեռ սոցիալական խնդիրներ լուծելուն միտված լինի խորհրդարանի աշխատանքը, իսկ դա թողած պետք չէ քննարկել՝ ով ում խփեց առաջինը.

«Մենք իսկապես դատապարտում ենք այդ երևույթը, խոսքին պետք է խոսքով հակադարձել, բայց այսօր այնքան այդ թեման արծարծվեց, կարծես թե կորոնավիրուսի թեման երկրորդական կամ երրորդական է։ Բա եթե դա իրական սպառնալիք է, ինչո՞ւ ենք մոռանում դրա մասին։ Այսինքն՝  մենք չպիտի տարվենք ինչ-որ բանով ու ամբողջ օրը միայն դրա մասին խոսենք։ Իրավապահ մարմինները թող տան իրենց գնահատականը»։