Արամ Օրբելյան. Արմեն Թավադյանի դեմ քրգործը ստեղծված է Ռոբերտ Քոչարյանին բանտում պահելու համար
ՀՀ երկրորդ նախագահ Ռոբերտ Քոչարյանի փաստաբան Արամ Օրբելյանը դատական նիստի ավարտից հետո հայտարարեց՝ դատարանի որոշումը կստանան վաղը, ինչից հետո կքննարկեն հետագա անելիքները։
Հիշեցնենք, որ դատարանը քիչ առաջ մերժեց Ռոբերտ Քոչարյանի նկատմամբ ընտրված կալանքը վերացնելու, փոփոխելու, անձնական երաշխավորությամբ փոխելու համար ներկայացված երեք միջնորդությունները։ Որոշումը ենթակա է բողոքարկման 10-օրյա ժամկետում։
Օրբելյանն ասաց՝ հետագա քայլերի մասին կտեղեկացնեն լրացուցիչ։
«Նախնական քննարկումների արդյունքում, քանի որ չենք տեսնում, թե ինչ հիմքեր կարող են լինել պարոն Քոչարյանին կալանքի տակ պահելու համար, կարծում եմ՝ կբողոքարկենք»,- ասաց փաստաբանը։
Հարցին, թե սպասո՞ւմ էին նման որոշում, Օրբելյանն արձագանքեց. «Սպասում ենք ցանկացած պատասխան, քանի որ իրավաբանության մեջ հնարավոր է ամեն ինչ, բայց սա իրավաբանության հետ, իմ կարծիքով, առնչություն չունեցող գործ է։ Մենք դիտարկում ենք սա քաղաքական հետապնդում, սա ոչ թե խափանման միջոցի խնդիր է, այլ մարդուն պատժելու խնդիր։ Հետամուտ ենք լինելու, որ բոլոր այն անձինք, ովքեր մասնակցել են այս ապօրինությանը, պատասխանատվություն կրեն, մանավանդ, որ այդ անձինք բարձրաձայն ասել են, որ «Կենտրոն» ՔԿՀ-ն շատ հարմար վայր է կորոնավիրուսից պաշտպանվելու համար։ Ժամանակը կգա, և նրանք հնարավորություն կունենան այդ անվտանգությունից օգտվելու»։
Ինչ վերաբերում է անցած նիստին դատախազի այն հայտարարությանը, թե խոչընդոտելու ռիսկը չի նվազել, ինչն ապացուցելու համար մեղադրողը վկայակոչեց 5-րդ ալիք հեռուստաընկերության սեփականատիրոջ դեմ հարուցված քրեական գործը, ապա Օրբելյանը ընդգծեց. «Ես հիմնվում եմ դատարանի կողմից կայացված որոշումների վրա, անկախ նրանից, ես համաձայն եմ դրանց հետ, թե ոչ։ Այդ որոշումներում դատարանն արձանագրել է, որ խոչընդոտելու ռիսկն էականորեն նվազել է, և գրավը չի կարող սահմանվել, քանի որ չեն կարող պետականացնել, խնդիր, որն այսօր լուծվել է։ Արմեն Թավադյանի գործն ակնհայտ մանիպուլյատիվ գործընթաց է, որը ստեղծված է Ռոբերտ Քոչարյանին բանտում պահելու համար։ Այդ գործը ևս, ինչքանով ծանոթ եմ, որևէ առնչություն չունի իրավաբանության, քրեական իրավունքի հետ։ Կարծում եմ, սա շատ շուտ կարճվելու է»։
Արամ Օրբելյանհն ասաց, փաստաբանական թիմը խոչընդոտելու ռիսկը գնահատում է զրո։
Լրահոս
Տեսանյութեր
Ուղեվարձերի գումարի ավելացման վերաբերյալ քաղաքապետարանի հրապարակած թվերը ծիծաղելի են ու ամոթալի. Բաբկեն Պիպոյան
