Ձեր վստահելի աղբյուրը

«Հրապարակ» թերթը գրում է. «Անցած տարի աշխատանքից ազատվեց Երևանի կոմունալ վարչության պետ Արարատ Խաչիկյանը, որն իջևանցի է և պաշտոնի էր նշանակվել Սիփան Փաշինյանի միջնորդությամբ, կոմունալի պետի քրոջ որդին հաղթում էր աղբամանների մրցույթում, իսկ հանձնաժողովի նախագահն ինքն էր՝ աղմուկ բարձրացավ, Հայկ Մարությանը հրաժարական պարտադրեց, սակայն այսօր կրկին սկանդալ է հասունանում աղբամանների հետ կապված։

Ի՞նչ է կատարվում՝ հարցրինք Երևանի ավագանու «Լույս» խմբակցության անդամ Դավիթ Խաժակյանին։ «Խնդիրն առնչվում է աղբամանների վերջին խմբաքանակին, որը պետք է ընդունվեր փետրվար ամսին, սակայն հանձնում-ընդունումը ձգվել է մինչև այսօր»: Ճի՞շտ է, որ եկած խմբաքանակը չի համապատասխանել կանխավ նշված տեխնիկական բնութագրերին։ «Մենք ևս նման տեղեկություն ունենք, մանավանդ, որ դրանց ստացումից հետո հայտարարվել է նոր մրցույթ` փոխված տեխնիկական բնութագրերով, ապաև` նախկին մրցույթը շահած կողմը վիճարկում է այդ փոփոխությունները և մտել է գնումների բողոքարկման խորհուրդ` ընդդեմ քաղաքապետարանի, և վիճարկում է մրցույթի օրինականությունը»:

Ասում են` այս անգամ մրցույթը հաղթել է քաղաքապետի տեղակալ Հրաչ Սարգսյանի «մարդը»։ «Կդժվարանամ ասել` այդպե՞ս է, թե՞ ոչ. հատկանշական է, սակայն, որ մրցույթ, որպես այդպիսին, չկա, մատակարար կազմակերպությունները տարբեր են, արտադրողը` նույնպես։ Այսինքն` բերվում է նույն ապրանքը, չկա նաև գնային տարբերություն՝ շատ մոտ թվեր են»»:
Մանրամասները թերթի այսօրվա համարում