Ձեր վստահելի աղբյուրը

ՀՀ ԱԺ նախկին նախագահ Արա Բաբլոյանի և ԱԺ աշխատակազմի ղեկավարի նախկին տեղակալ Արսեն Բաբայանի գործով դատական առաջին նիստից հետո Արա Բաբոլյանը լրագրողների հետ զրույցում հայտարարեց, որ իրեն մեղադրում են նրա համար, որ ինքը բժիշկ է և ընտրվել է ԱԺ նախագահ:

«Գործի վերաբերյալ բազմիցս ասել եմ, որ անհասկանալի է և երբեք չեմ խախտել օրենքն ու սահմանադրությունը: Մեղադրվում եմ այն պատճառով , որ ես բժիշկ եմ ու ընտրվել եմ ԱԺ նախագահ: Միշտ իմացել եմ, որ  որպես ԱԺ նախագահ պետք է ապահովեմ ԱԺ-ի բնականոն աշխատանքը: Այն ապահովվշելու համար ԱԺ-ում գոյություն ունի 650 հոգի աշխատակազմ, որին պետությունը վճարում է աշխատավարձ և այդ աշխատակազմը պատրաստում է բոլոր այն փաստաթղթերը համաձայն օրենքի և սահմանադրության , որոնց հիմնա վրա աշխատում են պատգամավորները: Ես ստացել եմ փաստաթուղթ Գագիկ Հարությունյանից և հանձնել եմ իմ աշխատակազմին: Աշխատակազմը  պատրաստել է պատասխանը,որով ես հայտարարությամբ հանդես եմ եկել: Ես ինձ թույլ չեմ տվել, որպեսզի ասեմ նոր կամ հին կանոնակարգով այսպես արեք կամ այնպես արեք: Իրենք արել են այնպես, ինչպես պահանջում է օրենքը  և ես դրանով ղեկավարվել եմ»,- ասաց Բաբլոյանը:  

Շարունակելով խոսքը ԱԺ նախկին նախագահն նշեց, որ իրեն մեղադրում են այն  բանի համար, որ ինքը չի միջամտել և չի վերցրել իրավաբանի գործը:

«Ինչ վերաբերում է օրերին, ապա ամսի 5-ը  և 12-ն  ունեն նշանակություն, ինչո՞ւ, որովհետև 5-ին իմ հայտարարությունը հրապարակվել է: Իսկ օրենքի պահանջով յոթ օր հետո եղել է երկրորդ հրապարակումը՝  ամսի  12-ին: Մնացած շրջանառվող ամսաթվերը համարում եմ գործավարական փնթիություն և որևիցե իրավական հիմք չունեն: Եթե որևիցե մեկը կասի, որ դրանք ունեն հիմք ,թող բարձրաձայնի:Ի սկզբանե գործը սկսվել էր նրանից, որ Արա Բաբլոյանը իրավունք չուներ Հրայր Թովմասյանին պատգամավորությունից ազատել, դա արդեն օդ գնաց, քանի որ սխալ էին»։

Բաբլոյանը հիշեցրեց, որ սկսված գործի հիմքը եղել է այն, թե ինքն իրավունք չուներ Հրայր Թովմասյանին պատգամավորությունից ազատել, սակայն ազատել է և շուտափույթ ՍԴ դատավոր նշանակել, նրա խոսքով՝ հետո պարզվեց, որ առաջ բերված հարցը սխալ էր. «Ինձ մեղադրում են մի բանի համար, որ ես չեմ միջամտել և ինձ վրա չեմ վերցրել իրավաբանի գործը, այն իրավաբանի, որը  աշխատում էր վարչությունում»։  

Բաբլոյանն անդրադարձավ նաև շրջանառվող լուրերին, թե եղել է նախապես պայմանավորվածություն. «Ես իմ բնավորությամբ և մասնագիտությամբ նույն կերպարն եմ, ես վիրաբույժ եմ: Եթե ես լինեի պայմանավորվածության մեջ,  Գագիկ Հարությունյանին, որ դիմում էր տվել, ես  կասեի  դիմումդ սեղանիս լինի , որովհետև ես ամսի երկուսին ելույթ եմ ունենալու ԱԺ-ի նիստում: Բայց խոսքը վերաբերում է նրան, որ դիմումը հասել է ԱԺ ամսի 5-ին, ես մակագրել եմ: Այսինքն՝  ամբողջ պրոցեսը սկսվել  է հինգից: Այդ օրը 80-ից ավելի մարդ է քվեարկել, բայց, չգիտես ինչու, պատասխանատվություն կրում է մեկը»:

Հարցին՝ արդյոք ինքը վիրավորվա՞ծ է իշխանություններից, Բաբլոյանն ասաց՝ ոչ, ինքն ավելի փիլիսոփայորեն է նայում հարցին, որովհետեւ բժիշկ է. «Մտահոգ եմ, որ խորհրդականները սխալ բաներ են ասում եւ ղեկավարներն էլ նրանց հավատում են»։

Հիշեցնենք, որ Արա Բաբլոյանին մեղադրանք է առաջադրվել այն բանի համար, որ նա, 2018 թ․ հանդիսանալով Հայաստանի Հանրապետության Ազգային ժողովի նախագահը, մշտապես իշխանության ներկայացուցչի գործառույթներ իրականացնող պաշտոնատար անձ, չարաշահել է իր պաշտոնեական լիազորությունները, որն անզգուշությամբ առաջացրել է ծանր հետևանքներ, ինչպես նաև կատարել է պաշտոնեական կեղծիք։