Ձեր վստահելի աղբյուրը

Այսօր ապրիլյան պատերազմի անմահ հերոս Մանվել Գևորգյանի ծննդյան օրն է։ Այսօր նա կդառնար 23 տարեկան։ Մանվելը զոհվել է Արցախի Մարտունու շրջանի մարտական դիրքերից մեկը պաշտպանելու ժամանակ:

Շարքային Մանվել Գևորգյանը 2016 թ. ապրիլի 1-ից եղել է դիրքերում։ Ապրիլի 14-ին շուրջ 30 հոգուց բաղկացած ադրբեջանական խումբը հարձակում է գործում դիրքի վրա։ Դիրքում եղել են երկու հոգով և կապի ոչ մի միջոց չունենալով չեն կարողացել զեկուցել իրավիճակի մասին։ Երկուսով անցել են պաշտպանության, թշնամու նռնակից զոհվել է ընկերը, միայնակ մնալով շարունակել է դիրքի պաշտպանությունը, սկսելով կրակել շարժական թիրախի ձևով, որպեսզի թշնամին մտածի, թե դիրքում մի քանի զինվոր կա։ Նկատելով, որ փամփուշտները վերջանում են, սկսում է լիցքավորել և լիցքավորման ժամանակ զոհվում է ձախ կողքի շրջանում հրազենային վնասվածքից։ 

Ապրիլի 17-ին Մանվել Գևորգյանը ԼՂՀ նախագահ Բակո Սահակյանի կողմից պարգևատրվել է Լեռնային Ղարաբաղի Հանրապետության «Արիության» պետական մեդալով։ Մայիսի 28-ին ՀՀ նախագահ Սերժ Սարգսյանի կողմից պարգևատրվել է Հայաստանի Հանրապետության «Մարտական ծառայություն» պետական մեդալով։

hayrenaser.org-ում կարդում ենք. «Մանվելը սպորտսմեն էր. պարապում էր կարատե: Ինը տարեկանում արդեն նվաճել է Եվրոպայի չեմպիոնի տիտղոս: Մասնակցել է տարբեր մրցաշարերի աշխարհի տարբեր երկրներում, մի շարք մրցանակներ, մեդալներ ուներ: Ծառայությունից երբեք չի խուսափել. երկու շաբաթվա ծառայող է եղել և ստացել է ավագ հրաձիգի պաշտոնը: Ինն ամսվա ծառայությունն իդեալական է անցել, ըստ ծնողների: Մանվելը զոհվել է ապրիլի 14-ին. այդ օրը խոսել է բոլոր հարազատների հետ. երբեք ոչ մի բանից չի դժգոհել, ծնողների հետ այնպես է խոսել, որ նրանք չեն էլ կասկածել, թե որդին առաջնագծում է ու թեժ մարտերի է մասնակցում»: