Ձեր վստահելի աղբյուրը

«Ժողովուրդ» թերթը գրում է․ «Այս տարվա հունվար-մարտ ամիսների արդյունքներով՝ ինքնաթիռով Հայաստանից ավելի շատ ուղևոր է մեկնել, քան ժամանել: «Ժողովուրդ» թերթը ՀՀ քաղաքացիական ավիացիայի կոմիտեի վիճակագրական տվյալներից տեղեկացավ, որ «Զվարթնոց» օդանավակայանով այս տարվա հունվար-մարտ ամիսներին մեկնել է 269 հազար 72, իսկ ժամանել` 257 հազար 639 ուղևոր: Ասել է թե` այս օդանավակայանով մեկնել և չի վերադարձել 11 հազար 433 հոգի: Մասնագետների խոսքերով` ժամանողների թվի նվազումը պայմանավորված է աշխարհը փոթորկած կորոնավիրուսով: Շատերը մեկնել են երկրից և սահմանների փակ լինելու պատճառով չեն կարողանում վերադառնալ հայրենիք:

«Շիրակ» օդանավակայանով պատկերը նույնն է. այս օդանավակայանով մեկնել է 14 հազար 209, իսկ ժամանել` 13 հազար 324 ուղևոր: Այսինքն` երեք ամիսների ընթացքում այս օդանավակայանով 885 ուղևոր մեկնել է և չի վերադարձել: Հավելենք, որ Ռուսաստանի Դաշնությունից մայիսի 15-ին կվերսկսվեն դեպի Հայաստան կանոնավոր չվերթները: Այս մասին երեկ խորհրդարանում հայտնել էր փոխվարչապետ, արտակարգ դրության իրավական ռեժիմի պարետ Տիգրան Ավինյանը: Հավելենք, որ մարտի 13-ից Ռուսաստանից ՀՀ կառավարության ջանքերով Հայաստան է վերադարձել 2000-ից ավելի քաղաքացի»:

Մանրամասները՝ «Ժողովուրդ» թերթի այսօրվա համարում։