«Հրապարակ». Վարչապետի փոփոխություն չեն պահանջում և անգամ հայտնի «ծեծից» հետո չեն պատրաստվում անվստահություն հայտնել Փաշինյանին
«Հրապարակ» թերթը գրում է. «Էդմոն Մարուքյանը, որը ցած չի իջնում լրատվամիջոցներից, սակայն իշխանական և արևմտյան ԶԼՄ-ներին է նախապատվություն տալիս, երեկ մեր հարցին, թե անվստահություն կհայտնի՞ ԼՀԿ-ն Նիկոլ Փաշինյանին, 10 անգամ կրկնեց` չի լսվում-չի լսվում, անջատեց հեռախոսը և դարձավ անհասանելի:
Փաշինյանի հետ տարաձայնություններ ունեցող ԼՀԿ-ն սինխրոն է նրա ղարաբաղյան մոտեցումների հետ և անգամ հայտնի «ծեծից» հետո չի պատրաստվում անվստահություն հայտնել Փաշինյանին։ «Նման հարց օրակարգում չի եղել, չկա»,- ասաց պատգամավոր Տարոն Սիմոնյանը: Մինչև ո՞ւր կլարվեն իշխանություններ-ԼՀԿ հարաբերությունները։ «Ո՞նց կարող ենք նման կանխատեսում անել»:
Տեսակետ կա, որ ԼՀԿ-ն ցանկանում է մաշել Նիկոլ Փաշինյանի ռեյտինգը, հանուն ո՞ւմ և ինչի՞։ «Մեր գործունեությունը որևէ անձի դեմ կամ հանուն չէ, մենք բացառապես հանուն պետության ենք»: Խոսվում է, որ դուք գործընթացը տանում եք դեպի արտահերթ ԱԺ ընտրություններ։ «Արտահերթ ընտրություններ կարող են լինել մի դեպքում՝ եթե խորհրդարանն ի վիճակի չլինի իր առջև դրված խնդիրները լուծել. մենք համաձայն չենք առանձին գործընթացների հետ, բայց դեռևս դա չի նշանակում, որ մենք գտնում ենք` ԱԺ-ն իր լիազորությունները չի կատարում»: Դեռ որքա՞ն եք «ծեծվելու»։ «Ցույց կտա ժամանակը»: Ի դեպ, մեկ այլ ԼՀԿ-ական էլ ասաց. «Կարելի է ինչ-որ փուլում կազմակերպել, այսպես ասած` խորհրդարանական վարչապետափոխություն, 88 հոգու մեջ հաստատ կգտնվեն մարդիկ, որոնք կաջակցեն այդ պրոցեսին, սակայն պետք է հաշվի առնել շատ կարևոր հանգամանք` Նիկոլ Փաշինյանի ռեյտինգը ժողովրդի մեջ դեռ բարձր է, և գործընթացը չի տա այն էֆեկտը, որն անհրաժեշտ է։ Ժողովրդի մեջ ափսոսանք կմնա Փաշինյանի ապավարչապետացոմից, ուստի պետք է համբերել»»:
Մանրամասները թերթի այսօրվա համարում: