Ձեր վստահելի աղբյուրը

«Ասուլիսը նվիրված է հեղափոխության երկրորդ տարեդարձին», -սկսելով իր 8-րդ ասուլիսը՝ հայտարարեց վարչապետ Նիկոլ Փաշինյանը և ընթերցեց «100 փաստ՝ նոր Հայաստանի վերաբերյալ» վերնագրով հերթական տեղեկանքը։

Վարչապետը հայտարարեց, որ նոր տիպի կորոնավիրուսով պայմանավորված իրավիճակի հետևանքների չեզոքացման նպատակով 18 հակաճգնաժամային միջոցառում է իրականացվել, որից 7-ը տնտեսական և 11-ը սոցիալական ուղղվածության։

Ըստ նրա, երեկվա դրությամբ դրանց շրջանակում հատկացված 84.4 մրդ դրամից օգտվել է 48 400 իրավաբանական անձ և 1.1 մլն. ֆիզիկական անձ:

Վարչապետն ընթերցեց յուրաքանչյուր ծրագրով հատկացված աջակցությունները՝ դրանք ներկայացնելով, որպես 100 փաստերից մեկը:

Առաջին միջոցառմամբ կառավարությունը սուբսիդավորել է 513 տնտեսվարողի ձեռք բերած 31.7 մլրդ դրամ արժեքով վարկերի տոկոսադրույքները և, ըստ վարչապետի, աշխատավարձերի, հարկերի վճարման նպատակով ձեռք բերված վարկերը սուբսիդավորվել են ամբողջապես. վարկը հասանելի է եղել 0 տոկոսով:

Նիկոլ Փաշինյանը հայտարարեց, որ հումքի, սարքավորումների, կոմունալ վճարների և սննդի մասով սուբսիդավորվել է 6-10 տոկոսով, այսինքն՝ վարկերը հասանելի են եղել 2-6 տոկոսով և այս ծրագրով վարկի մայր գումարը մարելու համար նախատեսված է մինչև 6 ամիս արտոնյալ ժամանակահատված:

Վարչապետը վաճառել է իր «Հունդա»-ի մակնիշի ավտոմեքենան և գումարը դրամով պահել բանկում

Վարչապետը հայտնեց, որ ութերորդ միջոցառման շրջանակներում Կառավարության կողմից տուժած ոլորտների 120.828 վարձու աշխատողների և անհատ ձեռնարկատերերի բաշխվել է 8 միլիարդ 240 միլիոն դրամ և մեկ անձի միջին աջակցության չափը կազմել է 68.200 դրամ:

Հակաճգնաժամային իններորդ միջոցառմամբ 0 -18 տարեկան երեխա ունեցող ընտանիքները, որտեղ երկու ծնողներն էլ չունեն գրանցված աշխատանք, յուրաքանչյուր երեխայի համար ստացել են 26.500 դրամ աջակցություն: Ծրագրից օգտվել են 166 հազար երեխա, բաշխվել է՝ 4.4 միլիարդ դրամ:

Հակաճգնաժամային տասներորդ միջոցառմամբ, ըստ վարչապետի, միկրոձեռնարկատիրության սուբյեկտ հանդիսացող տնտեսավարողները ստացել են եռամսյակի շրջանառության 10 տոկոսի չափով աջակցություն: Ծրագրից օգտվել է 6157 տնտեսվարող, բյուջեն եղել է 317 միլիոն դրամ, մեկ սուբյեկտի միջին աջակցության չափը կազմել է 51.500 դրամ։

Վարչապետը շեշտեց, որ 10-րդ և 8-րդ ծրագրով հսկիչ դրամարկղային մեքենաներով աշխատողների աջակցության չափն էականորեն ավելի է եղել,  քան նրանց, որոնք ընդհանրապես չեն գրանցել շրջանառությունը:

34-րդ փաստի շրջանակներում վարչապետը ներկայացրեց, որ 100 խոշոր հարկ վճարողների կողմից պետական բյուջե հարկ վճարված հարկերի ընդհանուր մեծությունը 2020 թվականի հունվար-մարտ ամիսներին կազմել է 246 մլրդ դրամ, աճը 2019 թվականի նույն ժամանակահատվածի համեմատությամբ կազմել է 11.3 տոկոս, իսկ 2018-ի համեմատ 37.4 տոկոս:

Նիկոլ Փաշինյանը նկատեց, որ խոշոր հարկ վճարողների վճարած հարկերի անհամաչափության նվազում է արձանագրվել: «Ցանկի ամենախաշոր և ամենափոքր 10 ընկերությունների վճարած հարկերի հարաբերակցությունը 2020 թվականի հունվար-մարտ ամիսներին եղել է 171 անգամ, նախորդ տարվա՝ 179-ի և 2018 թվականի 180-ի փոխարեն»,- հատնեց վարչապետը:

Նիկոլ Փաշինյանը տեղեկացրեց, որ 2019-ին բանկերի կողմից տրված վարկերի դոլարիզացման մակարդակը կազմել է 53 տոկոս՝ նախորդ տարվա 59 տոկոսի փոխարեն:

Ավանդների դոլարիզացման մակարդակը, ըստ նրա, 2019-ին կազմել է 59,3 տոկոս՝ նախորդ տարվա 60 տոկոսի փոխարեն: Իսկ 2017-ին այդ ցուցանիշը 62,4 տոկոս է եղել:

«Սա նշանակում է, որ մարդիկ ավելի ու ավելի շատ են վստահում դրամին: Ես էլ նույն կերպ եմ վարվում: Վերջերս իմ «Հունդա»-ի մակնիշի ավտոմեքենան վաճառեցի և դրանից ստացված գումարը պահում եմ բանկում դրամով»,- հայտարարեց վարչապետը և կարծիք հայտնեց, որ պետք է ազգային դրամին վստահությամբ վերաբերվել։

Կոմունալ վարձավճարների ծրագրերով օգնություն է ստացել 486,434 ընտանիք

Նիկոլ Փաշինյանը ներկայացնելով հակաճգնաժամային միջացառումները, նշեց, որ  11-րդ, 12-րդ, 16-րդ միջոցառումներով օգնություն է ստացել 486.434 ընտանիք, բաշխվել՝ 4.7 միլիարդ դրամ:

Ծրագրերով կոմունալ ծառայությունների վարձավճարների 30-50 տոկոսի չափով աջակցություն են ստացել այն բնակիչ բաժանորդները, որոնց բնական գազի սպառման գծով փետրվար ամսվա ծախսը կազմել է մինչև 40.000 դրամ, էլեկտրական էներգիայի սպառման գծով փետրվար ամսվա ծախսը կազմել մինչև 25.000 դրամ,  խմելու ջրի մատակարարման մարտ ամսվա ծախսը կազմել է մինչև 3.000 դրամ:

Հակաճգնաժամային 13-րդ միջոցառմամբ  նպաստառու ընտանիքները ստացել են ամսական նպաստի 50 տոկոսի չափով լրացուցիչ աջակցություն: Ծրագրից օգտվել է 84.810 ընտանիք, բաշխվել՝ 1.2 միլիարդ դրամ։

Փաշինյանի խոսքով,  այս ծրագրով մի մասը կանխիկ էր վճարվել, մյուս մասն էլ՝ կոմունալ վճար էր փոխանցվել:

Հակաճգնաժամային 14-րդ միջոցառմամբ բարձրագույն և հետբուհական կրթական ծրագրեր իրականացնող ուսումնական հաստատություններում սովորող 3508 ուսանողները, որոնց միջին որակական գնահատականը բարձր է 90-ից, ստացել են 2020 թ. երկրորդ կիսամյակի ուսման վարձի փոխհատուցում՝ ավարտական կուրսի ուսանողները 100 տոկոսի չափով, մյուս կուրսերի ուսանողները՝ 75 տոկոսի չափով: Պակաս ՄՈԳ ունեցող ուսանողները հնարավորություն են ձեռք բերել օգտվել 0-4 տոկոս տոկոսադրույքով վարկերից, որոնց մայր գումարի մարումը կսկսվի բուհն ավարտելուց հետո: Ծրագրի բյուջեն կազմել է 1 միլիարդ դրամ:

«Այս ծրագրի մասով ասվում էր, թե ինչու ենք մենք օգնում միայն բարձր առաջադիմություն ունեցող ուսանողներին։ Մենք օգնում ենք բացառապես բոլոր ուսանողներին։ Պարզապես բարձր առաջադիմություն ունեցողներին օգնում ենք ավելի շատ, որովհետև նրանք աշխատել են ավելի շատ, իսկ ցածր առաջադիմություն ունեցողներին՝ ավելի քիչ։ Մենք բանկային համակարգի հետ ունենք համաձայնություն, և ուսանողական վարկերի տրամադրման ընթացակարգերը կպարզեցվեն ու կհեշտացվեն»,- ընդգծեց նա։

15-րդ միջոցառումով էլ, ըստ վարչապետի, կիրականացվի Հայաստանի բարձրադիր գոտիների գետերի ափապաշտպան շերտերի ծառատունկ, որի շրջանակներում կստեղծվի շուրջ 1000 աշխատատեղ։ Այս ծրագրի շահառուները կարող են վաստակել օրական մինչև 10 հազար դրամ: 

Վարչապետը նշեց, որ ծառատունկը կմեկնարկի մայիսի 18-ից։

Վարկային արձակուրդներ

«Մայիսի 15-ի դրությամբ՝ վարկային արձակուրդ է տրամադրվել 485 հազար ֆիզիկական և 15 հազար իրավաբանական անձանց։ Վերակառուցվել է ֆիզիկական անձանց 768.150 վարկ և իրավաբանական անձանց 16.875 վարկ»,- ասուլիսում հայտնեց Նիկոլ Փաշինյանը:

Ձեռքբերումների թվում հիշատակվեց այն փաստը, որ «Ազգային հիփոթեքային ընկերություն» և «Բնակարան՝ երիտասարդներին» ծրագրերերի շրջանակում Ֆինանսական դժվարություններ ունեցող վարկառուները հնարավորություն են ստացել մարումները հետաձգել 6 ամսով մինչև սեպտեմբեր ամիսը ներառյալ։

«Օրենսդրական փոփոխությունների արդյունքում ժամկետանց հարկային պարտավորությունների համար տույժի հաշվարկը ժամկետանց յուրաքանչյուր օրվա համար 2020 թ. ապրիլի 20-ից հետո 0.075 տոկոսի փոխարեն հաշվարկվելու է 0.04 տոկոսի չափով, իսկ արգելադրման համար օրենսգրքով սահմանված հարկային չկատարված պարտավորությունների շեմը 500 հազար դրամից 2020 թ. ապրիլի 20-ից հետո դարձել է 1 միլիոն 500 հազար դրամ»,- նշեց վարչապետը:

Ձեռք են բերվել 100 հազար թեստեր 

Նիկոլ Փաշինյանն ասուլիսում հայտնեց, որ կառավարության, մասնավոր հատվածի, համայնքների և քաղհասարակության համագործակցությամբ միայնակ տարեցներին, բազմազավակ անապահով ընտանիքներին և այլ խոցելի խմբերին, ինչպես նաև ցուցումով ինքնամեկուսացվածներին տրամադրվել է ավելի քան 50 հազար սննդային և հիգիենիկ պարագաների փաթեթ՝ միջինում 13 հազար դրամ արժողությամբ։

Ըստ վարչապետի բժշկական կազմակերպությունների ֆինանսական դժվարությունները մեղմելու նպատակով 119 բժշկական կազմակերպությունների ֆինանսավորումը մինչև 2020 թ. հուլիս կիրականացվի կանխավճարային սկզբունքով, քանի որ ճգնաժամի պայմաններում բուժհաստատությունները հիմնականում պլանային վիրահատություններ չեն իրականացրել և իրականացրել են միայն անհրաժեշտ անհետաձգելի վիրահատություններ:

Այդ պատճառով, ըստ վարչապետի, կանխավճարները համամասնորեն տրվել է հիվանդանոցներին՝ ֆինանսական խնդիրներ չունենալու համար:

Վարչապետը հայտնեց, որ շուրջ 100 հազար թեստեր են ձեռք բերել, և գործընթացը շարունակական է:

«Կմատակարարվեն լրացուցիչ 70 թոքերի արհեստական օդափոխության սարքեր: Այս պահին շուրջ 100-ը կան: Նախատեսվում է ձեռք բերել հավելյալ շտապօգնության, բարձր անցողունակության ավտոմեքենաներ ոչ միայն գյուղական համայնքների համար»,- ասաց Նիկոլ Փաշինյանը:

Պլանավորում է ձեռք բերել շուրջ 25 հազար համակարգիչ

Նիկոլ փաշինյանը հայտնեց, որ հաշվի առնելով կորոնավիրուսի կանխարգելման անհրաժեշտությունը և ելնելով ստեղծված իրավիճակից՝ հանրակրթական դպրոցներում ուսումնական գործընթացն օնլայն կազմակերպելու նպատակով գործարկվել է հեռավար կրթության հարթակ:

Կառավարությունը պլանավորում է ձեռք բերել շուրջ 25 հազար համակարգիչ՝ հեռավար կրթության լիարժեք ենթակառուցվածք ձևավորելու համար:

«Այս տարի դպրոցները թեև ֆիզիկապես փակ են, բայց ուսումնական տարին ավարտին կհասցնենք, միջոցներ ենք ձեռնարկում, որ հեռավար կրթության համակարգի ամբողջական ենթակառուցվածք ունենանք մինչև աշուն՝ ուսումնական գործընթացը չխաթարելու համար, որովհետև մեծ հավանականություն կա, որ աշնանը նույնպես կորոնավիրուս ենք ունենալու»,- հայտարարեց Նիկոլ Փաշինյանը։

100 փաստի մասին առավել մանրամասն՝ այստեղ։