Ձեր վստահելի աղբյուրը

Մայիսի 17-ին շուրջ 1,5 տարի ընդմիջումից և 3-րդ արտահերթ խորհրդարանական ընտրություններից հետ Իսրայելում վերջապես նոր կոալիցիոն կառավարություն ձևավորվեց։ Այն գլխավորում է այդ երկրի պատմության «ամենաերկարակյաց» վարչապետ Բենյամին Նեթանյահուն։ Ըստ կոալիցիոն համաձայնագրի՝ վարչապետի պաշտոնը ռոտացիոն է, 18 ամսից այն անցնելու է Նեթանյահուի գլխավոր կոալիցիոն գործընկեր Բենի Գանցին, ով ներկայում զբաղեցնում է ՊՆ-ի և փոխվարչապետի կամ «այլընտրանքային վարչապետի» պաշտոնները։ Այս մասին գրում է արաբագետ Արմեն Պետրոսյանը։

«Նորաստեղծ կառավարության գլխավոր առանձնահատկությունը նրա բավականաչափ ուռճացված կազմն է՝ 34-36 նախարարական պաշտոն՝ դարձյալ աննախադեպ Իսրայելի պատմության ողջ ընթացքում։

Եվ ո՞րն է պարադոքսը։ Այս կառավարության համար գործածվում էին «արտակարգ», «ազգային միասնության» բնորոշիչները, մինչդեռ կորոնավիրուսային համավարակի պայմաններում նման լուծումները որևէ կերպ չեն բխում երկրի շահերից։

Այդ առիթով և հատկապես մի քանի արհեստական նախարարական պորտֆելների ստեղծումից հետո Իսրայելում կատակում են, թե կարելի էր ստեղծել նաև տաք և սարը ջրի, նախարարների հարցերով նախարարի, տարրական դասարանների կամ մանկապարտեզների հարցերով նախարարական  պաշտոններ»,-գրել է Արմեն Պետրոսյանը։